Jakobo 1

Litumeliso

1 # Mat 13.55; Mar 6.3; Lik 15.13; Magal 1.19 Ki na Jakobo, mutanga wa Mulimu ni wa Mulena Jesu Kreste. Ni lumelisa batu ba Mulimu kaufela ba ba hasanezi mwa lifasi kamukana.

Tumelo ni butali

2 # But 3.5, 6 Banabahesu, mu bone kuli ki litohonolo ha mu tahelwa ki mifuta-futa ya miliko. 3Mwa ziba kuli haiba tumelo ya mina i tula muliko, ona muliko wo u tahisa mutundamenyi. 4Kono mu tokomele kuli mutundamenyi wa mina u bonahale hande, mu be ba ba kondile, ku kondelela, ba ba si na se ba tokwile. 5#But 8.20; Litu 51.13, 14 Kono haiba yo muñwi wa mina a tokwa butali, a bu kupe ku Mulimu, ya ta mu fa bona, kakuli Mulimu u fanga batu kamukana ka sishemo ni ka buñata. 6Kono u swanezi ku kupa ka tumelo, a sa bilaeli ni hanyinyani. Ya bilaela u swana ni mandinda a liwate a zamaiswa ni ku kubyaniswa ki moya. 7Mutu ya cwalo, a si ke a hupula kuli u ta amuhela se siñwi ku Mulena. 8H'a na niti, mi wa lika-lika ku z'a eza kaufela.

Bubotana ni bufumi

9Mulumeli wa mubotana u swanezi ku ikuhumusa, Mulimu h'a mu cimbula. 10#Isa 40.6-7 Mufumi cwalo u swanezi ku ikuhumusa, Mulimu h'a mu kutiseza kwatasi, kakuli mufumi u ta sinyeha sina palisa ya mwa naheñi. 11Lizazi li pazula ni mufutumala wa lona mi li cisa simela. Palisa ya nyana, ya wa, mi bunde bwa sona bwa sinyeha. Kamukwaoswana, ni yena mufumi u ta sinyeha h'a nz'a lukisa lika za hae.

Butata ni miliko

12U na ni litohonolo mutu ya tula miliko, kakuli ha s'a tuzi, u ta fiwa bupilo bo bu sa feli, ili mupuzo o sepisizwe ki Mulimu ku ba ba mu lata kaufela. 13#Litu 15.11-20 Mutu h'a likiwa, a si ke a li, “Ki Mulimu ya ni lika.” Kakuli Mulimu h'a koni ku likiwa ki bumaswe, mi hape yena kasibili h'a liki mutu. 14Kono mutu u likiwa ha s'a hohiwa ni ku swasiwa ki takazo ya hae luli ye maswe. 15Cwale, takazo ya hae ha i se i tiile, i tahisa sibi. Mi sibi ha si se si hulile, si zwala lifu.

16Banabahesu ba ba latiwa, mu si ke mwa ipuma! 17Mpo ye nde ni ye lukile kaufela i zwa kwa lihalimu, ku Mulimu Ndate ya ezize maseli a mwa mbyumbyulu, yo ku si na petuho ku yena kapa ya sa cinci. 18Ka ku lata kwa hae u lu file bupilo, ka linzwi la niti, kuli lu be ba pili kwa libupiwa za hae kaufela.

Ku utwa ni ku eza

19 # Litu 5.11 Banabahesu ba ba latiwa, mu hupule se! Yo muñwi ni yo muñwi wa mina a akufele ku teeleza, kono a be bunya kwa ku bulela ni kwa ku nyema. 20Mutu ya nyemile h'a ezi se si lukile fapil'a Mulimu. 21Kabakaleo, mu ambuke ze silafaza kaufela ni likezo ze maswe kamukana. Mu amuhele ka buikokobezo linzwi le li calwa ki Mulimu mwa lipilu za mina, kakuli li kona ku mi pilisa.

22Mu si ke mwa ipuma ka ku teelezanga feela linzwi la Mulimu. Kono mu eze ze mu utwile. 23Kakuli ya teeleza feela linzwi, a sa ezi se si laelwa ki lona, u swana ni mutu ya ipona mwa siiponi mi u bona mw'a inezi. 24Ha s'a iponi, i be wa zamaya, mi kapili u libala mw'a bonahalela. 25Kono ya talimisisa hande mwa mulao o kondile, o lukulula batu, mi a u mamelanga, i si ya teeleza feela ni ku libala, kono ili ya eza se si laelwa ki ona, mutu yo u ta tohonolofazwa ki Mulimu ku z'a eza kamukana.

26Haiba mutu a hupula kuli ki mulumeli, mi a palelwa ku iswala ka lulimi, wa ipuma, mi bulumeli bwa hae ha bu na tuso. 27Bulumeli bo bu hupulwa ki Mulimu Ndate kuli ki bo bu kenile ni bwa niti, ki ku tokomela lindiyala ni limbelwa mwa manyando a bona, ni ku ipabalela ku ze maswe kaufela za lifasi a si na koli.

Currently Selected:

Jakobo 1: Lozi09

Highlight

Copy