Ebl 1
1
Laagɔ nyɩtɛ ka ‑azla
1‑Godogodoa, Laagɔnekʋnyɩtɛnyaa* 'kʋ Laagɔ 'plɩlɩa ‑azla 'lɛ 'nyɩ ɔ solua 'lɛ ‑a tokadɔcɩa wɔlɩ 'ci 'ci. 2‑Ma ‑pɔtɔnʋ, bhɩalɩclɩɩ ‑naa nɩkplaan ‑a ‑kʋnɩ 'lɛ na, ɔla 'Cʋa ɔ sla 'lɛ de le ɔ 'ka lɩɩa ‑tɛtɛa wlɩɩn zʋ, 'nyɩ ɔ 'plɩlɩ 'lɛ 'kʋ 'nyɩ ɔ ya 'lɛ ‑tɛtɛa 'fɩan nʋ na, ɔmɔ neen ɔ nyɩtɛlɩ 'lɛ 'nyɩ ɔ ya 'lɛ ‑anyɩ solu.
3'Cʋa ‑glɩ Laagɔ 'la 'klʋagbaa 'la 'jɩ,
ɔ palalɩ ɔla ‑lɩɩbhuoa,
'nyɩ ɔla wɔɔnyɩtʋa 'la 'tɛtɩa ‑ka 'lɛ ‑tɛtɛa 'fɩan.
Ɔ ya ncɛlɩ nyinyi cɩ wɔlʋ,
'nyɩ ɩla leen, ɔ ya 'lɛ 'kʋzilo Laagɔ 'lipasɔ 'kʋ sakʋ, 'yɛpɩ ‑laagɔɔn.
4Ɔ zinɩ 'bhlaandleecɩa* 'kʋ,
‑ofi lebhe 'ŋlɩa Laagɔ zʋɔ 'lɛ na, ɩya ma 'nɩa 'ta 'wlʋlʋ.
5'Bhlaandleecɩa, ‑anɔsaa Laagɔ ya ‑azla 'lɛ 'cla lebhe:
‑N ‑glɩ 'na 'cʋ,
‑yaka, ‑amʋ n ‑valɩnɩɔ bha?
'Nyɩ 'bhlaandleecɩa, ‑anɔsaa 'la 'sasʋʋn ɔ ya ‑awlɛ 'lɛ 'cla lebhe:
‑Amʋ, n cɩ 'ka ɔ to 'plɩ
ɩya ɔmɔ ɔ 'ka 'na 'cʋ 'plɩ bha?
6‑Ma daa ɔ ‑la 'lɛ ɔla ‑bɛkavalɩcoa ‑laagɔzɔan na, ka ɔ 'ta 'cla 'lɛ lebhe:
'Naa Laagɔ 'la 'bhlaandleecɩa 'fɩan slɔɔ ‑kukoonkplii ‑deliin sa bha?
7'Nyɩ 'bhlaandleecɩa 'la gbazɔ, ɔ ya 'lɛ 'cla lebhe:
Ɔmɔ -ɔ nʋ 'lɛ ɔla 'bhlaandleecɩa 'wugwi cɩ,
Ɔmɔ -ɔ nʋ 'lɛ ɔla lobhocuoa ‑kosuvlevle cɩ.
8‑Ma 'Cʋa 'la gbazɔ, ka ɔ 'cla 'lɛ lebhe:
Laagɔ, ‑naa nyɩbhɛlɩkpoa, a ‑kʋ 'lʋkʋlʋkʋ ɩya 'lʋkʋlʋkʋ!
'Nyɩ ‑naa ‑kwlepɛa ‑glɩ 'lɛ 'kʋnylugolulɩɛ 'la ‑kwlepɛ.
9 ‑N ya 'kʋnylugolulɩɛ wabha,
'nyɩ ‑n ya 'lɛ ɩmɩa ‑ɩ 'ta 'lɛ 'kʋnylugolu na zɔbhɛlɩ,
dɛ ‑mɔɔ Laagɔ, ‑naa Laagɔ slɔɔ 'lɛ de, ‑naa 'namʋnyaa 'fɩan
sidiin, 'nyɩ ɔ yɔɔ 'lɛ pɔlɛkʋmɛnɔmɛnɔkpʋ 'wlu tɔlʋ.
10Ɔ ya ‑awlɛ 'cla lebhe:
‑Kwlenyɔ, ‑mɔ ‑ɔ nʋ 'lɛ ‑dʋdʋa bhɔdaa tooto,
'nyɩ ‑laagɔɔn ‑glɩ 'lɛ ‑naa wlɩa 'la nʋnʋlobholi.
11 Ɩmɩ ‑naa ‑tɛtɛa cɩ 'ka 'plɩ, ‑ma ‑mɔ ‑n ‑kʋ.
‑Ghɛɛ, ɩ cɩ 'ka kpli, lokwi 'bhisa.
12 Lokwi 'bhisa, ‑n ‑cɩ kɩɩ gigieli,
nɩkplaanplalokwi 'bhisa, ɩ cɩ 'ka ‑kacio.
‑Ma ‑mɔ, ‑n kaci 'ta,
'nyɩ ‑naa lio 'ta bhɩada ‑ka.
13'Bhlaandleecɩa, ‑anɔsaa ɔ ya ‑azla 'lɛ 'cla lebhe:
'Maa kʋʋn 'lipasɔ 'kʋ sa,
ɩya n 'ka ‑naa ‑zɔbhɛlɩgbanyaa ‑naa kplia ‑zɔn zʋ bha?
14Maa ‑tɛtɛa, ‑n 'ta 'wugwia ‑ɩ lobho 'lɛ Laagɔ na, ma 'ta 'lɛ ‑glɩ, 'nyɩ ɔ lobhu 'ta 'lɛ maa le ma klalɩ maa ‑ɔ ‑cɩ ka 'lɛ gbʋʋnsalɩɛ 'lɩ na bha?
Currently Selected:
Ebl 1: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.
