1 Pɩɛ 2
2
1'Dɛndlana, a 'talɩ ‑abhɔlɛ, ‑kplakpla, yooyogbɩ, woze, ɩya ncɛlɩglaankalɩlɩɛ 'cin, 2ɩya 'cipɔlɩ 'bhisa, 'naa wɔɔnyɩtʋa ‑ʋ ‑glɩ 'lɛ lʋbhʋa ‑ʋ 'ta 'lɛ 'cakalɩɔ na, ʋla 'tʋ 'bhla anyɩ ɩya ʋ 'ka gba a 'ka ‑glɛɛ, ɩya a 'ka gbʋʋnsalɩɛ 'lɩ. 3‑Masa, A yʋʋ neencla 'nyɩ a ya 'lɩ le ‑Kwlenyɔ nanɩ.
A mɛ Laagɔ cɩ
4Na, a mɛɔ cɩ. Ɔmɔ ‑ɔ ‑glɩ 'lɛ ‑jajacɔkwiea ncɛlɩ 'pa 'lɛ 'kwlaan, 'nyɩ Laagɔ sla 'lɛ de, 'nyɩ ‑ɛ ‑glɩ 'lɛ 'pɛlʋtɛtʋcokwie na. 5Anyɩ ‑masɛɛ, ‑jajacɔkʋ 'bhisa, a kʋmʋ ‑palʋa 'Wugoa ‑kʋ 'lɛ nɩkplaan na, ʋla 'slalɩɛ nɩkplaan, ɩya a 'ka ‑teyiyinya 'la ‑kplɔkplɔkande 'plɩ ɩya a 'ka Zozi Klisi 'kʋ 'plɩlɩ ɩya 'Wugoa nɩkplaan, a 'ka ‑teyia ‑ɩ ‑ka 'lɛ Laagɔ 'tʋ na yi. 6Sa Zieziewɔlɩa* cla lebhe:
'Lɩka n zʋ Siyɔɔndua nɩkplaan lopolugbuducokwie ‑gluu.
Ka n slɛɛ 'lɛ de, 'nyɩ ɛ ‑glɩ 'pɛlʋtɛtʋcokwie.
Ɔmɔa ‑ɔ -cɩ kɛɛ 'lɛ ‑delikʋtɛbhalɩ na, 'ɔ cɩ 'taa ‑sʋkpɔɔ.
7 Anyɩa ‑ɔ ‑ka 'lɛ Laagɔ 'la pɔɔtɛtɛ na,
ɔ cɩ 'ka anyɩ 'klʋ 'kpaan zʋ.
‑Ma maa ‑ɔ 'ta 'lɛ pɔɔtɛtɛ ‑ka na,
mala gbazɔ, cokwiea ‑paaslanyaa 'pa 'lɛ 'kwlaan na,
ɛmɛ ‑ɛ 'plɩ 'lɛ lopolugbuducokwiea.
8 Ɛ ‑glɩ cokwiea ma gozo 'lɛ na,
cokwiea ‑ɛ palɩ 'lɛ ncɛlɩ sa na.
Ka ma gozoe 'lɛ, ‑ofi lebhe maa ŋonu 'ta ɩya ma 'ka wɔɔnyɩtʋa ‑nʋawlɛ la, 'nyɩ ɩmɩ ‑naa ‑ɩ ‑cɩ kaa 'lɛ maa ŋeni.
9 ‑Ma anyɩ, anyɩ ‑ɔ ‑glɩ 'lɛ 'lɔlʋa ɔ sla 'lɛ de na,
nyɩbhɛlʋa 'la ‑teyiyinyaa mala ‑kandea,
anyɩ ‑ɔ ‑glɩ 'lɛ ‑kplɔkplɔbhlɩa 'la ncɛlɩa,
'lɔlʋa Laagɔ ple 'lɛ ɔ 'nʋ
le a 'ka ɔmɔa ‑ɔ ‑sa 'lɛ anyɩ 'tutua nɩkplaan,
'nyɩ ‑ɔ ‑la 'lɛ anyɩ ɔla ‑jakajakazezezelia nɩkplaan na,
ɔla nʋnʋgbɩ 'kadɩa 'dɩkʋsalɩ na.
10 Anyɩa ‑ɔ 'taa 'lɛ ‑godogodoa Laagɔ 'la 'lɔlʋ ‑glɩ na,
a ‑glɩnɩ ‑pɔtɔnʋ ɔla 'lɔlʋ.
Anyɩa 'ɔ 'taa 'lɛ ŋaazɩɩn na,
ɔ yanɩ anyɩ ‑pɔtɔnʋ ŋaazɩɩn 'lɩ.
A namʋ le Klisi 'la gɩlɩnya
11N 'nagwɛcɩnyɩ, a ‑glɩ 'lɛ 'plɩplɩnya ɩya lowie na, n 'clalɩ anyɩ lebhe a tie acɩ lɩɩa ‑ɩ ‑ka 'lɛ 'nyɛkɛa 'tʋ 'nyɩ ‑ɩya 'wugoa vʋ 'lɛ tʋ na. 12Maa ‑ɔ 'ta 'lɛ Laagɔ ‑ci na sidiin, 'naa ala 'namʋa nama, ɩya ka ma ‑ka anyɩ ‑glaan ‑ka 'titio le a ‑glɩ ‑abhɔlɛnya na, ma 'ka ala nʋnʋgbɩ 'nanɩa 'ciin kope ɩya ma 'ka Laagɔ ‑evliwo, ɔla ciclɩɩa 'kʋ.
