Mat 18

‑Anɔsaa -ɔ zia 'lɛ ɔ 'yea ‑tɛtɛa 'kʋ bha?

(Mak 9.33-37; Luk 9.46-48)

1'Dɛ 'la daa, gɩlɩnyaa* ya Zozii cɩmɛ 'nyɩ ma yɔɔ neencla lebhe: «‑Laagɔɔn 'la Nyɩbhɛlɩdua* nɩkplaan, ncaasaa ‑ɔ zia 'lɛ ɔ 'yea 'fɩan 'kʋ bha?» 2Ɔ ya 'cileeco la, ɔ yɔɔ maa sidiin zʋ 3'nyɩ ɔ ya 'cla lebhe: «N solu anyɩ, ɩ ‑glɩ ‑nʋawlɛ: A 'ta kaci 'nyɩ a 'ta 'cuo 'bhisa 'kʋ 'plɩ na, 'a cɩ 'ta ‑laagɔɔn 'la Nyɩbhɛlɩdua* nɩkplaan ble. 4Ɔmɔa ‑ɔ ‑cɩ 'ka 'lɛ ɔcɩ ‑dʋdʋ 'kʋ ‑la ɩya ɔ 'ka 'cilee ‑naa 'bhisa 'kʋ 'plɩ na, ‑laagɔɔn 'la Nyɩbhɛlɩdua nɩkplaan, ɔmɔ ‑ɔ zi 'lɛ ɔ 'yea 'fɩan 'kʋ. 5'Nyɩ ɔmɔa, ‑amʋ 'wluku, ‑ɔ ‑cɩ ka 'lɛ ‑sa 'la 'cilee 'nanɩ kla na, ‑amʋ 'titi ɔ kla 'lɛ 'nanɩ.

Zozii bho ncɛlɩ ‑kɔkɔ

(Mak 9.42-48; Luk 17.1-2)

6‑Ma ɔmɔa ‑ɔ ‑cɩ ka 'lɛ gba ɩya 'cuo ‑naa ‑ɔ ‑ka 'lɛ 'na pɔɔtɛtɛ, mala sidiian bhlogbɩɩ 'ka 'lɛ nyinyiin bhlili na, ‑afalɩma ma gʋalɩɔ cokwie 'kadie -blɩɩn ɩya ma 'pɔɔ 'nyiin. 7‑Munzue ‑bhoo ‑laagɔzɔan, gbɩɩnclalɩɛ ‑bhutukpaa 'la gbʋ! Gbɩɩnclalɩɛ cɩ 'ka kʋ 'bhlɩɩ, ‑ma ‑munzue bho ɔmɔa ɛ cɩ ka 'lɛ 'kʋplɩlɩ na. 8Ɩ ‑ka kʋ lebhe ‑naa sɔ ‑aana ‑naa bho, ‑ka gba 'nyɩ ‑n ‑ka nyinyiin bhlili na, 'dɩʋ 'kʋ ɩya ‑n 'pʋʋ 'kwlaan 'koonko. Sa ‑n ‑ka sɔ bhlo ‑aana bho bhlo ‑ka 'nyɩ ‑n ka jabhʋa nɩkplaan ble na, ɩ nanɩ ‑naa da 'nyɩ ɩ zi saa ‑n ‑cɩ kaa 'lɛ ‑naa sɩa ‑aana ‑naa bhɩa ‑mɔsɔa kalɩ ɩya ma kɔɔ 'lɛ ‑kosua ‑ʋ ŋomu 'ta 'lɛ na, nɩkplaan 'pa na, 'kʋ. 9'Nyɩ ɩ ‑ka ‑kʋ lebhe ‑naa 'cia ‑ka gba 'nyɩ ‑n ‑ka nyinyiin bhlili na, kpɛɛ ɩya ‑n 'pɛɛ 'kwlaan 'koonko. Sa ‑n ‑ka 'cifa ‑ka 'nyɩ ‑n ‑ka jabhʋa nɩkplaan ble na, ɩ nanɩ ‑naa da 'nyɩ ɩ zi saa n ‑cɩ kaa 'lɛ ‑naa 'cia ‑mɔsɔa kalɩ ɩya ma 'kɔɔ 'lɛ ‑kosua ‑ʋ ŋomu 'ta 'lɛ na nɩkplaan 'pa na, 'kʋ.

