Film 1

‑Ayopalɩɛ

1‑Amʋ Pɔlʋ, ma 'pa 'lɛ ‑palʋʋn Zozi Klisi 'la lobholɩɛa 'la gbʋ na, ɩya ‑a bholi Timoti, ‑anyɩ ‑ɔ zieo 'lɛ, ‑mɔ Filemɔɔn, ‑ala ‑wawanyɔa ‑a ‑yɔɔsɔ nʋnʋ 'lɛ lobholia nebhlo na, 2‑n ‑ya ‑a mɛnɔ Apɩa ɩya Asipʋ, ‑a ‑yɔɔsɔ vʋlʋ 'lɛ Laagɔ 'la tʋa nebhlo na, ɩya ‑laagɔnɩkplaa ‑a 'wlalɩ 'lɛ ‑n 'bhisleen 'wlu na. 3'Naa 'nyupalɩɛa ɩya pupuea ‑ɩ 'wlʋlʋ 'lɛ ‑a To Laagɔ ɩya ‑Kwlenyɔ Zozi Klisi wlɩɩn na, kʋ anyɩ 'kʋ.

Pɔlʋ bhɔlʋ Laagɔ

4N ‑ka ‑azla bhiebhieda ‑kʋ, 'nyɩ n ‑kɔɔ 'ŋlɩ sla na, n bhɔlʋ 'na Laagɔ. 5‑Masa, n nu ‑walʋa ‑n ‑wa 'lɛ Laagɔ 'la ncɛlɩa ‑tɛtɛa ɩya pɔɔtɛtɛa ‑n ‑zʋɔ 'lɛ ‑Kwlenyɔ Zozii 'kʋ na 'la wɔlɩa. 6Pɔɔtɛtɛa ‑a 'wlalɩ 'lɛ 'kʋ na, 'naa ma 'lɩ ‑nanɛa 'la nʋnʋgbɩa 'ciin. Na 'maa gba ɩya ncɛlɩ cibhlili 'nanɩa ‑tɛtɛa ‑a cɩ 'lɛ nʋ 'nyɩ ‑a cɩ 'lɛ Klisi 'nyɩ na. 7N bholi, ‑naa ‑walʋa yaan pɔlɛkʋmɛnɔ 'kadie nʋ 'nyɩ ʋ yaan pɔlɛɛn zʋ, sa ‑n ya Laagɔ 'la ncɛlɩa 'tɛtɩɩn zʋ na.

Pɔlʋ 'clalɩ Filemɔɔn wɔlɩ bhlo

8Ka 'titi n ‑ka ‑jiolia ‑tɛtɛa ‑ka Klisi nɩkplaan ɩya n 'kɔɔ lobholi wlɩɩn zʋ na, 9n ‑wa lebhe ‑ala ‑walʋa 'la 'sasʋʋn n 'kɔɔ wɔlɩ bhlo 'clalɩ. ‑Amʋ Pɔlʋ 'bhisa 'kʋ 'la ‑glɛɛglɛnyɔ, ‑amʋa ‑ɔ ‑glɩnɩ 'lɛ ‑pɔtɔnʋ ‑palʋʋnpapanyɔ Zozi Klisi 'la gbʋ na, 10n slɔɔ 'wlu Onezimʋ,#1.10 Ka Onezimʋ ŋlɩa sa 'lɛ ‑zɔn le «ɔmɔa ‑ɔ klalɩ 'lɛ na». 'na 'cʋa n valɩlɩ 'lɛ ‑Kwlenyɔa nɩkplaan, ‑palʋʋnpapalʋa ‑zɔn na, ɔla gbʋ. 11‑Bɛkadaa, 'kpɔkpɔ 'titi ɔ ‑kʋa ‑mɔ 'lɛ cɩ, ‑ma ‑pɔtɔnʋ, ɔ klalɩnɩ ‑anyɩa ‑mɔsɔa. 12Na, ka n calɔɔ 'lɛ ‑mɔ 'bhlɩ, ɔmɔ ‑naa ‑ɔ ‑kʋnɩ 'lɛ le ‑amʋ 'titi 'na nɩkplaan 'la pɔlɛ na. 13N yaa wabha lebhe n 'kaa 'mɔɔ ncɩ cɩ zʋ ɩya ‑palʋʋnpapalʋa ‑zɔan n ‑kʋ 'lɛ, Dɩnanɩa* 'la gbʋ na, ɔ 'ka ‑amʋa ‑naa 'jeen lobho. 14‑Ma, n 'ta wabha lebhe n nʋ wɔlɩa ‑n 'ta ka 'lɛ ŋonu na ɩya 'nanɩ ‑naa ‑n cɩ kaan 'lɛ nʋ na, 'la 'ka kʋ le 'saantiin, ‑ma ɩ 'kɔɔ pɔlɛ 'ciin 'wlʋlʋ. 15Na, ɩ ‑kʋʋn 'ciin lebhe ka Onezimʋ ‑salɩɔ 'lɛ 'pɛpɛ ‑vakɩ ɩya ɔ ‑kanɩɔ 'bhlɩ cɔlɔ na, ɔ 'kanɩɔ cɩ kʋ 'lʋkʋlʋkʋ ɩya 'lʋkʋlʋkʋ, 16‑n 'tanɩ le geyu 'bhisa, ‑ma le nclɔɔa ‑ɔ zi 'lɛ geyu 'kʋ na, le ‑ala gbakabhabholi 'bhisa. 'Nyɩ ɔ ‑tete ɔ kalɩɩn gbʋ ‑gbɔɔn. Na ‑ɔ ‑glɩ 'lɛ nclɔɔ 'nyɩ ‑ɔ ‑zʋɔnɩ 'lɛ ɔla pɔɔtɛtɛa Klisi 'kʋ na, 'nsasa ɔ cɩ 'tɔɔ 'lɛ gbʋkabha ɩya ɔ 'kaan 'lɛ 'kʋzi bha?