13‑Kwlenyɔa 'la gbʋ na, 'naa a kalɩ ncɛlɩa ‑tɛtɛa ‑ɔ ‑kwle 'lɛ na, mala zʋlɩɛ. A zʋ nyɩbhɛlʋa ‑ofi lebhe ɔmɔ ‑ɔ ‑kwle 'lɛ ncɛlɩa 'fɩan, 14ɩya a zʋ goonvlacɩa ɔ ‑sa 'lɛ le ma 'ka ‑abhɔlɛnyaa gbaylɩsa ɩya ma 'ka ncɛlɩa ‑ɔ nʋ 'lɛ 'nanɩ 'ŋwleen falɩ na. 15‑Masa, ɩ ‑glɩ Laagɔ 'la pɔɔsa le a nʋ 'nanɩ, ɩya ɩ 'ka gba ɩya 'tututunyaa ‑ɔ 'ta 'lɛ wɔlɩ bhlogbɩɩ ‑ci na, ma 'ka mala nia mɛ. 16A namʋ le ‑ncɩkalɩnya, ‑ma ka 'nyɩ a 'la 'maa ‑ncɩkalɩɛa le ‑slala ɩya a 'la ‑gbliia ala ‑abhɔlɛa 'wlu, ‑ma a nʋ le Laagɔ 'la lobhocuo. 17A zʋ ncɛlɩa 'fɩan, a wabha a bholiecɩa, a 'gulu Laagɔ, ɩya a zʋ nyɩbhɛlʋa.
A 'plɩlɩ Klisi 'la 'bɩa 'kʋ
18Lobhocuonyɩ, 'naa a ‑la acɩ ‑dʋdʋ 'kʋ ɩya a kalɩ a tocɩa 'la zʋlɩɛ 'kadie. ‑N 'ta maa ‑ɔ nanɩ 'lɛ pɔlɛ 'kʋ 'nyɩ ‑ɔ ‑ka 'lɛ pɔlɛwɔtɛ na ‑tɛɛ, ‑ma 'naa a kalɩmʋ maa ‑ɔla wɔlɩ 'tɛ 'lɛ na, mala zʋlɩɛ ‑masɛɛ. 19Sa, Laagɔ 'la zʋlɩɛa 'la gbʋ, 'kwlɩ ‑ka nclɔɔ 'nyisasasa bhɩa na, ɩ ‑glɩ 'nyupalɩɛ. 20‑Masa, a ‑ka wɔɔnyinyi nʋ, 'nyɩ ma ‑ka anyɩ ɩla gbʋ bhutida ‑kʋ 'nyɩ a ‑ka pɔlɛ kla na, 'klʋagbasaa a 'lɩa bha? ‑Ma gbazɩ a ya 'lɛ 'nanɩ nʋ, 'nyɩ ɩla gbʋ 'kwlɩ ‑ka anyɩ bhɩada ‑kʋ 'nyɩ a ‑ka pɔlɛ kla na, Laagɔ 'ci 'kʋ, ɩ ‑glɩ 'nyupalɩɛ. 21'Nyɩ ‑anɩ ‑naa 'la gbʋ Laagɔ la 'lɛ anyɩ, sa Klisi ‑ma, ɔ ya ala gbʋ sɛ, 'nyɩ ɔ ya 'lɛ anyɩ saa a cɩ 'ka 'lɛ nʋnʋnʋ na pala, ɩya a 'ka ɔla 'bɩa 'kʋ 'plɩlɩ.
22 Ɔmɔa ɔ 'ta 'lɛ nyinyi nʋ,
'nyɩ yodi ‑ylɛylɛ 'ta ka ‑azla 'lɛ neen 'wlʋlʋ na.
23 Ɔmɔa ma vla 'lɛ, 'nyɩ ɔ 'ta 'lɛ ne ‑sa na,
ɔmɔa 'kwlɩ ‑kʋ 'lɛ bhɩada, 'nyɩ ɔ 'ta 'lɛ nclɔɔ 'cizalalɩ,
‑ma ‑ɔ ya 'lɛ ɔ 'nɩa 'tɩtɩplanyɔa ‑ɔ 'nylugolu 'lɛ 'kʋ na,
wlɩɩn zʋ na.
24 Ɔmɔa, dabhlalɩsua 'ciin, ‑ɔ ya 'lɛ ‑ala nyinyia
ɔmɔ 'titi ɔla 'nyɛkɛa nɩkplaan bhɛlɩ,
le ‑a ka 'ku, ‑ala nyinyia ɩla gbazɔ,
ɩya ‑a kanɩ 'kʋnylugolulɩɛ 'la gbʋ kʋ na,
ɔla 'jia ɩmɩ ‑ɩ jabha 'lɛ anyɩ.
25‑Masa, ka a -mlɔa 'lɛ 'bhlabhlɩ 'bhisa, ‑ma ‑pɔtɔnʋ, a yanɩ ala kpanyɔa ɩya ala ‑bɛnyɔa 'klʋ ‑tla.
Currently Selected:
1 Pɩɛ 2: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.
