Buka ya Bubeli ya Makabaeusi 14
14
Alusimusi muprisita yo muhulu u kena mwa litaba
(1 Mak 7.1-21)
1Ha ku se ku fitile lilimo ze talu, Judeasi ni ba hae ba utwa kuli Demetriusi mwan'a Selukusi n'a s'a fwekile kwa likamba la Tripolisi a na ni mpi ye tata hahulu ni mpi ya lisepe. 2Ne ba utwa ni kuli n'a s'a ngile naha mi n'a s'a bulaile Antiokusi ni Lisiasi ya n'a mu hulisize.
3Cwale ne ku na ni munna yo muñwi ya bizwa Alusimusi, ya n'a li muprisita yo muhulu kono a isilafaza ka bomu ka ku kopana ni balicaba. U boni kuli ha ku na kw'a n'a ka pilela, kamba ku ba ni mukwa wa ku kutela kwa katala ka ka kenile. 4Kih'a ya ku mulena Demetriusi ka silimo sa mwanda ka mashumi a ketalizoho ni si li siñwi, mi a y'o mu fa kuwani ya bulena ya gauda ni nzalu, hamoho ni mitai ya kota ya olive ye n'e itusiswa mwa Tempele feela. Cwale ka lona lizazi leo a tuhela taba.
5Kono mwamulaho, a fumana sibaka sa mw'a ta zamaiseza mulelo wa bupulumuki bwa hae. Ha s'a bizelizwe ki Demetriusi kwa mukopano wa kuta ya hae ni ku mu buza ka za buitukisezo ni milelo ya Majuda, a alaba, a li, 6“Majuda ba ba bizwa Mahasidea, ha ba zamaiswa ki Judeasi Makabaeusi, ki bona basusuezi ba ba sa zwiseza ndwa pili, mi ba paleliswa muso ku ba ni kozo. 7Kikabakaleo, ha se ni amuhilwe situlo sa ka sa ku ba muprisita yo muhulu, ni tile kwanu cwale, ka mabaka a. 8Libaka la ka le lituna kikuli ne ni na ni lilato la niti ku mulena. Libaka la bubeli kikuli hape ni hupula banabahesu be li bañi ba naha, kakuli sicaba sa luna kaufela si nyanda hahulu bakeñisa mikwa ya bona be se ni talusize. 9Cwale muñ'a ka, ha u se u zibile hande za taba ye, u hupule ku tusa naha ni sicaba sa luna se si nyanda. U eze cwalo ka muhau wa hao o mutuna wo n'o bonisa kwa batu kaufela. 10Kakuli haiba Judeasi a zwelapili ku pila, mubuso ha u na ku ba ni kozo.”
11Cwale Alusimusi ha s'a felize ku bulela pulelo yeo, Balikani ba Mulena kaufela ba ba ne ba toile Judeasi ba fumana sibaka sa ku halifisa Demetriusi kuli a lwanise Judeasi. 12Hona fo, yena a keta Nikanora, ya n'a li muzamaisi wa likuta la litou, ku ba yena yo muhulu wa ndwa ya Judea, mi a mu fundula. 13Cwale a mu laeza ku y'o bulaya Judeasi ni ku hasanya batu ba hae, ni ku beya Alusimusi kuli a be yena muprisita yo muhulu wa Tempele ye tuna ku fita litempele kaufela. 14Bahedeni ba mwa Judea, ba ba ne ba balehile ku saba Judeasi, ba matela ku Nikanora ka muhupulo wa kuli manyando ni ku tulwa kwa Majuda li ta ba tusa ku pila hande.
