Efz 5
5
A namʋnʋ zezezeli nɩkplaan
1A ‑glɩ 'lɛ Laagɔ 'la ‑wawacuoa na, 'dɛndlana a dɩbalɩɔ. 2A namʋnʋ ‑walʋ nɩkplaan, Klisi 'bhisa. Ɔ ya ‑anyɩ wabha 'nyɩ ɔ ya 'lɛ ɔmɔ 'titi ɔcɩ ‑sa, ‑ala gbʋ le vavalʋʋa ɩya ‑teyiyimlɛa ‑ɛ ‑ka 'lɛ Laagɔ 'tʋ na. 3Na, ‑ɔ ‑glɩ 'lɛ ‑badaaglu, 'wɩwɩliliea ‑tɛtɛa, ɩya nyuno na, ɩ 'ta ‑fata lebhe ɩla wɔlɩ ‑ylɛylɛ ‑nyɩtɛlɩɔ anyɩ sidiin. Sa, ɩ 'ta ‑kplɔkplɔnya 'la nʋnʋgbɩ ‑glɩ na. 4‑Kplakpladɩ, 'tututuwɔlɩ ‑aana wɔɔnyinyi 'la 'wlʋlʋa anyɩ neen: A ‑yɩɩsɩ 'ta ‑fata. ‑Ma, Laagɔ 'nyɩ a bhɔlʋ. 5A cibhlili lebhe ‑badaaglulinyɔ, 'wɩwɩlinyɔ ɩya nyunonyɔ, ‑ɔ ‑glɩ 'lɛ ‑zliigʋgwlanyɔ na, mala ‑aja 'ta Klisi ɩya Laagɔ 'la Nyɩbhɛlɩdua* nɩkplaan ‑kʋmʋ.
6Na, nclɔɔ bhlogbɩɩ 'la 'ma yooyo -wɔlɩ ɩya ɔ 'la 'nyiglilia anyɩ. Ɩmɩ ‑naa ‑tɛtɛa 'la gbʋ, Laagɔ 'la dɔgbɛa bhlili 'lɛ maa ‑ɔ zʋ 'tɔɔ 'lɛ na 'kʋ. 7A 'la 'plɩa mala ‑plɔnya. 8Sa ‑bɛkadaa, a ‑kʋa 'tutuun, ‑ma ‑pɔtɔnʋ, ‑Kwlenyɔ nɩkplaan, a ‑kʋnɩ zezezeliin. Na, a namʋnɩ le zezezeli 'la 'cuo 'bhisa. 9‑Masa zezezeli 'la 'caa ‑ɩ ‑glɩ 'lɛ dananɔ, 'kʋnylugolulɩɛ ɩya ‑nʋawlɛ. 10Na, a 'matɩ lebhe a 'ka ɩmɩa ‑ɩ ‑ka 'lɛ ‑Kwlenyɔa 'tʋ na cibhlili. 11A 'la kʋmʋa 'tutuun 'la nʋnʋgbɩa ‑ɩ tlʋ 'ta 'lɛ 'ca na nɩkplaan, ‑ma a wlɩɩ ‑zɔn. 12'Nyɩ ɩmɩa ‑ɩ ‑nʋnʋɔ 'lɛ ziziekotea nɩkplaan na, ɩ 'taa ‑fata lebhe ma nyɩtɛa 'mɩ, sa ɩ ‑ka ‑zo na. 13‑Ma ‑tɛtɛa 'fɩan ma ya 'lɛ ‑zɔnwla na, zezezelia nɩkplaan ma 'lɩlɩɩ 'lɛ. 14'Nyɩ ‑tɛtɛa 'fɩan ‑ɩ yanɩ 'lɛ ‑zɔn 'wlʋ na, ɩ ‑glɩnɩ zezezeli.
Ɩla gbʋ dɛ ma cla 'lɛ lebhe:
‑Mɔa ‑ɔ ŋɔmʋ 'lɛ na, 'maa galɔ.
‑Bho 'kua sidiin 'kʋ
ɩya Klisi 'la zezezelia 'kɔɔ 'kʋ leli.
15Na, a zʋlʋ ala 'namʋa pɔlɛ 'kʋ. A 'la namʋa le ‑badaaglunya, ‑ma a namʋ dɩgalɩnya 'bhisa, 16ɩya a cibhlili clɩɩa nɩkplaan ‑a ‑kʋ 'lɛ na klasa, sa clɩɩa nɩkplaan ‑a ‑kʋ 'lɛ na, ɩ ‑nyu. 17Ɩla gbʋ na, a 'la 'plɩa 'tututunya, ‑ma a 'nu ɩmɩa ‑Kwlenyɔa 'matɩlɩ anyɩ wlɩɩn na.
18A 'la tɩa acɩ ‑diinvɛɛn, ka ɛ nyumo 'lɛ nclɔɔ, ‑ma, 'naa 'Wugoa 'nyɩ -ʋ yeli anyɩ. 19A nyɩtɛlɩ labhlɩfluwaa nɩkplaan 'la wɔlɩa nebhlo, a bhlɩ lɩɩa ‑ɩ wo 'lɛ Laagɔ ‑evli na, a bhlɩ ɩya a jaka Laagɔ ala pɔlɩa 'cin. 20A bhɔlʋ To Laagɔ clɩɩa 'fɩan, wɔlɩa ‑tɛtɛa 'la gbʋ, ‑ala ‑Kwlenyɔ Zozi Klisi 'la 'ŋlɩa nɩkplaan.
