Mat 19

'Cɩcɩɛgbɔlʋlɩɛ 'la cɩa wɔlɩ

(Mak 10.1-12)

1Daa Zozii bhɩalɩa 'lɛ wɔlɩ ‑naa calɩɛ na, ɔ ya Galileebhlɩa 'kʋ 'wlʋ 'nyɩ ɔ ya Zudeebhlɩa 'kʋ, 'yɛpɩ Zludɛɛn ‑nyidɔlʋa leen mʋ. 2Ncaabhutukpa yɔɔ gɩlɩ 'nyɩ ɔ ya maa 'yɛpɩ jabhalɩ. 3Falizɩɛnnya* yɔɔ cɩ mɛ le ma 'kaa 'mɔɔ 'gbuzu ‑zɔn 'pa. Ma yɔɔ neencla lebhe: «Nclɔɔ ‑ka jioli ɩya wɔɔtʋtʋʋntʋ 'la gbʋ, ɔ 'ka ɔ nʋŋlɔ 'tli bha?» 4Ɔ ya maa neenŋonu lebhe: «A 'ta zɛlɩ lebhe bhɔdaa, Laagɔ ya ncɛlɩ ŋodi ɩya 'ŋlɔ cɩ nʋ bha? 5'Nyɩ ɔ ya 'lɛ 'cla lebhe: Ɩmɩ ‑naa 'wluku, ŋodi cɩ 'ka ɔ to ɩya ɔ 'nɔ te, ɔ 'ka ɔ nʋŋlɔ cɩmɛ ɩya maa ‑mɔsɔa 'ka 'nyɛkɛ bhlo 'plɩ. 6Ma 'tanɩ ‑mɔsɔ ‑glɩ, ‑ma ma ‑glɩnɩ 'nyɛkɛ bhlo. Na, ɩmɩa Laagɔ ya 'lɛ bhlo ple na, nclɔɔ 'la ‑sasalɩɩ cɩ!» 7Falizɩɛnnyaa yɔɔ neencla lebhe: «'Nyɩ 'lɩsaa 'la gbʋ Moyizi ya 'lɛ 'cla lebhe nclɔɔ ‑ka ɔla 'ŋlɔ 'tli na, ɔ zie 'cɩcɩɛgbɔlʋfluwa ɩya ɔ 'nyɩɔ bha?» 8Ɔ ya maa 'cla lebhe: «Ala 'nyukwliintliloa 'la gbʋ dɛ Moyizi 'nyɩ 'lɛ anyɩ -jioli lebhe a 'tli ala 'ŋwlɛ. ‑Ma bhɔdaa, ‑n 'ta sɛɛ ɩ 'taa 'lɛ ‑kʋ. 9N solu anyɩ lebhe: Nclɔɔ ‑ka ɔ nʋŋlɔ 'cɩcɩɛ gbɔlʋ, ‑n 'ta le ŋodimatɩɛ ‑tɛɛ 'la gbʋʋ 'nyɩ ɔ ‑ka ‑buun ŋlɔ 'cɩ na, ɔ ‑glɩ ŋlʋmatɩnyɔ.»

10Gɩlɩnyaa* yɔɔ 'cla lebhe: «‑Sa ŋodi 'la wɔlɩa ‑ka ɔ nʋŋlɔ 'la gbazɔ ‑kʋ na, ‑afalɩma 'cɩcɩɛ ‑tɛɛ ɔ cɩ 'ta nʋ.» 11Ɔ ya maa neenŋonu lebhe: «‑N 'ta ncɛlɩa 'fɩan ‑ɔ cɩ 'ta 'lɛ wɔlɩ ‑naa 'nu, ‑ma maa ‑tɛɛa ɩ -kʋ 'lɛ 'nyɩ ɩ ‑nyɩɔ 'lɛ na. 12Ncɛlɩ ‑anʋa ‑kʋ, maa 'cɩ 'ta 'ŋwlɛ, sa sɛɛ ma ‑valɩɔ 'lɛ na, ‑anʋa ‑ma ‑kʋ, maa 'cɩ 'ta 'ŋwlɛ, sa ncɛlɩ ya maa ŋodieen ‑sa na 'nyɩ ‑anʋa ‑kʋ 'lɛ, maa 'cɩ 'ta 'lɛ 'ŋwlɛ, ‑laagɔɔn 'la Nyɩbhɛlɩdua* 'la gbʋ. Ɔmɔa ‑ɔ cɩ 'lɛ 'nu 'nyɩ ‑ɔ cɩ 'lɛ wɔɔnyɩtʋ ‑naa 'ma na, 'naa ɔ 'mʋʋ.»

