Mat 17

Zozii ya kaci

(Mak 9.2-10; Luk 9.28-36)

1Clɩɩ ‑ngbʋflʋ 'plɩ 'lɛ na, Zozii ya Pɩɛlɩ, Zakɩ ɩya ɔ bholi Zaan 'ma, ma ya 'kikikadie bhlo 'wlu mʋ 'nyɩ ma ‑kʋa macɩɩn. 2Ɔ ya maa 'ci 'kʋ kacili. Ɔla 'klʋa lea le 'ylʋbhuoa, ɔla lokua ya pubha 'nyɩ ɩ 'wɛtɩa. 3'Nyɩ 'lɩka Moyizi ɩya Elii ya maa 'ciinfutolu 'nyɩ maya Zozii zʋa 'dɩ. 4Pɩɛlɩ ya nesa 'nyɩ ɔ ya Zozii 'cla lebhe: «‑Kwlenyɔ ɩ nanɩ lebhe ‑a kʋnɩ ‑wɔlʋ. ‑N ‑ka ‑wa na, n 'ka ‑da ‑paapli ‑mɔta 'sla, ‑na 'nʋ, Moyizi 'nʋ ɩya Elii 'nʋ.»

5Na, ɔ 'kʋ 'kaa nyɩtɛda 'nyɩ 'nyukplu ya ci, ʋ ya maa 'kʋwɔlɩ. 'Nyɩ ‑blɩɩzɔn bhlo ya 'nyukplua nɩkplaan 'wlʋlʋ, ʋ 'claa lebhe: «‑Anɔ ‑naa, ɔmɔ ‑ɔ ‑glɩ 'lɛ 'na ‑wawacoa, ɔmɔa ɩ mɛmaan 'lɛ pɔlɛ 'kʋ le n sla de na. A poo 'nyukwliin!» 6Gɩlɩnyaa* 'nu 'lɛ ‑blɩɩzɔn ‑naa na, pɔlɛɛn ya 'ma 'wlʋ 'nyɩ ma ya 'klʋ sagblii. 7Zozii ya maa cɩmɛ, ɔ ya maa cɩ 'bɩdɩ 'nyɩ ɔ ya maa 'cla lebhe: «A ‑bho 'kʋ! Ŋanɔ 'la 'bhlaa anyɩ!» 8Ma 'bhli 'lɛ 'wlu 'kʋ na, Zozii bhlogbɩɩ ‑tɛɛ ma 'lɩnɩ 'lɛ. 9Daa ma 'kʋ 'lɛ 'kikea kwlida na, Zozii ya maa 'cla lebhe: «Ɩmɩa ala 'ci 'lɩ 'lɛ na, a 'la ‑salɩɩ nclɔɔ ‑ylɛylɛ 'dɩ 'kʋ ‑aan ɩya Nclɔɔa 'Cʋa* 'ka 'kwɩɩnkʋbho.»

10Na, gɩlɩnyaa* yɔɔ neencla lebhe: «'Lɩsaa 'la gbʋ ‑jlɩmaazienyaa* claa 'lɛ lebhe Elii ‑cɩ kaa 'lɛ ‑bɛɛ cili bha?» 11Zozii ya maa 'cla lebhe: «‑Zaagbʋsa Elii cɩ 'ka ci ɩya ɔ 'ka ‑tɛtɛa 'fɩan 'kʋgɩglalɩ.» 12‑Ma n solu anyɩ lebhe Elii ya tooto ci, ‑ma ma 'tɔɔ cibhlili 'nyɩ mala saa ma ‑wa 'lɛ na, ma yɔɔ 'lɛ sɛɛ nʋ. Na, 'sɛtɛɛ bhlogbɩɩ Nclɔɔa 'Cʋa ‑ma ‑cɩ ka 'lɛ maa wlɩɩn sɛlɩ. 13Na, gɩlɩnyaa ya cibhili lebhe 'Nyuwluzʋnyɔ Zaan 'la wɔlɩ ɔ solua 'lɛ maa.

Zozii ya ‑okukplabhlanyɔ bhlo jabha

(Mak 9.14-29; Luk 9.37-43)

14Zozii ɩya ɔla gɩlɩnyaa* ya ‑alawleea cɩ ŋeni. Daa ma ŋeni 'lɛ ‑alawleea cɩ na, Nclɔɔ bhlo yɔɔ cɩ mɛ, ɔ yɔɔ ‑deliin ‑kukoonkplii sasla 15'nyɩ ɔ yɔɔ 'cla lebhe: «‑Kwlenyɔ, 'lɩ n ‑yowli ŋaazɩɩn: ‑Okukpla bhlɔɔ 'nyɩ ɔ sɛ ‑bhutukpa. Ɔ bhlili ‑daanda ‑kosuun ‑aana 'nyiin. 16N yɔɔ ‑naa gɩlɩnyaa ‑la, ‑ma ma 'ta mino ɩya ma 'kɔɔ jabha.» 17Zozii ya nesa 'nyɩ ɔ ya 'cla lebhe: «Anyɩ ‑pɔtɔnʋ 'la ncɛlɩa ‑ɔ 'ta 'lɛ pɔɔtɛtɛ ‑ka 'nyɩ ‑ɔ nʋ 'lɛ wɔɔnyinyi bhlobhlo na, bhlaasaan n cɩ 'kaa 'lɛ anyɩ cɩɩnwlʋlʋ bha? Sɛsʋa n sɛlɩ 'lɛ anyɩ ‑goluun na, bhlaasaan ʋ cɩ 'ka 'lɛ 'wluko bha? A ‑laan mɔ ‑da.» 18Ɔ ya 'wugo -nyunyua 'cizalalɩ, ʋ ya 'cileea nɩkplaan 'wlʋ 'nyɩ dɩpɩa bhlogbɩɩ ɔ ya jabha.

