Ebl 2

Gbʋʋnsalɩɛa 'la Dɩnanɩa ‑glɩ ‑nʋawlɛ

1Ɩla gbʋ, ɩ ‑ka ‑kʋ le ‑a 'ta ‑wa lebhe ‑a ka mlɔ na, ɩ ‑fata 'lɛ lebhe ‑a falɩ ɔla wɔlɩa ‑a 'nu 'lɛ na pɔlɛ cɩ ‑gbɔɔn. 2Sa, wɔlɩa Laagɔ 'plɩlɩ 'lɛ 'bhlaandleecɩ* 'kʋ, 'nyɩ nyɩtɛ 'lɛ na, ɩ ‑ka pala lebhe ɩ ‑glɩ ‑nʋawlɛ, 'nyɩ maa 'fɩan ‑ɔ tʋɩ 'lɛ 'nyɩ ‑ɔla 'nyi 'tɩɩ 'lɛ yi na, ma ‑ka gbaylɩsalɩɛa ma ‑yɩɩsɩ ‑fata 'lɛ na 'lɩ na, 3'nsasa ‑anyɩ 'titi ‑ma, ‑a -cɩ kaa 'lɛ gbaylɩsalɩɛa 'wlu bibili, ɩ ‑ka ‑kʋ lebhe ‑a 'ta ‑sa 'la gbʋʋnsalɩɛ ‑naa bu na bha? ‑Kwlenyɔa -ɔ bhɔ 'lɛ gbʋʋnsalɩɛ ‑naa 'la 'dɩa ‑salɩɛ, 'nyɩ maa ‑ɔ 'nui 'lɛ na, ya 'lɛ ‑anyɩ pala lebhe ɩ ‑glɩ ‑nʋawlɛ, 4'nyɩ Laagɔ ya 'lɛ ghledɩ, nikpooslaslawɔlɩ, 'ciinzizielɩlobholi ‑bhutukpa ɩya ‑Kplɔkplɔ ‑Wugoa* 'la nʋnʋgbɩa ɔ poli 'lɛ saa ɔ ‑wa 'lɛ na 'kʋ 'plɩlɩ, 'nyɩ ɔ ya 'lɛ mala ‑danʋfʋɛ li.

Ncɛlɩ 'la gbʋʋnsalɩɛ 'la gbʋ Zozii 'ku 'lɛ

5‑N 'ta 'bhlaandleecɩa 'la ‑kwleliea ‑zɔn Laagɔ 'ta 'lɛ ‑laagɔzɔan ‑ʋ ci 'lɛ 'yɛpɩ 'nyɩ ‑a nyɩtɛ 'lɛ ʋla wɔlɩa na zʋ. 6‑Ma, nclɔɔ bhlo ya dabhlo wɔlɩ ‑naa nyɩtɛ lebhe:

'Lɩsaa nclɔɔ ‑glɩa 'lɛ, ɩya ‑n kaa 'lɛ ɔla wɔlɩ gugu bha?

'Lɩsaa nclɔɔ 'la 'cʋ ‑glɩa 'lɛ,

ɩya ‑naa 'ci 'kɔɔ 'lɛ 'kʋ kʋ bha?

7 ‑N ya wabha lebhe

'bhlaandleecɩa zio 'kʋ, ‑clɩɩklipɛ nɩkplaan.

‑N yɔɔ 'klʋagba ɩya 'klʋnyɩlɩɛ didio.

8 ‑N yɔɔ lɩɩa ‑tɛtɛa kpli ‑zɔn zʋ.

Lɩɩa ‑tɛtɛa ‑kʋnɩ 'lɛ ɔla ‑kwleliea ‑zɔn na, lʋʋ ‑ylɛylɛ 'ta ‑to, ‑ʋ 'la ka 'lɛ ɔla ‑kweliea ‑zɔn kʋ na. 'Bhlɩmɔɔn, ‑a 'lɩ 'ta ka ka lebhe lɩɩa ‑tɛtɛa ‑kʋ ɔla ‑kwleliea ‑zɔn. 9‑Ma ‑a lɩnɩ lebhe ɔmɔa ma la 'lɛ ‑dʋdʋ 'kʋ le 'bhlaandleecɩa 'kɔɔ ‑clɩɩklipɛ nɩkplaan 'kʋ zi na, Zozii, 'kwɩa ɔ 'ku 'lɛ na ɛla gbʋ na, 'klʋagba ɩya 'klʋnyɩlɩɛ ‑didionɩɔ. ‑Sa, Laagɔ 'la ‑danaanɔa 'la gbʋ, ɔ 'ku 'lɛ ncɛlɩa 'fɩan 'la gbʋ.

