1 Pɩɛ 4

Aya nyinyi ‑sasalɩ cɩ

1Na, kwlɩ ya 'lɛ Klisi bhɩa ɔla 'nyɛkɛa nɩkplaan na, anyɩ ‑masɛɛ, 'naa wɔɔgugwie ‑naa ‑sakasaka 'plɩ ala tavʋlʋʋ. ‑Masa ɔmɔa 'kwlɩ ya 'lɛ bhɩa ɔla 'nyɛkɛa nɩkplaan na, ɔya nyinyi 'tanɩ wɔlɩ ‑kalɩ, 2ɩya ɔla jabhʋa nɩkplaan, clɩɩa ɔ cɩ 'kanɩ 'lɛ ɔla 'nyɛkɛa nɩkplaan li na, ɔ 'la kanɩ lɩɩa ncɛlɩ 'la pɔlɩa gɩɩ 'lɛ na ɩla 'sasʋʋn namʋnʋ, ‑ma ɔ 'kanɩ ɩmɩa Laagɔ ‑wa 'lɛ na ɩla 'sasʋʋn namʋnʋ. 3‑Masa ‑godogodoa, a ya ɩmɩa maa ‑ɔ 'ta 'lɛ Laagɔ ‑ci na ‑wa 'lɛ na nʋ. A ya ‑badaaglu li, a ya saa a ‑waa 'lɛ na nʋ, a ya nʋgbu 'mla, a ya pɔɔbhlagbɩ nʋ, a ya nʋmlatlɔnblɩcɩ sapalɩ, a ya ‑zliigʋgwlɛa ‑jlɩmaa tie 'lɛ na gɩlɩ. Na, ɩ ‑kʋnɩ 'nanɩ. 4‑Pɔtɔnʋ, aya maasɔ fa 'tanɩ ‑badaaglu 'kadiea ʋla lisɔmɩa. Ɩmɩ ‑naa ɩ sla maa nikpoo 'nyɩ ma ‑ka 'lɛ anyɩ ‑glaan. 5‑Ma ma cɩ 'kɩɩ ɔmɔa ‑ɔ ‑bhɔsʋa 'lɛ le ‑ɔ ka ‑jajanyaa ɩya 'kua 'tɩtɩpla na, ‑deliin nyɩtɛlɩ. 6‑Masa ɩmɩ ‑naa gbʋ, dɛ 'kua 'titio, Dɩnanɩa* ya 'lɛ maa ‑sɔɔ, ɩya daa 'nyɛkɛa nɩkplaan, ma cɩ 'ka 'lɛ maa 'tɩtɩpla, ncɛlɩ 'la 'sasʋʋn na, 'Wugoa nɩkplaan, ma 'ka jabhʋa nɩkplaan kʋ Laagɔ 'la 'sasʋʋn.

A klalɩklalɩlɩ ‑walʋ nɩkplaan

7Lɩɩa ‑tɛtɛa ɩla bhɩalɩclɩɩa ya cɩmɛ. Na, a namʋnʋ dɩgalɩ nɩkplaan ɩya a cibhlili acɩ 'kʋklasa, ɩya a 'ka mino, ɩya a 'ka bhibhie. 8Saa 'fɩan ɩ cɩ 'ka 'lɛ kʋkʋlʋ na, a wabhawabhalɩ ‑gbɔɔn, sa ‑walʋ ʋ wɔlɩ nyinyi ‑bhutukpa 'kʋ. 9A klaklalɩ ɩya a 'la gbaa wɔlɩ. 10'Naa nclɔɔ nclɔɔ 'ma 'tɛtɩa Laagɔ 'nyɩɔ 'lɛ na ɩya ɔ lobho ɔ 'yea, le Laagɔ 'la 'nyupalɩɛa ‑ɩ ‑kʋ 'lɛ 'ci 'ci na ɩla 'klʋlɩnyaa 'nanɩ. 11Ɩ ‑ka kʋ lebhe nclɔɔ ‑ka nyɩtɛ na, 'naa ɔ nyɩtɛ le ɔ 'ka Laagɔ 'la niwɔlɩa ɔ 'yea solu. Ɩ ‑ka ‑kʋ lebhe nclɔɔ ‑ka lobho na, 'naa ɩ 'plɩlɩ 'tɛtɩa Laagɔ nyɩ 'lɛ na nɩkplaan, ɩya ‑tɛtɛa 'fɩan 'ka Zozi Klisi 'kʋ 'plɩlɩ ɩya ɩ 'ka Laagɔ 'klʋgba, ɔmɔa ‑ɔ nɩnɩ 'lɛ 'klʋagbaa ɩya 'tɛtɩa 'lʋkʋlʋkʋ ɩya 'lʋkʋlʋkʋ na. Ɩ kʋ sɛɛ!