Zozii ya 'cuo 'nyupalɩ

(Mak 10.13-16; Luk 18.15-17)

13Ncɛlɩ ya mala 'cuo 'ma 'nyɩ ma ya maa Zozii ‑la le ɔ 'kaa maa sɩ 'wlugbɛ ɩya ɔ 'ka maa 'wlubhibhie. ‑Ma gɩlɩnyaa* ya maa 'cizalalɩ. 14Zozii ya maa 'cla lebhe: «A te 'cuoa ne ɩya ma ciin 'bhlɩ, ‑ma a 'la 'dɩa maa ‑gugwieen, sa ‑laagɔɔn 'la Nyɩbhɛlɩdua* ‑kʋ, ʋ ‑nyɩɔ maa ‑ɔ ‑kʋ 'lɛ maa 'bhisa na.» 15'Nyɩ ɔ bhɩalɩ 'lɛ maa sɩwlugbɛlɩɛ na, ɔ ya 'plɩ 'nyɩ ɔ ya mʋ.

Ncaanyɩgbɩɔa ‑ɔ lio 'lɛ 'bhɛlɩa na

(Mak 10.17-31; Luk 18.18-30, 13.30)

16Nclɔɔ bhlo ya Zozii cɩmɛ 'nyɩ ɔ yɔɔ neencla lebhe: «Canyɔ, wɔɔnanɩ saa n cɩ 'kaa 'lɛ nʋ ɩya n 'kaa 'lɛ jabhʋa ‑ʋ 'ta 'lɛ 'wluzɔnbhɩalɩda ‑ka na 'lɩ bha?» 17Zozii yɔɔ 'cla lebhe: «'Lɩsaa 'la gbʋ ‑n claan 'lɛ wɔɔnanɩ 'la wɔlɩ neen bha? Ɔmɔa ‑ɔ nanɩ 'lɛ na, ɔ ‑glɩ bhlogbɩɩ. Na, ‑n ‑ka ‑wa lebhe ‑n ka jabhʋa nɩkplaan ble na, 'maa zʋ ‑jlɩmaa.» 18Ɔ yɔɔ neencla lebhe: «‑Anasaa bha?» Zozii yɔɔ neenŋonu lebhe: «‑Naa 'bhlaa nclɔɔ, ‑naa 'matɩa -n 'yʋ 'la 'ŋlɔ, ‑naa ghlia, ‑naa lia ‑kplakpla ‑danʋfʋɛ. 19Zʋ ‑n 'nɔ ɩya ‑n to, ɩya ‑n wabha ‑n 'yʋ le ‑ncɩ 'bhisa.» 20Nyɩgbɩɔa yɔɔ 'cla lebhe: «‑Ana ‑naa ‑tɛtɛa, n yaa 'kʋ 'plɩlɩ. 'Lɩsaa ‑to 'lɛ ɩya n 'kanɩ ‑awlɛ 'lɛ nʋ bha?» 21Zozii yɔɔ 'cla lebhe: «‑N ‑ka ‑wa lebhe ‑n ka ncaananɔ 'plɩlɩɛ bhɩalɩ na, mʋ, zʋ ‑naa kalɩkalɩlɩɩa 'pɛlʋ, va 'dalaa ŋaazɩnya ɩya ‑n ka ‑laagɔɔn 'bhɛlɩ lili. Ɩya ‑n ci, ‑n gɩlɩnɩɩn!» 22Nyɩgbɩɔa 'nu 'lɛ wɔɔnyɩtʋ ‑naa na, 'nyɛkɛ yɔɔ 'kɔtɔ 'nyɩ ɔ ya 'plɩ ɔ ya mʋ, sa ɔ ‑lioa 'bhɛlɩ 'kadɩ na.

