Efz 4

‑A 'plɩ bhlo Klisi nɩkplaan

1Na, n zɩzlalɩ anyɩ wlɩɩn, ‑amʋa ‑ɔ ‑glɩ 'lɛ ‑palʋʋnpapanyɔ ‑Kwlenyɔa 'la gbʋ na: Laagɔ ya 'lɛ anyɩ la na, 'naa a namʋ saa ‑ɩya ɔla lalɩɛa ‑ŋwa 'lɛ 'kʋ na. 2‑Ncɩdʋdʋkʋlalɩɛ, ‑pɔnpɔnnʋlɩɛ ɩya pɔɔklalɩlɛ nɩkplaan, a klaklalɩ, ‑walʋ nɩkplaan. 3A 'sɩslɩlɩ ɩya pupue nɩkplaan, a kalɩ nebhloplɩlɩɛa 'Wugoa nyɩ 'lɛ anyɩ na. 4Sa 'nyɛkɛa ‑glɩ bhlogbɩɩ 'nyɩ 'Wugoa ‑glɩ 'lɛ bhlogbɩɩ, saa ‑tɛɛa pɔlɛkʋtɛlɔa Laagɔ la 'lɛ anyɩ 'kʋ na, ʋ ‑glɩ 'lɛ bhlogbɩɩ na. 5‑Kwlenyɔa ‑glɩ bhlogbɩɩ, pɔɔtɛtɛa ‑glɩ bhlogbɩɩ 'nyɩ 'nyuwluzʋlɩɛa ‑glɩ 'lɛ bhlogbɩɩ. 6Laagɔ ‑glɩ bhlogbɩɩ 'nyɩ ɔ ‑glɩ 'lɛ ncɛlɩa 'fɩan ma To, ɔ ‑kwle maa ‑tɛtɛa, ɔ 'plɩlɩ maa ‑tɛtɛa 'kʋ, 'nyɩ ɔ ‑kʋ 'lɛ maa ‑tɛtɛa nɩkplaan.

7'Bhlɩmɔɔn, nclɔɔ nclɔɔ ya vavalɩɩa 'ci 'ci 'lɩ, saa Klisi wabha 'lɛ lebhe ɔ cɩɔ 'nyɩ na. 8Saa wɔɔnyɩtʋa cla 'lɛ lebhe:

Daa ɔ ‑gblaa 'lɛ na,

Ɔ yaa ‑palʋʋnpapanya famʋ.

ɔ ya ncɛlɩ lɩɩ va.

9'Nsasa «ɔ ya ‑gblaa» sasalɩa 'lɛ ‑zɔn bha? Ka ɩ sa 'lɛ ‑zɔn lebhe ɔ ya ‑dʋdʋa 'la ‑gluua kwli. 10'Nyɩ ɔmɔa ‑ɔ kwli 'lɛ na, ɔmɔ ‑sakasaka ‑ɔ ‑gblaa ‑awlɛ 'lɛ ‑laagɔɔn 'koonko ɩya ɔ 'ka ‑laagɔzɔn bhuoa 'kʋcɩlɩ. 11Na, vavalɩɩa ɔ 'nyɩ 'lɛ na, ɩmɩ ‑ɩ ‑glɩ 'lɛ lobhulobhunya, Laagɔnekʋnyɩtɛnya*, Dɩnanɩa* 'la ‑sanya, canya, maa ‑ɔ lɩ 'lɛ Laagɔ 'la 'lɔlʋa 'klʋ na, 12ɩya ɔ 'ka ‑kplɔkplɔnyaa bhɔsʋa, ma 'ka lobholia ‑ɩ cɩ ka 'lɛ Klisi 'la 'nyɛkɛa 'ghlibholi na nʋlɩɛ mino 13ɩya ‑anyɩa 'fɩan ‑a ka pɔɔtɛtɛa ɩya Laagɔ 'la 'Cʋa 'la cibhlililiea nɩkplaan bhlo 'plɩ, ‑a ka ‑glɛɛ ɩya a ka daa Klisi ŋeni na ŋenimʋ. 14Na, ‑a cɩ 'tanɩ 'cisanpɔlɩ 'plɩ, maa ‑naa gegaagbɩa nʋ 'lɛ ‑leke ‑leke, 'nyɩ yooyo ‑cacawɔlɩa ‑tɛtɛa 'la ‑pupolua famʋ 'lɛ 'nyɩ ncɛlɩ maya mala ‑kplakplaa 'nyiglili 'lɛ 'nyɩ ma mlɔa 'lɛ na. 15‑Ma ‑a nyɩtɛnɩ 'lɛ ‑nʋawlɛ, ‑walʋ nɩkplaan na, ‑a cɩ ka ‑glɛɛ ‑tɛtɛa 'fɩan nɩkplaan, ɩya ‑a ka klisi, ‑ɔ ‑glɩ 'lɛ 'wlua na, 'bhisa 'kʋ 'plɩ. 16Ɔmɔ nɩkplaan 'nyɛkɛa 'la ‑lɩɩ bhuoa ɛla 'kʋgɩlɩdɩa gba 'lɛ ɛ ‑glɩ 'lɛ bhlo na 'glɛlɩ 'lɛ, 'nyɩ gbazɩ ɛla dɩa ‑tɛtɛa ‑ka ɩla lobholia nʋ na, ɛmɛ 'titi 'tɛbhalɩɩn 'lɛ, ‑walʋ nɩkplaan.

