Maheberu 3

Jesu ki yo mutuna ku Mushe

1Kabakaleo, bakreste banabahesu, ba ba bizizwe ni mina ki Mulimu, mu talime ku Jesu ya lumilwe ki Mulimu kuli a be Muprisita yo Muhulu wa tumelo ye lu bulela. 2#Lipa 12.7 U sepahalile ku Mulimu ya n'a mu ketezi ku eza musebezi wo, sina Mushe ni yena ha n'a sepahalile mwa ndu ya Mulimu kaufela. 3Mutu ya yaha ndu u fumana hahulu likute ku fita ndu ili yona. Kamukwaocwalo, Jesu u swanelwa ki kanya ye fita ya Mushe kwa butuna. 4Ndu kaufela i na ni ya i yahile, kwa utwahala, mi muyahi wa lika kaufela ki Mulimu. 5Mushe yena, n'a sepahalile mwa ndu ya Mulimu kaufela. N'a li mutanga, ya n'a na ni ku talusa lika ze ne ta bulelwa ki Mulimu ka nako ye taha. 6Kono Kreste u sepahalile, ili Mwana ya busa ndu ya Mulimu. Ndu ya hae ki luna, haiba lu tiiselize mwa tumelo ni mwa sepo ye lu itumba ka yona.

Pumulo ya batu ba Mulimu

7 # Lipi 95.7-11 Kabakaleo, sina m'o bulelela Moya o Kenile,

“Ha mu utwa linzwi la Mulimu kacenu,

8mu si ke mwa tatafaza lipilu za mina

sina mo mu ne mu ezelize

ha ne mu fetuhezi Mulimu,

zazi lani ha mu mu lika

mwa lihalaupa.

9Hona mo, bo kukw'a mina ba ni lika,

mi ba ni tukufaza,

ku bulela Mulimu,

niha ne ba boni misebezi

ye ne ni ezize ka lilimo ze mashumi a mane.

10Kabakaleo, na halifela batu bao, mi na li,

‘Mihupulo ya bona

kamita ya lyangana.

Ha ba si ka ziba mikwa ya ka,

ni kamuta.’

11Na nyema ni ku ikonka, na li,

‘Ha ba sa tola ba t'o pumulela ku na!’ ”

12Banabahesu, mu tokomele kuli ku si ke kwa fumaneha mwahal'a mina mutu wa pilu ye maswe, ye sa lumeli, mane ye ka mu keluseza kwahule ni Mulimu ya pila. 13Kono, kuli ku si ke kwa ba ni ya ka pumiwa ki sibi, mi a tatafale pilu, mu swanezi ku tusana ka zazi ni zazi, sina ha lu ka li “Kacenu” ili lizazi le li lu tama ni mwa Mañolo. 14Kakuli kaufel'a luna lu swalisana ni Kreste, haiba lu tiiseza mwa tumelo ye ne lu na ni yona kwa makalelo.

15 # Lipi 95.7-8 Ku ñozwi cwana kuli,

“Ha mu utwa linzwi la Mulimu kacenu,

mu si ke mwa tatafaza lipilu

sina bo kukw'a mina ha ne ba mu fetuhezi.”

16 # Lipa 14.1-35 Ki bo mañi ba ba ne ba utwile linzwi la Mulimu, mi ba mu fetuhela? Ki bona bao kaufela ba ba zwile mwa Egepita ba zamaiswa ki Mushe. 17Mi Mulimu n'a nyemezi bo mañi lilimo ze mashumi a mane? N'a nyemezi bona ba ba ne ba ezize sibi, mi ba shwela mwa lihalaupa. 18Mi ki bo mañi b'a n'a konkezi Mulimu kuli ha ba na ku y'o pumulela ku yena ni kamuta? N'a konkezi libangoki! 19Mi ki niti lu bona kuli ha ba si ka kona ku kena mwa pumulo yeo, kabakala ku sa lumela kwa bona.

Currently Selected:

Maheberu 3: Lozi09

Highlight

Copy