A ŋonu ɩya a sɛ Klisi 'la gbʋ

12N 'nagwiɛcɩnyɩ, a ‑ka gbɩɩnclalɩɛ 'la ‑kosubhukua nɩkplaan ‑kʋ na, ɩ 'la ‑sla anyɩ nikpoo le saa ‑buun -wɔlɩ ŋenia 'lɛ anyɩ na. 13‑Ma 'kwlɩa ‑ɩ bhɩa 'lɛ Klisi na, 'sɛ 'la 'kwlɩ ‑ka anyɩ bhɩada ‑kʋ na, 'naa pɔlɛ 'kʋ mɛma anyɩ ɩya daa ɔla 'klʋagbaa cɩ 'ka 'lɛ ‑zɔnwlʋ na, ‑anyɩ ‑ma a 'ka pɔlɛkʋmɛnɔɔn kʋ ɩya a 'ka ‑jaka nʋ. 14Ɩ ka ‑kʋ lebhe Klisi 'la 'ŋlɩa ɩla gbʋ ma ‑ka anyɩ vla na, a ‑kʋ 'nanɩ, sa 'Klʋagbawugoa, Laagɔ 'la 'Wugoa, ʋ ‑kʋ anyɩ 'kʋ na. 15Ka 'nyɩ 'kwlɩ 'la bhɩa anyɩ sidiin 'la nclɔɔ bhlogbɩɩ, ‑ofi lebhe ɔ ‑glɩ ncaabhlanyɔ, 'winyɔ, ‑abhɔlɛnyɔ ‑aana wɔɔplɩlɩnyɔ. 16‑Ma 'kwlɩ ‑ka nclɔɔ bhɩa, ‑ofi lebhe ɔ ‑glɩ klisi 'la gɩlɩnyɔ* na, ɩ 'la kalɩɔ ‑zo, ‑ma 'naa ɔ ‑gba Laagɔ 'klʋ, ŋlɩ ‑naa 'la gbʋ. 17‑Masa, 'tɩtɩa 'la da ‑ɩ ŋeni 'lɛ, 'nyɩ Laagɔ 'la ‑palʋa 'kʋ ɩ bhɔlʋ 'lɛ. Na, ɩ bhɔlʋnɩ 'lɛ ‑anyɩ 'kʋ na, maa ‑ɔ sa 'lɛ Laagɔ 'la Dɩnanɩa* 'bɩ na, 'nsasa mala bhɩalɩclɩɩa cɩ kɩnɩ 'lɛ kʋkʋlʋ bha? 18'Nyɩ saa Zieziewɔlɩa* bhli 'lɛ 'kʋ na:

Ɩ ‑ka ‑kʋ lebhe 'kʋnylugolunyɔ 'la gbʋʋnsada ‑ka 'tɛbhalɩ na,

'nsasa ‑abhɔlɛnyɔ ɩya nyinyinʋnyɔ 'la daa ɩ cɩ 'kaa 'lɛ

kʋkʋlʋ bha?

19'Sɛ 'la gbʋ 'kʋ na, maa 'kwlɩ bhɩa 'lɛ Laagɔ 'la pɔɔsanʋlɩɛa ɩla gbʋ na, 'naa ma zʋ macɩ ɔmɔa ‑ɔ ‑glɩ 'lɛ Nʋnyɔa ma cɩ 'lɛ ‑delikʋtɛbhalɩ na wlɩɩn, 'nanɩnʋlɩɛ nɩkplaan.

Currently Selected:

1 Pɩɛ 4: NTLD13

Highlight

Copy