'Bhlabhlɛa ‑ɛ mlɔ 'lɛ na 'la ‑nyandla

(Luk 15.3-7)

10A zʋlʋ pɔlɛ 'kʋ ɩya a 'la zɔbhɛlɩa 'cuo ‑naa sidiian bhlogbɩɩ. N solu anyɩ lebhe mala 'bhlaandleecɩa* 'nylugo clɩɩa ‑tɛtɛa n Toa ‑ɔ ‑kʋ 'lɛ ‑laagɔɔn na, ‑deliin. [11]#18.11 ‑Godogodofluwia ‑anɩ ya wɔɔkle ‑naa Zieziewɔlɩa nɩkplaan ‑pla: «Ka Nclɔɔa 'Cʋa ci 'lɛ le ɔ 'ka maa ‑ɔ mlɔa 'lɛ na gbʋʋnsa na.» 12'Nsasa a 'lɩlɩlɩa 'lɛ wɔlɩ ‑naa bha? Gbazɩ nclɔɔ ‑ka 'bhlabhlɩ ‑gwlɩɩ ‑ngbi ‑ka 'nyɩ bhlo ‑ka mlɔ na, 'ɔ cɩ 'ta ‑danaanɩa ‑gwlɩɩ ‑nmɔɔna ɩya 'kʋgba ‑nvɔɔnaa 'kikea 'wlu te ɩya ɔ 'ka ɛmɛa ‑ɛ mlɔ 'lɛ na, 'matɩkan mʋ bha? 13N solu anyɩ ɩ ‑glɩ ‑nʋawlɛ, ka ɩ ‑ka ‑kʋ lebhe ɔ yɛɛ 'lɩ na, ɔ nʋ ‑pɔpʋɛ ɛla gbʋ 'nyɩ ɔ zi ‑gwlɩɩ ‑nmɔɔnaa ɩya 'kʋgba ‑nvɔɔnaa ‑ɩ 'ta 'lɛ mlɔ na 'kʋ. 14'Sɛtɛɛ bhlogbɩɩ a Toa ‑ɔ ‑kʋ 'lɛ ‑laagɔɔn na, ɔ 'ta 'lɛ ‑wa lebhe 'cuo ‑naa sidiin, bhlogbɩɩ mlɔ.

Neennunulɩɛ 'la cɩa wɔlɩ

15Gbazɩ ‑n bholi ‑ka ‑naa ‑ngasi tʋ na, mʋ, ŋenio ɩya anyɩa ‑mɔsɔa ‑tɛɛ a kʋ sa ɩya ‑n ‑sɔɔ 'bɩ. 'Nyɩ ka ɔ ‑kɔɔ neen 'nu na, ‑n ya ‑n bholia ya bhlo 'plɩ. 16‑Ma gbazɩ ɔ ‑kɔɔ wɔlɩ 'ciin 'pa na, 'ma nclɔɔ bhlo ‑aana ncɛlɩ ‑mɔsɔ ɩya wɔlɩa 'ka sɛ ‑danʋfʋɛ cɩ ‑mɔsɔ ‑aana ‑mɔta 'la niwɔlɩ 'kʋ nɩkplaandolu. 17Ɔ 'ta mala wɔlɩa 'ma na, solui ‑laagɔnɩkplaa. 'Nyɩ ka ɔ 'tanɩ ‑laagɔnɩkplaa 'titi 'nyukwliin po na, 'mɔɔ le nclɔɔa ‑ɔ 'ta 'lɛ Laagɔ ‑ci na ‑aana ‑lapooclanyɔ 'bhisa. 18Na, n solu anyɩ, ɩ ‑glɩ ‑nʋawlɛ. ‑Tɛtɛa 'fɩan a cɩ 'ka 'lɛ ‑dʋdʋa 'kʋ gʋa na, ɩ cɩ 'ka ‑laagɔɔn ‑gʋɔ 'nyɩ ‑tɛtɛa 'fɩan a cɩ 'ka 'lɛ ‑dʋdʋa 'kʋ ‑blulu na, ɩ cɩ 'ka ‑laagɔɔn ‑bluluo.

19N solu ‑awlɛ anyɩ lebhe: Gbazɩ ‑dʋdʋa 'kʋ, anyɩ nɩkplaan, ‑mɔsɔ ‑ka bhlo 'plɩ 'nyɩ ma ‑ka lʋʋ ‑tʋtʋʋntʋ 'clalɩ na, n Toa ‑ɔ ‑kʋ 'lɛ ‑laagɔɔn na, ɔ cɩʋ maa 'nyɩ. 20Sa, daa ‑mɔsɔ ‑aana ‑mɔta 'wlalɩ 'lɛ 'wlu 'na 'ŋlɩa nɩkplaan na, n ‑kʋ maa sidiin.»