Jabhʋ ‑lelua ‑ʋ ‑kʋ 'lɛ Klisi nɩkplaan na

17Na, 'lɩka ɩmɩa n nyɩtɛ 'lɛ ‑Kwlenyɔ nɩkplaan 'nyɩ n solu 'lɛ anyɩ na: A 'la namʋanɩ le maa ‑ɔ 'ta 'lɛ Laagɔ ‑ci, 'nyɩ mala dɩgalɩa ‑lalɩ 'ta 'lɛ maa lʋʋ bhlogbɩɩ na. 18Mala wɔɔgugwiea ‑pla 'tutu, 'nyɩ ma 'ta Laagɔ 'la jabhʋa nɩkplaan ‑kʋmʋ, sa ma 'ta dɩgalɩ ‑ci, pɔlɩa ‑ɩ ‑titlilio 'lɛ maa na 'la gbʋ. 19Mala 'tututua nɩkplaan, ma ya ‑badaaglu li ‑aan, 'nyɩ ma ya 'lɛ wɔɔnyinyi ‑mizimizia ‑tɛtɛa nɩkplaan bhlili.

20‑Ma anyɩ, ‑n 'ta ‑sa a 'ta 'lɛ Klisi cibhlili. 21‑N 'ta ɔla cɩa wɔlɩ ma 'ta 'lɛ anyɩ solu bha? ‑N 'ta ɔla cɩa wɔlɩ ma 'ta 'lɛ anyɩ ca, Zozi 'la ‑nʋawlɛa nɩkplaan bha? 22Na, ɩ ‑fata lebhe a tenɩ ala ‑godogodo -nʋnʋgbɩa ɩya a 'wlʋnɩ ‑godogodo nclɔɔa 'la kua nɩkplaan, ‑ɔ nyumolu 'lɛ ɔcɩ 'nyiglilinyiglililɩɩa 'la 'tʋa bɩ 'kʋ na. 23Ɩ ‑fata lebhe a te Laagɔ 'la 'Wugoa ne ɩya ʋ kaci ala wɔɔgugwie ɩya a 'ka ncaaleli 'plɩ. 24A -pla ncaaleoa 'la kua nɩkplaan, ‑ɔ ‑nʋɔ 'lɛ saa Laagɔ ‑wa 'lɛ, 'kʋnylugolulɩɛ ɩya ‑kplɔlɩɛa ‑ɩ 'wlʋlʋ ‑nʋawlɛ nɩkplaan na 'la 'sasʋʋn na. 25Ɩla gbʋ na, a 'la zʋanɩ yodi. ‑Ma 'naa nclɔɔ nclɔɔ solunɩ ɔ 'yʋ ‑nʋawlɛ, ‑ofi lebhe ‑anyɩ 'fɩan ‑a ‑glɩnɩ nclɔɔ bhlo. 26A ‑ka dɔgbɛ 'ma na, a 'la nʋa nyinyi ɩya 'ylʋ 'la bhlilia ala dɔgbɛa. 27A 'la 'nyɩa gɔzɛ 'plɩlɩda ‑ylɛylɛ.

28Ɔmɔa ‑ɔ ghlia 'lɛ na, ɔ 'la ghlianɩ, ‑ma 'naa ɔ 'sɩslɩlɩ ɩya ɔ nʋ ɔla wlɩɩn 'la lobholi, ɩya ɔ 'ka 'lɩ ɩya ɔ 'ka ɔmɔa ‑ɔ ‑mie 'lɛ na 'nyɩmʋ. 29‑Abhɔlɛwɔlɩ bhlogbɩɩ 'la 'wlʋlʋa anyɩ neen, ‑ma ɩ 'plɩ wɔɔnanɩ, ‑ɩ ‑cɩ ka 'lɛ maa ‑ɔ 'nui 'lɛ na, 'nanɩ nʋ na. 30A 'la zʋa ‑Kplɔkplɔ ‑Wugoa* cɩɩnkalɔɔn, ʋmʋa Laagɔ zʋ 'lɛ anyɩ 'kʋ, 'kukuunkpo 'bhisa, geyliinwlʋclɩɩa 'la gbʋ na. 31Cɩɩnkalɔ, pɔlɛkʋsisie, dɔgbɛ, 'slagbʋ, ncaavlalɩɛ, ɩmɩ ‑naa ‑tɛtɛa 'wlʋ anyɩ sidiin, ɩya ‑abhɔlɛ 'la 'cia ‑tɛtɛa. 32Nclɔɔ nclɔɔ 'la gbɩ nama ɔ 'yʋ 'la gbazɔ, a kalɩ ŋaazɩpɔlɛ. A vavalɩ le saa Laagɔ ya 'lɛ anyɩ va, Klisi nɩkplaan na.

Currently Selected:

Efz 4: NTLD13

Highlight

Copy