Ŋodie ɩya ŋwlɛ ‑gbaaglɩɩn 'la wɔlɩ
21Na, anyɩa ‑ɔ ‑ka 'lɛ Klisi 'la zʋlɩɛ na, nclɔɔ nclɔɔ ‑la ɔcɩ ‑dʋdʋ 'kʋ ɩya ɔ 'nyɩ ɔ 'yʋ. 22'Ŋlɔ, 'maa ‑la ‑ncɩ ‑dʋdʋ 'kʋ ɩya ‑n 'nyɩ ‑n ‑ŋuto, le saa ‑n la 'lɛ ‑ncɩ ‑dʋdʋ 'kʋ ‑n 'nyɩ 'lɛ ‑Kwlenyɔa na. 23‑Masa ŋodi ‑kwle 'lɛ 'ŋlɔ, saa Klisi ‑kwle 'lɛ ‑laagɔnɩkplaa na. Ɔmɔ ‑ɔ ‑glɩ 'lɛ ala 'nyɛkɛa 'la gbʋʋnsanyɔ. 24Na saa ‑laagɔnɩkplaa la 'lɛ acɩ ‑dʋdʋ 'kʋ 'nyɩ a nyɩ 'lɛ Klisi na, 'naa ‑tɛtɛa 'fɩan nɩkplaan, 'ŋlɔ ‑ma, ɔ ‑la ɔcɩ ‑dʋdʋ 'kʋ ɩya ɔ 'nyɩ ɔ ŋuto. 25Ŋodi, wabha ‑n nʋŋlɔ, saa Klisi wabha 'lɛ ‑laagɔnɩkplaa 'nyɩ ɔ ya 'lɛ ɔmɔ 'titi ɔcɩ ‑sa ala gbʋ. 26'Nyɩ, ɔ ya 'lɛ 'nyu ɩya wɔɔnyɩtʋa 'ma, ɔ yaa 'lɛ cɩ wɔlʋ, sa ɔ ya wabha lebhe ɔ 'kaa ‑kplɔ na. 27Na, ɔ ya wabha lebhe ɔ 'ka ala nɩkplaan ncɛlɩa ɔla 'klʋagbaa leli 'lɛ ‑kʋ, ‑ɔ 'ta 'lɛ 'kpafʋ ‑ylɛylɛ cɩ ‑ka, ‑ɔ 'ta 'lɛ 'nyʋnyʋa 'nyɩ ‑ɔ 'ta 'lɛ 'ge ‑ylɛylɛ nɩkplaan ‑ka na, ɔcɩ ‑deliin ‑la. Ɔ ya wabha lebhe ɔla ‑laagɔnɩkplaa ‑kplɔ ɩya a 'la ‑kalɩa 'ge ‑ylɛylɛ nɩkplaan. 28'Lɩka ‑sa ɩ ‑fata 'lɛ lebhe ŋodi wabha ɔla 'ŋlɔ ɔmɔ 'titi 'la nyɛkɛa 'bhisa. Ɔmɔa ‑ɔ ‑wa 'lɛ ɔla 'ŋlɔ na, ɔmɔ 'titi ɔcɩ ɔ ‑wa 'lɛ. 29'Nyɩ nclɔɔ bhlogbɩɩ 'ta ka ‑azla ɔla 'nyɛkɛ zɔbhɛlɩ. ‑Ma ka ɔ lolue 'lɛ, ɔ falɩɛ 'lɛ pɔlɛ cɩ, le saa Klisi falɩ 'lɛ ɔla ‑laagɔnɩkplaa pɔlɛ cɩ na. 30Ɔla 'nyɛkɛa 'la ‑blɩɩ ‑a 'ta 'lɛ ‑glɩ bha? 31Ɩla gbʋ, dɛ ncaaŋodi cɩ 'ka 'lɛ ɔ 'nɔ ɩya ɔ to cɩɩnwlʋlʋ, ɔ 'ka ɔ nʋŋlɔ cɩmɛ, ɩya maa ‑mɔsɔa 'ka 'nyɛkɛ bhlo 'plɩ. 32Na, wɔlɩ ‑naa ɩ ‑zizielioa 'lɛ ncɛlɩ 'ciin na, ɩ 'ghli. ‑Amʋ, ka n cla 'lɛ lebhe Klisi ɩya ‑laagɔnɩkplaa ‑gbaaglɩɩn 'la wɔlɩ ɩ ‑glɩ 'lɛ. 33Na, anyɩ ‑ma, ɩ ‑fata lebhe nclɔɔ nclɔɔ wabha ɔ nʋŋlɔ le ɔmɔ 'titi ɔcɩ 'bhisa, ɩya 'ŋlɔ ‑ma, ɔ kalɩ ɔ ‑ŋuto 'la zʋlɩɛ.
Currently Selected:
Efz 5: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.
