1 Pɩɛ 3

'Ŋlɔ ɩya ŋodi 'la 'namʋ

1'Ŋwlɛnyɩ, anyɩ ‑masɛɛ, a ‑la acɩ ‑dʋdʋ 'kʋ ɩya a 'nyɩ a ‑ŋutiecɩ, ɩya ka ‑anʋa 'ta ŋonu ɩya ma 'ka Wɔɔnyɩtʋa ‑nʋawlɛ la 'titio na, ma nʋŋwlɛcɩ 'la 'ka wɔlɩ ‑ylɛylɛ nyɩtɛ ɩya ma 'ka kwlacala. 2‑Masa ma cɩ 'ka ala 'namʋa pɔlɛcɩfalɩ, ɩya ma 'ka 'lɩ lebhe ʋ ‑kplɔ 'nyɩ ʋ ‑kʋlʋ zʋlɩɛ nɩkplaan. 3Ala cɩzʋlɩɩa 'la 'plɩa ‑jlukuun ‑naanɩ, ‑ɩ ‑glɩ 'lɛ bhlabhlanyɩ, ‑asɩkɛcɩzʋlɩɩ, ‑aana nɩkplaanplaloku 'nanɩ na. 4‑Ma 'naa ɩ 'plɩ wɔlɩa ‑ɩ ‑zizieo 'lɛ ala pɔlɩa 'ciin na, 'naa ɩ 'plɩ pɔɔwɔtɩwugoa ‑ʋ ‑pupuo 'lɛ na, ʋla cɩzʋlɩɩa ‑ɩ nyumo 'ta 'lɛ, 'nyɩ ‑ɩ ‑glɩ 'lɛ gbakabhalɩɩ Laagɔ 'ci 'kʋ na.

5‑Godogodoa, ‑sa 'la lɩɩ ‑kplɔkplɔŋwlɛa ‑ɔ 'tɛlɩa 'lɛ Laagɔ pɔlɛ 'kʋ na, zʋa 'lɛ cɩ, 'nyɩ ma laa 'lɛ macɩ ‑dʋdʋ 'kʋ 'nyɩ ma nyɩa 'lɛ ma ‑ŋutiecɩ. 6Sɛɛ Salaa, ‑ɔ zʋa 'lɛ ɔ ‑ŋuto Ablaamʋ, 'nyɩ ‑ɔ laa 'mɔɔ 'lɛ ɔla ‑kwlenyɔ na, nʋa 'lɛ. Ɔla cuo ‑a ‑glɩnɩ 'lɛ, anyɩa ‑ɔ nʋ 'lɛ 'nanɩ, 'nyɩ ‑ɔ te 'tanɩ 'lɛ lʋʋ bhlogbɩɩ 'la pɔɔvʋ ne ɩya ʋ 'ka anyɩ 'bhla na.

7Anyɩ ŋodiea ‑masɛɛ, aya 'ŋwlɛa 'la sakʋlɩɛa nɩkplaan, a cibhlili lebhe ka mala gbɩa ‑kʋ 'lɛ le lʋʋa ‑ʋ 'ta 'lɛ nyumocɩ kalɩ na. A zʋ maa, ‑masa maya anyɩsɔɔ ‑ɔ ‑cɩ ka 'lɛ jabhʋa 'la 'nyupalɩɛa ‑aja 'kʋ lili na. A nʋ ‑sa, ɩya lʋʋ ‑ylɛylɛ 'la ka ala bhibhiea ‑gugwie 'kʋ sɩalɔ.

A kalɩ wɔɔgugwie bhlo

8Na ‑pɔtɔnʋ, 'naa anyɩa 'fɩan kalɩnɩ wɔɔgugwie bhlo. A klalɩklalɩlɩ, a wabhawabhalɩ, bholiecɩ 'bhisa, a 'lɩlɩlɩ ŋaazɩɩn, ɩya nclɔɔ nclɔɔ ‑la ɔcɩ ‑dʋdʋ 'kʋ ɩya ɔ 'nyɩ ɔ 'yʋ. 9A 'la nʋnʋnʋa ‑abhɔlɛ, ‑aana a 'la vlavlalɩa. ‑Ma a palɩ 'nyu, sa ɩla gbʋ Laagɔ la 'lɛ anyɩ na, ɩya a 'ka 'nyupalɩɛa ‑aja 'kʋ lili.

10‑Masa, ɔmɔa jabhʋa 'la 'tʋ bhla 'lɛ

'nyɩ ‑ɔ ‑wa 'lɛ lebhe ‑ɔ cɩ 'nanɩ kʋ na,

'naa ɔ tlʋbhalɩ ɔla mɩɔa ‑abhɔlɛwɔlɩ cɩ da

ɩya ɔla nea yodɩ cɩ da.

11 'Naa ɔ ‑tla nyinyi kɔkʋʋn, ɩya ɔ nʋ 'nanɩ.

'Naa ɔ 'matɩ pupue, ɩya ɔ gɩlɩɛ.

12 Sa ‑Kwlenyɔ 'la 'cia ‑kʋ 'kʋnylugolunya 'kʋ,

'nyɩ ɔla 'nyukwlia ‑po 'lɛ mala bhibhiea 'nyukwliin.

