Jakobo 2

Temuso bakeñisa sobozi

1Banabahesu, mwa bupilo bwa mina, sina ha mu li balumeli ba Mulen'a luna Jesu Kreste, Mulen'a kanya, mu si ke mwa ezanga ka sobozi. 2Lu hupule kuli mwendi mwa kopano ya mina ku taha mutu wa mufumi ya na ni liseka la gauda, ya apezi liapalo ze nde, mi ku taha hape ni mubotana ya tinile bwaya. 3Ka ku bonisa hahulu likute ku ya apezi hande, mu li ku yena, “A mu nge sipula se sinde, ki seo.” Kono ku mubotana mu li, “Wena, yema,” kapa “Ina fafasi fa bulilo kwatuko a sipula sa ka.” 4Fohe, mu na ni mulatu ka ku eza ketululo mwahal'a mina ni ku fa likatulo ze simuluha fa mihupulo ye maswe.

5Mu teeleze, banabahesu ba ba latiwa! Mulimu u ketile babotana ba ba mwa lifasi mo ku ba bafumi mwa tumelo, ni kuli ba fumane Mubuso w'a sepisize ba ba mu lata. 6Kono mina mu shwaula babotana! Ba ba mi hatelela ni ku mi hohela kwa kuta ki bafumi, nji ha ku cwalo? 7Ki bona ba ba bulela ze maswe ka libizo le linde l'a mi file Mulimu.

8 # Malivi 19.18 Ne mu ka be mu ezize hande, ha ne mu ka buluka Mulao wa Mubuso o fumanwa mwa Mañolo, o li, “Lata wahenu sina m'o itatela.” 9Kono ha mu eza ka sobozi, mu eza sibi, mi Mulao wa Mulimu wa mi atula kakuli mu u tuzi. 10Kakuli mutu nih'a ka buluka litaelo kaufela za Mulao, kono a tula i liñwi feela, u na ni mulatu wa kuli u li tuzi kamukana zona. 11#Mut 20.13, 14; Mul 5.17,18 Kakuli yena ya ize, “U si ke wa buka,” ki yena hape ya ize, “U si ke wa bulaya.” Kamukwaocwalo, niha u sa buki, kono wa bulaya, u tuzi Mulao. 12Kabakaleo, mu bulele mi mu eze sina batu ba ba ka atulwa ka mulao o' ba lukulula. 13Kakuli Mulimu h'a na ku ba ni sishemo h'a ka atula ya si na sishemo. Kono ya na ni sishemo, h'a sabi katulo.

Tumelo ni likezo

14Banahabesu, bunde ki bufi, mutu nih'a ka li, “Ni na ni tumelo,” haiba likezo za hae li sa mu pakeli cwalo? Kana tumelo yeo i ta mu pilisa? 15Lu nge kuli wahabo luna, i ka ba munna kapa musali, a si na liapalo mi a shwile tala. 16Tuso ki ifi ya ku mu bulelela kuli, “U zamaye ka kozo! U y'o futumalelwa, mi u yo ca hande!” mu sa mu fi z'a tokwa ku pila ka zona? 17Ki mona mo i inezi ni yona tumelo. Ha i sa iponahazi ka likezo, i shwile!

18Kono yo muñwi a ka li, “Wena u na ni tumelo. Na, ni na ni likezo.” Ni ka mu alaba cwana, ni li, “Ni bonise mo u ka bela ni tumelo, u si na likezo, mi na, ni ta ku bonisa tumelo ya ka, ka likezo za ka.” 19Kana wa lumela kuli Mulimu ki a li muñwi feela? Ki hande! Mioya ye maswe ni yona i lumela cwalo, mane i ngangamiswa ki sabo. 20Mutu ya si na butali! Kana u bata ku supezwa kuli tumelo ye si na likezo ha i na tuso? 21#Sim 22.1-14; Litu 44.19-21; 1 Mak 2.52 Kukw'a luna Abrahama n'a ezizwe cwañi ya lukile fapil'a Mulimu? I n'e li ka likezo za hae, ha n'a isize mwan'a hae Isaka fa katala. 22Ha si wa bona? Tumelo ya hae ni likezo za hae ne li swalisana hamoho. Tumelo ya hae ya kondiswa ki likezo za hae. 23#Sim 15.6; 2 Lita 20.7; Isa 41.8 Kamukwaocwalo, ze ne ñozwi za ezahala, ze li, “Abrahama a lumela ku Mulimu, mi kabakala tumelo ya hae, Mulimu a mu nga kuli u lukile,” mi a mu biza “mulikan'a hae.” 24Cwale mwa bona kuli mutu u ezwa ya lukile fapil'a Mulimu ka likezo za hae, isiñi feela ka tumelo y'a na ni yona.

25 # Josh 2.1-21 Kwa ba cwalo ni ku lona lihule lani, yena Rahaba. A ezwa ya lukile ki Mulimu kabakala likezo za hae, ka ku amuhela matwela za Majuda, ni ka ku ba kutisa ka nzila i sili.

26Mubili ha u si na moya, u shwile. Ku cwalo ni kwa tumelo. Ha i si na likezo, i shwile.

Currently Selected:

Jakobo 2: Lozi09

Highlight

Copy