17Na, ‑n ‑kaan 'ma le n bholia ‑n ‑yɔɔsɔ 'wlalɩ 'lɛ pɔɔtɛtɛa 'kʋ na, 'dɛndlana 'maa klɔɔ le saa ɔ ‑glɩa 'lɛ ‑amʋ 'titi na. 18'Nyɩ ka ɩ ‑ka ‑kʋ lebhe ɔ yɔɔ wɔlɩ cɩ nʋ, ‑aana ka ɔ ‑ka ‑naa dlu ‑ka na, 'maa ‑gbɛɛn mʋ 'wlu. 19‑Amʋ Pɔlʋ 'titi ‑ɔ zii 'lɛ. ‑Amʋ ‑ɔ ‑cɩ ka 'lɛ dlua ‑plʋ. 'Nyɩ 'n luoli 'tɔɔ lebhe ‑mɔɔ ‑ma ‑n ‑ka 'na dlu, ʋmʋ ‑ʋ ‑glɩ 'lɛ ‑mɔ 'titi! 20Na, n bholi, 'maa klalɩɩn ‑Kwlenyɔ 'la 'ŋlɩa nɩkplaan. 'Maa gba ɩya pɔlɛɛn 'kaan bhlili, Klisi 'la 'ŋlɩa nɩkplaan. 21‑Naa zʋlɩɛa n 'tɛlɩ 'lɛ ‑deli 'kʋ, dɛ n zieo 'lɛ. 'Nyɩ n ‑ci lebhe ‑n ‑cɩ ka ‑awlɛ nʋ ɩya ‑n ka ɩmɩa n 'clalɩɔ 'lɛ na 'kʋ zi.

22Bhɔsʋaan pʋda ‑daandanɩ. ‑Masa n 'tɛlɩ pɔlɛ 'kʋ lebhe ala bhibhiea ‑bɔɔ cɩ 'ka gba ɩya ma 'kaan ‑zɔnwlaa ɩya n 'ka anyɩ 'bhlɩ cɔlɔ. 23Epaflasɩ, ma 'pa 'lɛ n ‑yɔɔsɔ ‑palʋʋn, Zozi Klisi 'la gbʋ na, pɔɔ ‑ayo. 24Makɩ, Asitakɩ, Demasɩ ɩya Luku, ncɛlɩ ‑naa n ‑ya maasɔ nʋ 'lɛ lobholi na, maa ‑masɛ, ma pɔɔ ‑ayo. 25'Naa ‑Kwlenyɔ Zozi Klisi 'la 'nyupalɩɛa kʋ anyɩ 'kʋ.

Currently Selected:

Film 1: NTLD13

Highlight

Copy