Maheberu 5

1Muprisita yo muhulu kaufela u ketilwe mwahal'a batu, mi u beezwi ku sebeleza Mulimu mwa sibaka sa bona, ku fa limpo ni litabelo kabakala libi. 2H'a li ya fokola ni yena ka mikwa ye miñata, u kona ku ba ni pilu-telele ku ba ba sa zibi ni ku ba ba fosa. 3#Malivi 9.7 Mi kakuli ni yena kasibili wa fokola, h'a swaneli ku fitisa litabelo za libi za batu feela, kono ni za hae cwalo. 4#Mut 28.1 Ha ku na ya kona ku iketela ili yena likute la ku ba muprisita yo muhulu. Ki ka pizo ya Mulimu feela kuli mutu u ezwa muprisita yo muhulu, sina mw'a n'a inezi Aruni.

5 # Lipi 2.7 Ku cwalo ni ku Kreste. H'a si ka ipa likute la ku ba muprisita yo muhulu ili yena, kono u ketilwe ki Mulimu ya ize ku yena,

“Ki wena mwan'a ka,

ni ku pepile kacenu.”

6 # Lipi 110.4 Mi hape, mokuñwi u ize,

“U ta ba muprisita kuya kuile,

ka mukwa wa Melekisedeke.”

7 # Mat 26.36-46; Mar 14.32-42; Luk 22.39-46 Jesu ha n'a sa pila fafasi, u ezize litapelo ni likupo, ka ku huwa hahulu ni ka ku itilelela ku Mulimu ya n'a kona ku mu pilisa kwa lifu. Mi Mulimu a mu utwa kakuli n'a ikokobelize, ni ku itoboha. 8Niha n'a li Mwan'a Mulimu, u itutile ku utwa ni ku mamela ka manyando a hae. 9Ha s'a ezizwe ya si na koli, a fetuha ya fumanisa ba ba mu utwa kaufela bupilo bo bu sa feli. 10Mulimu a mu yolisa ku ba Muprisita yo Muhulu ka mukwa wa Melekisedeke.

Temuso bakeñisa ku tuhela tumelo

11Ki ze ñata ze ne lu ka bulela ka za taba ye, kono ku tata ku mi taluseza kakuli mu bunya kwa ku utwisisa. 12Nako i ne li teñi ya kuli mu fetuhe baluti, kono nihakulicwalo mu sa tokwa ya ka t'o mi luta lituto za makalelo a litaba za Mulimu. Bakeñisa ku ca lico ze tiile, ku sa tokwahala kuli mu nwe mabisi pili. 13#1 Bakor 3.2 Ya nwa mabisi kaufela i sa li mbututu, ya si ka ba ni zibo ya ze nde ni ze maswe. 14Kono lico ze tiile zona ki za ba bahulu, ba ba se ba na ni zibo ya ku keta bunde kwa bumaswe, kakuli mwa ku keta ko, ku twaela ku ba talifisize.

Currently Selected:

Maheberu 5: Lozi09

Highlight

Copy