10‑Masa ɔmɔa 'la gbʋa ‑tɛtɛa 'fɩan ‑kʋ 'lɛ, 'nyɩ ‑ɔ gba 'lɛ 'nyɩ ɩ ‑kʋ 'lɛ na, ɔ ya 'lɛ wabha lebhe ɔ 'ka ɔla 'cuo ‑bhutukpa ɔla 'klʋagbaa nɩkplaan blee na, ɩ ‑gɩlɩɔa ɔla da 'ciin lebhe ɔ 'plɩlɩ 'kwlɩbhɩɛ 'kʋ ɩya ‑glalɩ Zozii, ‑ɔ ‑cɩ kaa 'lɛ maa gbʋʋnsa na 'kʋ. 11Na, ɔmɔa ‑ɔ kplɔ 'lɛ ɩya maa ɔ 'lɩ 'lɛ -kplɔlɩɛa na, maa ‑tɛtɛa 'wlalɩ 'wlʋlʋdaa bhlogbɩɩ 'kʋ. Dɛ, ɔ 'ka 'lɛ maa ɔ bholiecɩ la na, ɩ 'tɔɔ 'lɛ ‑zo ‑ka 12'nyɩ ɔ cla 'lɛ lebhe:

N cɩ 'ka n bholiecɩa ‑naa 'ŋlɩ pala,

ɩya n 'kɔɔ ncaasidiin ‑evliwo.

13Ɔ ya ‑awlɛ 'lɛ 'cla lebhe:

‑Amʋ, n cɩ 'kɔɔ ‑delikʋtɛbhalɩ.

'Nyɩ ɔ ya ‑awlɛ 'lɛ 'cla lebhe:

'Lɩkaan, n ‑ya 'cuoa Laagɔ 'nyɩɩn 'lɛ na.

14Na, 'cuoa 'wlalɩ 'lɛ 'nyɛkɛa ɩya ‑dolua 'kʋ na, dɛ ɔmɔ ‑ma, ɔ 'plɩ 'lɛ maa 'bhisa 'kʋ, ɩya ɔla 'kwɩa nɩkplaan, ɔ 'ka ɔmɔa ‑ɔ ‑zʋɔa 'lɛ ncɛlɩ 'kwɩ 'la ‑kwleliea ‑zɔn, 'nyɩ ‑ɔ ‑glɩ 'lɛ gɔzɛ na 'dʋʋnsa, 15ɩya ɔ 'ka maa 'kwɩ 'la 'gululɩɛ 'la gbʋ, ‑ɔ ‑kʋ 'lɛ 'lʋkʋlʋkʋ geyliin na, geylia nɩkplaan ‑sa. 16‑N 'ta 'bhlaandleecɩ ɔ 'ta 'lɛ klalɩkan ci, ‑ma Ablaamʋ 'la valɩnɩkplaa ɔ ci 'lɛ klalɩkan. 17Dɛ ɩ ‑fataa 'lɛ lebhe ‑tɛtɛa 'fɩan nɩkplaan, ɔ plea ɔcɩ ɔ bholiecɩa 'bhisa, ɩya ɔ 'ka ‑teyiyinyɔ ‑kpasaa ŋaazɩɩnlɩlɩɛ ‑yelɩo 'lɛ na 'plɩ, ɔmɔa Laagɔ cɩ 'lɛ ‑delikʋtɛbhalɩ 'nyɩ 'lɔlʋa 'la nyinyia cɩ 'lɛ valɩɛ 'lɩ na. 18Sa, ɔmɔ 'titi ‑ci 'lɛ gbɩɩnclalɩɛ ɩya 'kwlɩbhɩɛ na, ɔ cɩ mino 'nyɩ cɩ maa gbɩɩnclalɩɛ ŋeni 'lɛ na, 'kʋci.

Currently Selected:

Ebl 2: NTLD13

Highlight

Copy