Maheberu 4

1Mulimu u lu siyezi sepiso ya ku y'o pumulela ku yena. Cwale a lu sabeñi kuli ku si ke kwa fumanwa nihaili a li muñwi ku mina, ya ka palelwa ku y'o kena mwa pumulo yeo. 2Kakuli lu utwile Litaba ze Nde za bupilo sina bona ba ba ne ba li teñi mwa lihalaupa. Ba utwile litaba zeo, kono ha li si ka ba tusa se siñwi, kakuli niha ba li utwile, ha ba si ka li amuhela ka tumelo. 3#Lipi 95.11 Luna ba ba lumezi, lu ta kena mwa pumulo yeo, y'a n'a bulela Mulimu, h'a li,

“Na nyema, mi na ikonka, na li,

‘Ha ba na ku kena mwa pumulo

ya ka ni kamuta!’ ”

A bulela cwalo, nihaike musebezi wa hae wa ku eza lifasi n'o s'o felile. 4#Sim 2.2 Kakuli, ko kuñwi mwa Mañolo, ku ñozwi cwana bakeñisa lizazi la busupa, “Mulimu a pumula ka zazi la busupa, kwa misebezi ya hae kaufela.” 5#Lipi 95.11 Taba yona yeo, hape i fumanwa kw'a bulela Mulimu kuli, “Ha ba na ku kena mwa pumulo ya ka ni kamuta.” 6Ba ba kalile ku utwa Litaba ze Nde za bupilo ha ba si ka kena mwa pumulo yeo, kabakala ku sa lumela kwa bona. Kono ba teñi ba bañwi ba ba ka lumelelwa ku y'o kena ni ku y'o pumula ni Mulimu. 7#Lipi 95.7-8 Ku bonahala cwalo ka taba ya kuli Mulimu u tomile lizazi le liñwi le li bizwa “Kacenu.” U bulezi za lona mwamulaho a lilimo ze ñata, ka Davida, mi i sa li mwa litimana ze li se li bulezwi, ha kutwi,

“Ha mu utwa linzwi la Mulimu kacenu,

mu si ke mwa tatafaza lipilu za mina.”

8 # Mul 31.7; Josh 22.4 Ku cwalo kakuli kabe Joshua n'a file bana ba Isilaele pumulo, kabe Mulimu n'a si ke a bulela hape za lizazi li sili kasamulaho. 9Hakulicwalo, li sa li teñi lizazi la batu ba Mulimu la ku pumula sina yena ha n'a pumuzi ka la busupa. 10#Sim 2.2 Kakuli mutu kaufela ya kena ku y'o pumula ni Mulimu, u pumula kwa misebezi ya hae sina Mulimu ni yena h'a pumuzi ku ya hae. 11A lu likeñi, ka mo lu konela kaufela, ku y'o kena mwa pumulo yeo. Ku si ke kwa ba ni ya ka palelwa sina ba ba ne ba li mwa lihalaupa, ha ba palelwa ku kena kabakala mañaña a bona.

12Linzwi la Mulimu la pila, mi li maata. Li buhali ku fita sabule ye lozizwe kafa ni kafa. Li punya ku y'o fita fo ku kopanela moya ni pilu, ko ku swalani malukuluhelo ni mooko. Li atula litakazo ni minahano ye mwa pilu ya mutu. 13#But 1.6 Ha ku na s'a ka patelwa Mulimu. Lika kaufela li fa patalaza, li kwahuluzwi. Wa li bona, mi ki ku yena ko lu swanezi ku y'o ikalabela.

Jesu Muprisita yo Mutuna ku fita ba bañwi

14Cwale a lu kumaleleñi mwa tumelo ye lu lumezi ku yona, kakuli lu na ni Muprisita yo Mutuna, yo muhulu, ya il'o fita kwa lihalimu ku Mulimu, yena Jesu Mwan'a Mulimu. 15Muprisita yo Muhulu wa luna h'a palelwi ku lu shwela makeke mwa bufokoli bwa luna. Kwand'a cwalo a swana luna, mi u likilwe mwa lika kaufela, kono h'a si ka eza sibi. 16A lu suteleleñi, ka sepo ye tezi, kwa lubona lwa Mulimu ili lwa sishemo. Kwateñi lu utwelwe butuku, lu shemubiwe, mi lu tusiwe ha lu li mwa butata.

Currently Selected:

Maheberu 4: Lozi09

Highlight

Copy