Jakobo 3
3
Lulimi
1Banabahesu, ba bañata ku mina ba si ke ba hanelela ku ba baluti. Sina ha mu ziba kuli, luna baluti lu ta atulwa ka tata hahulu ku fita ba bañwi. 2#Litu 5.9-15; 14.1; 28.13-26 Kaufel'a luna lwa fosanga hañata. Mutu ya sa fosi mwa lipulelo za hae kaufela, yo u kondile luli, mi ni ka za mubili u kona ku iswala. 3Lu beya litumo mwa mahanu a lipizi kuli li kone ku lu utwa, mi kamukwaocwalo, lu kona ku li isa ko lu lata kaufela. 4Kapa mu hupule lisepe. Niha li li ze tuna, ze zamaiswa ki moya o maata, li sikululwa ki kahatanyana feela ka kanyinyani, mi li ya kai ni kai ko ba lata bazamaisi ba zona. 5Ki mona mo lu inezi lulimi. Ka bunyinyani bwa lona lu kona ku itumba ka ze tuna.
Mu hupule liangashitu kuli li kona ku ciswa ki kalilonyana feela! 6#Litu 5.13; 28.22 Lulimi lu swana ni mulilo. Ki lifasi la bumaswe. Lu na ni sibaka sa lona mwa mubili wa luna, kono lu sinya butu bwa luna kaufela! Lu yakisa nzila ya bupilo bwa luna kaufela ka mulilo o lu fumani kwa liyangalilo kasibili. 7Mutu u kona ku tapisa libatana za mifuta-futa, linyunywani, ze zamaya ka mba, ni litapi. Mi luli s'a li tapisize kaufela. 8Kono ha ku na mutu ya konile ku tapisa lulimi. Lu maswe, mi ha lu koni ku sikululwa. Lu tezi mabeela a bulaya! 9#Sim 1.26 Lwa lu sebelisa ha lu itumela ku Mulena Ndat'a luna, kono hape lwa lu sebelisa ha lu lwahaka banabahabo luna ba ba bupilwe ka siswaniso sa Mulimu! 10Manzwi a buitumelo ni a matapa, kaufela a zwa kwa mulomo u li muñwi. Banabahesu! Ku si ke kwa ba cwalo! 11Ha ku na siliba mo ku ka kiwa mezi a mande ni a baba! 12Kota ya feiga, banabahesu, ha i koni ku beya liolive. Ni ya veine ha i koni ku beya lifeiga. Kamukwaoswana ha ku na siliba sa mezi a baba se si ka tisa mezi a mande.
Butali bo bu zwa kwa lihalimu
13 #
Litu 19.20-30
Kana ku na ni mutu ya ni ni butali ni kutwisiso mwahal'a mina? A iponahaze ka bupilo bwa hae bo bunde, ni ka likezo ze nde z'a eza ka ku ishuwa ni ka butali. 14Kono haiba lipilu za mina li tezi muna ni buitato, fohe mu si ke mwa ipubeka, ni ku bulela ze lwanisa niti. 15Butali bo bu cwalo ha bu zwi kwa lihalimu, kono ki bwa mwa lifasi. Ha bu zwi mwa moya o munde kono kwa mioya ye maswe. 16Fo ku na ni muna ni buikupuli, ku na ni mifili-fili ni mikwa ye maswe kamukana. 17Haili butali bo bu zwa kwa lihalimu, bona, bu kenile, mi hape bu na ni kozo ni musa ni makeke. Bu na ni sishemo, mi bu tahisa likezo ze nde ka buñata. Ha bu na sishweka nihaiba muipo. 18Peu ye calwa ka kozo, i tahiseza baezi ba kozo ba ba i cezi miselo ye lukile.
Currently Selected:
Jakobo 3: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.