19Na, daa Zozii gbɛga 'lɛ na, gɩlɩnyaa yɔɔ cɩmɛ 'nyɩ ma yɔɔ neencla lebhe: «Na ‑anyɩ, 'lɩsaa 'la gbʋ ‑a 'ta 'lɛ 'wugo ‑nyunyu ‑naa 'tlilɩɛ mino bha?» 20Zozii ya maa 'cla lebhe: «A 'tʋʋ 'tlilɩɛ mino, ‑ofi lebhe ala pɔɔtɛtɛa 'ta 'ghli. Na, n solu anyɩ, ɩ ‑glɩ ‑nʋawlɛ: Gbazɩ clɩɩ bhlo ala pɔɔtɛtɛa ‑ka 'ghlibholi le ‑mutadɩsucie#17.20 ‑Mutadɩsuciea ‑glɩ gologolosicaa 'fɩan nɩkplaan 'la ‑lɩɩco. Ma cɩɛ 'yɩɩnglee palalɩ. na, a cɩ 'kike ‑naa 'cla lebhe: 'Wlʋ ‑da! 'Plɩ ‑wɔlʋ! 'Nyɩ ɩ cɩ sɛɛ 'plɩ. 'Nyɩ lʋʋa a cɩ 'ta 'lɛ nʋlɩɛ mino na, ʋ 'ta ‑kʋ. 21'Nyɩ ‑awlɛ bhibhie ɩya ‑zelizlolɩɛɛn ‑tɛɛ, a cɩ 'ka 'lɛ ‑sa 'la 'wugwi ‑naa 'tlilɩɛ mino.»

Zozii nyɩtɛ ‑mɔsɔda ɔla 'kwɩ ɩya ɔla 'kwɩɩnkʋbhue 'la wɔlɩ

(Mak 9.30-32; Luk 9.43-45)

22Clɩɩ bhlo gɩlɩnyaa* 'fɩan 'wlalɩa Galilee 'wlu. Zozii ya maa 'cla lebhe: «Ma cɩ 'ka Nclɔɔa 'Cʋa* ncɛlɩ wlɩɩn 'pɛlʋ zʋlʋ. 23Ma cɩ 'kɔɔ 'bhla ɩya ɩla ‑mɔta ‑zelia, ɔ 'ka 'kwɩɩnkʋbho.» 'Nyɩ 'nyɛkɛ ya maa 'fɩan 'kɔtɔ.

Zozii ɩya Pɩɛlɩ ya ‑lapoo ‑plʋ

24Zozii ɩya ɔla gɩlɩnyaa ya Kapɛnayumʋ ŋeni. Maa ‑ɔ claa 'lɛ Laagɔpaakadiea* 'la dlua na ya Pɩɛlɩ cɩmɛ 'nyɩ ma yɔɔ neencla lebhe: «Ala canyɔa ‑plʋmʋ 'ta Laagɔpaakadiea 'la dlua bha?» 25Pɩɛlɩ nabhe: «‑Wɔɔ, ɔ plʋʋ.» Daa Pɩɛlɩ ŋeni 'lɛ 'sleen na, Zozii ya ‑bɛɛ nesalɩ 'nyɩ ɔ yɔɔ 'cla lebhe: «Simɔɔn, 'nsasa ‑n 'lɩlɩlɩa wɔlɩ ‑naa bha? ‑Laagɔzɔn 'la nyɩbhɛlɩa, ncaasaacɩ ‑ɔ plʋlʋa 'lɛ maa ‑lapoa ‑aana dlia wlɩɩn bha? Mala 'cuoa bha, ‑ma lowiea bha?» 26Pɩɛlɩ nabhe: «Lowiea.» Zozii yɔɔ 'cla lebhe: «'Dɛndlana 'cuoa 'tanɩ dlu ‑ylɛylɛ 'la ‑plʋlɩɛ ‑ka. 27'Bhlɩmɔɔn, ‑a 'la ka 'lɛ ncɛlɩ ‑naa dɔgbɛɛn zʋ na, mʋ 'nyia cɩ, 'pa gwɛ, ‑bɛka ‑zliia ‑n ‑cɩ ka 'lɛ 'kʋbhli na, ‑sasalɩ ɛla nea cɩ: ‑N ‑cɩ ka 'yɛpɩ 'dala 'lɩ. 'Maa ɩya ‑n ‑plʋ ‑ala da.»

Currently Selected:

Mat 17: NTLD13

Highlight

Copy