Nikanora u lumelelana ni Majuda
15 #
1 Mak 7.27-28
Majuda ha ba utwa kuli Nikanora wa taha, ni kuli bahedeni ne ba bata ku ba lwanisa, ba iseleka maluli kwa litoho ni fa mubili. Ba kupa tuso ku yena Mulimu ya tomile ni ku tiisa batu ba hae kuya kuile, ya sa palelwi ni kamuta ku iponahaza kwa batu ba hae ba ba ketilwe ha ba tokwa tuso ya hae. 16Ka litaelo za muzamaisi wa bona ba zwa kapili mwa sibaka mo ne ba inzi, mi ba y'o lwanisa lila za bona kwa munzi o bizwa Desau. 17Simoni mwanahabo Judeasi a lwana ni Nikanora, kono kabakala ku kubukanelwa ki lila kapili a bata ku tulwa. 18Nihakulicwalo, Nikanora, kabakala ku utwa ka za bundume bwa Judeasi ni batu ba hae, ni mo ne ba tiyezi ku lwanela naha ya bona, a saba ku feza taba ka ku lwana. 19Mi cwale a luma bo Posidoniusi, Teodotusi ni Matatiasi kwa Majuda ku y'o kupa kuli ba eze tumelelano ya kozo.
20Judeasi ha s'a tatubile ka tokomelo z'a kupilwe ki Nikanora, a zibisa makuta a hae, mi kakuli kamukan'a bona ne ba na ni muhupulo u li muñwi ba lumela tumelelano yeo. 21Cwale kwa tomwa lizazi la mukopano fo ne ku ka kopanela bazamaisi ba bahulu ku ambolisana kwa mukunda ka za tumelelano yeo. Kwa neku le liñwi ni le liñwi kwa taha koloi, mi litulo za tomwa. 22Kono nihakulicwalo Judeasi a lumela masole ba ba na ni lilwaniso kwa libaka za butokwa za malwanelo, ka ku hupula kuli mwendi lila li ka swana za ba puma, i be za ba lwanisa ka sipundumukela. Bazamaisi bao ba eza mukopano wa bona hande, mane ba fita fa tumelelano. 23Cwale Nikanora a ina mwa Jerusalema mi h'a si ka eza bumaswe mwateñi, mane a zwisa batu ba bañata ba ba ne ba til'o kena ku yena ka nako ya ndwa. 24A ina ni Judeasi hamoho ka nako kaufela, mi a mu lata hahulu luli. 25Mane a mu susueza kuli a nyale mi a be ni bana. Judeasi a nyala, a iketa mi a pila bupilo bo bunde.
Alusimusi u zusa mifili-fili. Nikanora u fumbela Tempele
26Cwale Alusimusi, ha s'a bona kutwano ya banna ba babeli bao mo ne i tiyezi, a nga liñolo le ne li ñozwi tumelelano, a li isa ku Demetriusi. A y'o mu bulelela kuli Nikanora u na ni muhupulo wa ku lwanisa mubuso ni kuli u lela ku beya Judeasi, sila sa mubuso, kuli a be yena ya ka mu yola ku ba yo muñwi wa Balikani ba Mulena.
27Cwale mulena a halifa hahulu ni ku makala bakeñisa litaba za buhata ze cwalo zeo, mi a ñolela Nikanora ku mu bulelela ka za ku sa tabela hahulu kwa hae litumelelano za bona. A mu laela kuli a lumele Makabaeusi kwa Antioke kapili a nz'a tamilwe ka mawenge.
28Liñolo ha li t'o fita ku Nikanora a filikana ni ku komoka hahulu kakuli ne li mu hapeleza ku loba tumelelano ya n'a ezize ni mutu yo Judeasi ya si na mulatu. 29Kabakala kuli ne ku sa konahali kuli mutu a pihisane ni mulena, a litela ku fumana sibaka sa ku mu swala ka butali. 30Kono Makabaeusi a lemuha kuli Nikanora n'a s'a kala ku mu halifela ku fita pili ni mukwa w'a n'a s'a bulela ka ona ku yena ne u li wa mahañi, kiha s'a fumana kuli mukwa o cwalo ne si o munde. Kabakaleo a kopanya batu ba hae ba bañata mi a zwa ku Nikanora.