Bholiecɩ 'la valɩɛ 'la cɩa wɔlɩ

21Pɩɛlɩ ya Zozii cɩmɛ 'nyɩ ɔ yɔɔ neencla lebhe: «‑Kwlenyɔ, Daa n bholi cɩ 'ka 'lɛ 'na ‑ngasi tʋ na, dɩ ‑zlʋsaa n cɩ 'kɔɔ 'lɛ mɩ valɩ bha? Dɩ ‑ngbɔɔsɔ bha?» 22Zozii yɔɔ 'cla lebhe: «N 'cla 'tɔɔ lebhe dɩ ‑ngbɔɔsɔ ‑tɛɛ, ‑ma dɩ ‑ngbɔɔsɔ ɩla dɩpici ‑gwlɩɩ ‑mɔta ɩya 'kʋgba. 23Sa, ka ‑laagɔɔn 'la Nyɩbhɛlɩdua* palalɩ 'lɛ le nyɩbhɛlʋ bhlo ‑ɔ ‑waa 'lɛ le ɔya ɔla lobhocuoa 'kaa ɔla 'dalaa ma ‑kaa 'lɛ na, ne 'kʋbhli na. 24Ɔ 'ka 'lɛ bhɔ na, ma yɔɔ lobhoco bhlo ‑la, ɔ ‑kaa 'dala 'la ‑baagɩcʋ ‑tabhli 'la dlu. 25Sa, ɔ 'ta 'lɛ lʋʋ ka ɩya ɔ 'ka dlua ‑plʋ na, nyɩbhelʋa ya 'cla lebhe ma zʋ ɔya ɔ nʋŋlɔ, ɔla 'cuo ɩya ɔla kalɩkalɩlɩɩa 'fɩan 'pɛlʋ ɩya ɔ 'ka ɔla dlua ‑plʋ. 26Lobhocoa ya nyɩbhɛlʋa ‑deliin bhlili 'nyɩ ɔ yɔɔ 'cla lebhe: Pɔlɛɛn bhlilio, ‑ma n cɩ 'ka ‑naa dlua ‑tɛtɛa ‑plʋ. 27Na, lobhoco ‑naa ya ɔla ‑kwletoa ŋaazɩ ‑pla, ɔ yɔɔ ɔla dlua va, ɔ yɔɔ 'cintalɩ 'nyɩ ɔ ya mʋ.

28Daa lobhoco ‑naa 'wlʋ 'lɛ ‑zɔn na, ɔya ɔ 'yea mayɔɔsɔ ‑kʋa 'lɛ lobholia nɩkplaan na, bhlo ya 'cɩlɩ, ɔ ‑kaa ɔmɔ ‑ma ɔla 'dala 'la ‑baagɩcʋ 'kʋgba 'la dlu. Ɔ yɔɔ ‑blɩɩcie 'kʋbhli 'nyɩ ɔ yɔɔ 'cla lebhe: ‑Plʋ 'na dlua. 29Ɔ 'yʋa yɔɔ ‑deliin bhlili, ɔ zɩzlaa 'nyɩ ɔ claa 'mɔɔ lebhe: ‑Mla pɔlɛ 'nyu ‑ma n cɩ 'ka ‑naa dlua ‑plʋ. 30‑Ma ɔ 'ta ŋonu 'nyɩ ɔ ya gba ma ya ɔ 'yʋa ‑palʋʋn 'pa le ɔ 'ka 'yɛpɩ kʋ ‑aan ɩya ɔ 'kaa ɔla dlua ‑plʋ. 31Daa ‑daa lobhocuoa 'lɩ 'lɛ ɩmɩ ‑naa ‑ɩ 'plɩ 'lɛ na, ɩ ya maa cɩɩnkabha 'nyɩ ma ya mʋ, ma ya ma toa ɩmɩa 'fɩan ‑ɩ 'plɩa 'lɛ na, solu. 32Na, ɔla ‑klwetoa ya gba ma yɔɔ la 'nyɩ ɔ yɔɔ 'cla lebhe: Danyunolobhoco, ‑n yɔɔ dlu ‑naa tɛtɛa va, ‑ofi lebhe ‑n yaan 'wlusla. 33‑Mɔɔ ‑ma, ka ‑n ‑cɩ 'taa 'lɛ ‑n 'yʋa ŋaazɩɩn 'lɩmʋ le saa amʋ 'titi n lɩɔ 'lɛ ŋaazɩɩn na bha? 34'Nyɩ dɔgbɛ nɩkplaan, ɔla ‑kwletoa yɔɔ gbaylɩsanyaa wlɩɩn zʋ ɩya ɔ 'ka ɩmɩa 'fɩan ɔ ‑gblɔɔ 'lɛ na, cala. 35Na, gbazɩ nclɔɔ 'ta ɔ bholi va, ɔla pɔlɛa ‑tɛtɛa nɩkplaan na, 'sɛtɛɛ bhlogbɩɩ n Toa ‑ɔ ‑kʋ 'lɛ ‑laagɔɔn na, ɔ cɩ 'ka 'lɛ anyɩ nʋ.»

Currently Selected:

Mat 18: NTLD13

Highlight

Copy