23Na, Zozii ya ɔla gɩlɩnyaa* 'cla lebhe: «N solu anyɩ, ɩ ‑glɩ ‑nʋawlɛ: Nyɩbhɛlʋ 'ka 'lɛ ‑laagɔɔn 'la Nyɩbhɛlɩdua* nɩkplaan ble na, ɩ cɩ 'ka 'tɛbhalɩ. 24‑Ghɛɛ n solu anyɩ lebhe: ‑Samoo 'ka 'lɛ 'mɛsɛlʋ 'la kofoon 'plɩlɩ na, ɩ cɔlʋɔ 'nyɩ ɩ zi saa nyɩbhɛlʋ 'ka 'lɛ Laagɔ 'la Nyɩbhɛlɩdua* nɩkplaan ble na 'kʋ.» 25Daa gɩlɩnyaa 'nu 'lɛ wɔɔnyɩtʋ ‑naa na, nikpoo ya maa sla 'kadieda 'nyɩ ma claa lebhe: «Na, ncaasaa 'titi ‑ɔ ‑cɩ kanɩ 'lɛ gbʋʋnsalɩɛ 'lɩ bha?» 26Zozii ya maa 'ciinkope 'nyɩ ɔ ya maa 'cla lebhe: «Ɩmɩ ‑naa ncɛlɩ cɩ 'tɩɩ nʋlɩɛ mino, ‑ma Laagɔ mino ‑tɛtɛa 'fɩan nʋlɩɛ.» 27Na, Pɩɛlɩ ya nesa 'nyɩ ɔ yɔɔ 'cla lebhe: «'Lɩka. ‑Anyɩ, ‑a ya ‑tɛtɛa 'fɩan te 'nyɩ ‑a yɔɔ 'lɛ gɩlɩ. Na, 'nsasa ‑anyɩ ‑anɩa ɩ cɩ 'ka kɩnɩ 'lɛ kʋkʋlʋ bha?» 28Zozii ya maa 'cla lebhe: «N solu anyɩ ɩ ‑glɩ ‑nʋawlɛ, ‑laagɔzɔn ‑lelua nɩkplaan, daa Nclɔɔa 'Cʋa* cɩ 'ka 'lɛ ɔla 'klʋagba ‑nyɩbhɛlʋkpoa 'kʋ sakʋ na, anyɩa ‑ɔ gɩlɩɩn 'lɛ na, anyɩ ‑masɛɛ a cɩ 'ka nyɩbhɛlɩkpu 'kʋgba ‑mɔsɔ 'kʋ sakʋ ɩya a 'ka Izlayɛlɩlɔlʋa* 'la 'lɔkpʋa 'kʋgba ‑mɔsɔa 'tɩtɩpla. 29'Nyɩ ncaatʋtʋʋntʋa, ‑amʋ 'wluku, ‑ɔ ya 'lɛ 'sli, bholiecɩ, mɛɛncɩ, to, 'nɔ, 'cuo, ‑aana 'kwlɩ te na, ɔ cɩ 'ka 'lɩ ɩya ɔ 'ka ɩmɩa ɔ te 'lɛ na 'kʋ zi, ɩya ɔ 'ka jabhʋa ‑ʋ ‑kʋ 'lɛ 'lʋkʋlʋkʋ ɩya 'lʋkʋlʋkʋ na ‑aja 'kʋ lili. 30Maa ‑ɔ ‑kʋ 'lɛ 'kʋklʋʋn na, ‑bhutukpa cɩ 'ka leen 'plɩlɩ ɩya maa ‑ɔ ‑kʋ 'lɛ leen na, ‑bhutukpa 'ka 'kʋklʋʋn 'plɩ.»

Currently Selected:

Mat 19: NTLD13

Highlight

Copy