Maheberu 2

Ku piliswa ko kutuna

1Kabakaleo, lu swanezi ku kumalela hahulu kwa niti ye lu utwile, kuli lu si ke lwa yaululwa. 2Buniti bwa manzwi a' bulezwi ki mangeloi bu bonahalile, mi mutu kaufela ya si ka latelela manzwi ao kapa ku a lumela, u fumani mulatu o n'o mu swanela. 3Cwale lu ta banduka cwañi, haiba lu keshebisa ku piliswa ko kutuna cwana? Ku piliswa ko, ku bulezwi pili ki yena Mulena kasibili, mi ba ba mu utwile, ba lu kolwisize kuli ki niti. 4Zeo li nze li ezahala, Mulimu u tiisize bupaki bwa bona ka liponiso ze maata, ze komokisa, ni limakazo za mifuta-futa. Mane u abile limpo za Moya o Kenile ka mw'a n'a latela yena.

Mueteleli wa batu kwa ku piliswa

5Mulimu h'a si ka fa mangeloi maata a ku busa lifasi le li sa taha le lu bulela ka lona. 6#Lipi 8.4-6 Mane mwa Mañolo yo muñwi u paka kuli,

“Mulimu, mutu ki sika mañi,

kuli u mu hupule?

Mutu ki sika mañi,

kuli u mu babalele?

7U mu beile nakonyana

kwatas'a mangeloi.

U mu file kanya ni likute

le li fiwa malena.

8Mi u mu ezize mubusi

wa lika kamukana.”

Ha kutwi Mulimu u ezize mutu “Mubusi wa lika kamukana” kikuli u beile kwatas'a hae linto kaufela luli, mi ha ku na se si siyezi kwatuko, s'a sa zamaisi. Kono ka nako ye, ha lu boni mutu a busa lika kamukana. 9Kono se lu bona ki se. Jesu u beilwe nakonyana kwatas'a mangeloi, kuli ka sishemo sa Mulimu, a shwele batu kaufela. Mi lwa mu bona cwale ha s'a filwe kanya ni likute kabakala lifu l'a fitile ku lona. 10Kaniti i ne li swanelo kuli Mulimu, ya eza ni ku babalela lika kaufela, a eze kuli Jesu a be ya petehile ka manyando ao a fitile ku ona, kuli a kone ku tisa bana ba bañata mwa kanya ya hae. Kakuli Jesu ki yena ya ba etelela ku ba isa kwa ku piliswa.

11Jesu ya kenisa batu kwa libi za bona, ni bona ba ba keniswa, Ndat'a bona kaufela ki a li muñwi. Kikabakaleo Jesu h'a si na maswabi a ku ba biza banyani ba hae. 12#Lipi 22.22 A li ku Mulimu,

“Ni ta bulela libizo la hao

kwa banyani ba ka.

Ni ta ku lumba mwahal'a nyangela.”

13 # Isa 8.17, 18 Hape a li, “Ni ta beya sepo ya ka ku Mulimu.” Mi hape a li, “Ki na yo, ni bana b'a ni file Mulimu.”

14Cwalehe bana, sina mw'a ba bizeza, ha ba li batu ba nama ni mali, Jesu ni yena a swane ni bona ka ku ikabela butu ni bona. U ezize cwalo kuli ka lifu la hae a felise Satani ya sweli maata a lifu. 15Mi hape n'a bata kuli a lukulule cwalo ba ba ne ba swana sina batanga kaufela kabakala ku saba lifu. 16#Isa 41.8,9 Kwa utwahala kuli h'a si ka t'o tusa mangeloi, kono sina mo ku ñolezwi, “U til'o tusa lusika lwa Abrahama.” 17Kikabakaleo ha n'a swanezi ku ezwa ya swana ni banabahabo mwa mikwa kaufela, kuli a be Muprisita yo Muhulu wa bona ya sishemo, mi ya sepahala mwa sebelezo ya hae fapil'a Mulimu, kuli ka mukwa wo libi za batu li swalelwe. 18Mi cwale, u kona ku tusa ba ba likwa, kakuli yena kasibili u likilwe ni ku nyanda.

Currently Selected:

Maheberu 2: Lozi09

Highlight

Copy