Buka ya Bubeli ya Makabaeusi 13
13
Antiokusi wa Buketalizoho ni Lisiasi ni lifu la Menelausi
1Ka silimo sa mwanda ka mashumi a mane ni ze supile ka ze peli Judeasi ni batu ba hae ba lemuha kuli Antiokusi Eupatori n'a taha ni mpi ye tuna ku t'o lwanisa Judea. 2N'a na ni Lisiasi y'a n'a mu hulisize, ili yena muzamaisi wa muso. Hape n'a na ni mpi ya Magerike ye n'e na ni masole ba mahutu ba likiti ze mwanda ka lishumi ni ba lipizi ba likiti ze ketalizoho ka mianda ye milalu, litou ze mashumi a mabeli ka ze peli ni likoloi ze mianda ye milalu ze na ni lilwaniso ze buhali sina litipa fa mawili.
3Cwale Menelausi a kena ku bona mi ka bupumi bo butuna a susueza Antiokusi ku zwelapili isiñi ka muhupulo wa kuli n'a lwanela naha, kono ili kuli yena a bewe mwa situlo se situna. 4Kono Mulena Mulimu a zusa buhali bwa Antiokusi bakeñisa mutu yo ya maswe. Cwale Lisiasi ha s'a zibisize mulena hande kuli Menelausi ne li yena ya n'a tisa butata bwa mifili-fili yeo kaufela, Antiokusi a laela kuli a isiwe kwa Berea, mi a y'o bulaelwa kwateñi ka mukwa wo ne ba bulaiwa ka ona batu mwa minzi. 5Mwa sibaka seo ne ku na ni tawala ye telele hahulu ye ne eza mapeka a mashumi a mabeli ka a ketalizoho ku ya mwahalimu. Tawala yeo ne i na ni mulola o muñata mwahali mi ne i tungile hahulu mwa maneku kaufela. 6Cwale mutu ufi ni ufi ya n'a swaleha ka mulatu o mutuna wa ku uzwa mwa Tempele, kamba ku zibahala hahulu ka ku ba ni milatu ye miñwi cwalo, n'a nepelwa hona mo. 7Libangoki ne li bulaiwa ka ona mukwa wo, mi ni yena Menelausi mubeteki ya maswe a bulaiwa ka mukwa o cwalo, mane a tokwa litohonolo la ku ba ni kepelo. 8Mi cwale nto ye, ki yona ye n'e mu lukela, kakuli ni yena n'a fosezanga katala kao, mulilo ni mulola wa kona n'e li ze kenile. Cwale ni yena u shwile ka mulola.
Litapelo ni zwelopili ya Majuda kwa Modeini
9Cwale mulena a zwelapili ka muhupulo wa situhu ku t'o nyandisa Majuda ka mukwa o maswe hahulu, mane ku fita lika ze n'e ezizwe ka nako ya ndat'ahe. 10Judeasi h'a utwa cwalo a laela batu ku lapela ku Muñ'a Bupilo, busihu ni musihali, ku kupa kuli ha ku konahala a tuse batu bao ba ba se ne ba bata ku amuhiwa Mulao, naha ya bona, hamohocwalo ni Tempele ye Kenile. 11Hape a tuse ni kuli a si ke a tuhelela batu ba, ba ba sa z'o punyuha, kuli ba hapwe ki banyefuli ba, ba bahedeni. 12Ha ba se ba tamani lipilu kaufela hamoho, kamukan'a bona ba latelela litaelo za hae. Ha ba se ba kupile Muñ'a Bupilo ya musa, ka ku lila, ku sa ca ni ka ku patama fafasi ka mazazi a malalu ka ku tatamana, Judeasi a ba tiisa lipilu, mi a ba bulelela kuli ba itukise. 13Cwale ha s'a lelisanile ni ba bahulu cwalo kwa mukunda, a fumana kuli ba si ke ba litela kuli mane mpi ya mulena i t'o kena mwa Judea ni ku nga muleneñi, kono ba y'o i katanyeza kwahule ni ku feza butata kaufela ka tuso ya Mulimu.
14Cwale a beya linto kaufela mwa mazoho a Mulimu, mi a laela batu ba hae ku lwana ka bundume ku fitela lifu, kuli ba sileleze milao, Tempele, muleneñi, naha ya bona ni bupilo bwa sizo sa bona. A toma mafulo a hae fakaufi ni Modeini. 15A fa batu ba hae linzwi la zibiso le li li, “Lu tula ka Mulimu,” mi cwale yena ni micaha ba ba pilu-tata hahulu, ba ba ketilwe, ba y'o lwanisa tende ya mulena busihu. Mwahal'a mafulo ba bulaya batu ba ba bata ku eza likiti ze peli, mi batu ba hae ba bulaya yona tou ye ne li ye tuna ka ku fitisisa mane ba bulaya ni muzamaisi wa yona. 16Kwa mafelelezo ba kenyeza mafulo kamukana sabo ye tuna hahulu, mane batu ba teñi ba lyangana pili ba si ka kuta ba tuzi. 17Ndwa ye ya fela malungasiku masa h'a patalala ili ka tuso ya silelezo ya Muñ'a Bupilo ya n'a tusa Judeasi.
Antiokusi u lumelelana ni Majuda
(1 Mak 6.48-63)
18Mulena ha s'a boni bundume bwa Majuda, cwale a lika ku lwanisa libaka za bona ka butali. 19A ya kwa Beti-Zuri, muleneñi wa Majuda o n'o silelelizwe ka tata, kono a y'o tulwa maswe, mane a lelekwa a sinyehezwi hahulu. 20Judeasi a lumela lituso ze ne tokwahala kaufela kwa masole ba hae ba mwa lukwakwa. 21Kono munna yo muñwi wa mwa mpi ya Majuda, ya bizwa Rodokusi, a beteka Majuda ka ku zibisa lila likunutu za Majuda. Munna yo a batisiswa mi a swalwa mane a beiwa mwa tolongo. 22Hape mulena a kutela ku ambolisana ni batu ba mwa Beti-Zuri. Cwale ha ba se ba lumelelani ku eza bulikani, a kuta a y'o lwanisa Judeasi ni batu ba hae kono a y'o tulwa maswe. 23Cwale a bulelelwa kuli Filipi, ya n'a siilwe ku talima ka za kwa Antioke, n'a s'a mu fetuhezi. Ha s'a zwafisizwe ki taba yeo, a ambolisana ni Majuda, a taba, mi mane a itama ku lumela mihupulo ya bona ye minde. A lumelelana ni bona, mi a eza ni bona litabelo ni ku kuteka Tempele, hamohocwalo ni ku fa limpo kwa sibaka se si kenile.
24A amuhela Makabaeusi hande ka maoyo. A siya Hegemonidesi mwamulaho ku ba muzamaisi yo muhulu wa ndwa ya naha ya Pitolemaisi mane ku y'o fita kwa naha ya Magerenia. 25Cwale a ya kwa Pitolemaisi. Bañi ba naha ba hana tumelelano yeo, ba nyema hahulu, mane ba bata ku i felisa. 26Lisiasi a yema ka tata ku taluseza batu za tumelelano yeo, a ba kolwisa, a ba kuzisa mi mane ba mu sepa. Cwale a ya kwa Antioke.
Cwale kihona mo ne ku inezi lindwa za mulena ni mw'a n'a palelezwi.
Currently Selected:
Buka ya Bubeli ya Makabaeusi 13: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.