‑Ma maa ‑ɔ nʋ 'lɛ ‑abhɔlɛ na,

ka ‑Kwlenyɔ cili 'lɛ maa gbatlɩ.

A 'la sɛa 'nanɩnʋlɩɛ 'kʋ

13'Nyɩ ɩ ‑ka ‑kʋ lebhe a 'ka 'nanɩ 'la gbʋ ‑nwɔvi na, ncaasaa ‑ɔ ‑cɩ ka 'lɛ anyɩ ‑abhɔlɛ nʋ bha? 14'Nyɩ ka 'kʋnylugolulɩɛ 'la gbʋ 'kwlɩ ‑ka anyɩ bhɩa 'titio na, a ‑kʋ 'nanɩ. A 'la 'gulua ncɛlɩ ‑ylɛylɛ, ɩya ala wɔɔgugwiea 'la gblogblolua. 15‑Ma a kalɩ Klisi 'la zʋlɩɛ ala pɔlɩa nɩkplaan lebhe ɔmɔ bhlogbɩɩ ‑ɔ ‑kplɔ 'lɛ 'nyɩ -ɔ ‑glɩ 'lɛ ‑Kwlenyɔ. A gblɩbhalɩ clɩɩa 'fɩan, ɩya a 'ka ala pɔlɛkʋtɛlɔa 'la wɔlɩa maa ‑ɔ clɩɩ 'lɛ anyɩ neen na ‑zɔnsa. 16‑Ma 'naa a nʋnʋɩ pɔɔwɔtɛ ɩya zʋlɩɛ nɩkplaan. A kalɩ wɔɔgugwie 'nanɛ, ɩya daa ma cɩ 'ka 'lɛ anyɩ ‑glaankalɩ na, maa ‑ɔ kalɩ 'lɛ anyɩ ‑glaan, 'namʋ 'nanʋa a namʋ 'lɛ Klisi nɩkplaan na ʋla gbʋ na, ‑zo 'ka maa pla. 17Sa a ‑ka 'nanɩ nʋda ‑kʋ 'nyɩ 'kwlɩ ‑ka anyɩ bhɩa, 'nyɩ ɩ ‑ka Laagɔ 'la pɔɔsa ‑glɩ na, ɩ nanɩ 'nyɩ zi saa a cɩ 'kaa 'lɛ nyinyi nʋda 'kʋ ɩya ɩ 'ka 'lɛ anyɩ bhɩa na 'kʋ.

‑Tɛtɛa 'fɩan ‑kʋ Klisi 'la ‑kwleliea ‑zɔn

18‑Masa Klisi 'titi, 'kwlɩ yɔɔ nyinyi 'la gbʋ bhɩa, ‑bluu bhlogbɩɩ 'kplookʋ. Ɔmɔ 'kʋnylugolunyɔa, ɔ ya maa ‑ɔ 'ta 'lɛ 'kʋnylugolu na 'la gbʋ sɛ, ɩya ɔ 'ka anyɩ Laagɔ pala. Ma ya ɔla 'nyɛkɛa 'bhla, ‑ma 'Wugoa ya gba, ɔ ya 'kwɩɩnkʋbho. 19Na, ɔ ya mʋ 'nyɩ ɔ ya 'wugwia ‑ɩ ‑pɔɔa 'lɛ ‑palʋʋn na plici, 20maa ‑godogdoa, ‑ɔ mʋnʋa 'lɛ Laagɔ gbatlɩ, daa ɔla pɔɔklalɩɛa tlʋbhalɩa 'lɛ nɩkplaan na, 'bhlɛsʋa nɩkplaan Nowee tɛlɩa 'lɛ 'gɔkadiea nɩkplaan ncaapɛ, ncɛlɩ ‑ngbaata ‑tɛɛ, 'lɩlɩa 'lɛ gbʋʋnsalɩɛ 'nyua nɩkplaan na. 21Ɩ ‑glɩa 'nyuwluzʋlɩɛa ‑ɩ sa 'lɛ ‑anyɩ ‑pɔtɔnʋ gbʋʋn na 'la palalɩlɩɛ. 'Ɩ 'ta 'nyɛkɛa 'la zɩ* cɩ ‑salɩɛ ‑glɩ, ‑ma ‑ɩ ‑glɩ ‑ndanyɩa nclɔɔ ta 'lɛ Laagɔ, le ɔ cɩ wɔɔgugwiea ‑ɛ kplɔ 'lɛ na kalɩ na. Ɩ sa anyɩ gbʋʋn, Zozi Klisi 'la 'kwɩɩnkʋbhuea 'la gbʋ. 22Ɔmɔ ‑ɔ ‑gblaa 'lɛ ‑laagɔɔn, ‑ɔ ‑kʋ 'lɛ Laagɔ 'la 'lipasɔa 'kʋ, 'nyɩ 'bhlaandleecɩa*, ‑kwlelie ɩya 'tɛtɩa ‑tɛtɛa ‑kʋ 'lɛ ɔla ‑kwleliea ‑zɔn.

Currently Selected:

1 Pɩɛ 3: NTLD13

Highlight

Copy