31 #
1 Mak 7.29-30
Mwamulaho ha s'a lemuha kuli u tuzwi ki Judeasi ka butali, Nikanora a ya kwa Tempele ye tuna ye kenile ka nako ye ne ba eza baprisita litabelo za kamita, mi a y'o ba laela kuli ba mu tiseze Judeasi. 32Ba mu latulela ka ku konka ka luci kuli ne ba sa zibi kw'a n'a inzi mutu yo y'a n'a batahala. 33Kih'a otolola lizoho la hae la bulyo, a supa Tempele mi a konka ka luci, a li, “Haiba mu sa ni tisezi Judeasi a nz'a tamilwe, ni ta lutulula Tempele ya Mulimu ye. Ni ta lutulula ni katala, mi ku sona sibaka se ni ta toma fateñi tempele ya Denisi.” 34Ha s'a bulezi cwalo a ba siya. Baprisita ba nanulela mazoho a bona mwahalimu ku kupa ku yena mulwaneli wa sicaba sa luna mwa ndwa. Tapelo ya bona ne li ye, 35“Oho Mulena, wena ya sa tokwi se siñwi ni hanyinyani, ne ku ku tabisize hahulu kuli ku be ni Tempele mwahal'a luna, ili sibaka sa lubona lwa hao. 36Cwalehe, kikabakaleo wena Mulena, Mulimu ya Kenile, Muñ'a Bupilo wa buhalalehi, u sileleze ndu ye kuya kuile, i si ke ya nyefulwa hape, yona ye, ye sa z'o keniswa.”
Lifu la Razisi
37Cwale Razisi, yo muñwi wa ba bahulu ba mwa Jerusalema, a toiwa ni ku bihiwa ku Nikanora. Ne li mutu ya n'a lata hahulu banabahabo mi n'a latwa hande hahulu, mane kabakala ku luka ni ku sepahala kwa hae n'a bizwa “Ndat'ahe Majuda.” 38Kwa makalelo a petuhelo n'a filwe mulatu kuli n'a yemela hahulu sijuda, mi n'a ipeile mwa kozi kabakala ku tiya ni ku bonisa niti feela. 39Ka ku lata ku bonisa sitoyo sa hae kwa Majuda, Nikanora a luma masole ba ba fitelela mianda i ketalizoho ku y'o swala Razisi. 40N'a hupuzi kuli ka ku mu swala n'a ta be a fokolisize Majuda. 41Cwale masole ne ba se ba bata ku hapa tawala mo ku inzi Razisi, mi ne ba nze ba lwanisa minyako ya lapa ni ku biza ba bañwi kuli ba tise mulilo ba t'o cisa minyako. Razisi, ka ku fumana kuli luli u beilwe ki lila mwahali, a ikwiseza kwa mukwale wa hae. 42A tabela lifu le linde ku fita la ku bulaiwa ki baezalibi ba ba ne ba ka mu nyandisa ni ku mu swabisa ka mukwa o sa swaneli sipepo sa hae.
43Kono h'a itaba cwalo n'a si ka nongisa hande mi hape masole ba bañata ne ba taha, ba mata, ba kenela kwa minyako. Kono cwalo yena a mata fahlimw'a limota mi ka bundume a itatela fafasi mwahal'a masole. 44Kono kabakala kuli ne ba yeukile ku kutela mwamulaho a wela fo ne ku si na mutu. 45Hona fo a nz'a sa pila a halifile hahulu, a yema, mi a mata mwahal'a masole. Mali a nz'a buba, a zwa mwa mañiba a hae a sabisa hahulu, a y'o yema fahalimw'a licwe le li pahami hahulu. 46Cwale niha n'a s'a felezwi ki mali mwa mubili, a hoha mala a hae ka mazoho, a a nepela mwahal'a masole, mi a kupa ku Muñ'a Bupilo ya mu file bupilo ni moya kuli a mu kutiseza zona hape ka zazi le liñwi. Kihona mw'a n'a shwezi cwalo.
Currently Selected:
Buka ya Bubeli ya Makabaeusi 14: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.