Buka ya Bubeli ya Makabaeusi 12
12
Ze ezahezi kwa Jopa ni Jamunia
1Mwamulaho a litumelelano ze ha se li felile, Lisiasi a kutela ku mulena, mi ni bona Majuda ba kutela habo bona, ba y'o lima. 2Kwa bazamaisi ba ndwa mwa lilalo, sihulu bo Timoteasi ni Apoloniusi mwan'a Genaeusi, Hieronimusi hamoho ni Demofono, ku beya yena Nikanora mubusisi yo muhulu wa Sipera, ba hanisa Majuda sibaka sa ku pila hande ka kozo.
3Cwale batu ba bañwi ba mwa Jopa ba eza maswe hahulu ka ku puma-puma Majuda ba ba ne ba pila ni bona. Ba ba mema kuli bona ni basali, hamohocwalo ni bana ba bona, ba kene mwa lisepe ze ne ba lukisize. Ne ku si na poniso ya bumaswe. 4Ye n'e li nto ye ne lumelezwi ki batu kaufela. Majuda ha ba bona cwalo ba lumela, kakuli bona ne ba li batu ba kozo mi ne ba sa hupuli kuli ne ba ta ezwa maswe. Kono ha ba se ba li mwahal'a liwate ba tibiswa kaufel'a bona, mi ne li batu ba ba ne ba fitelela mianda ye mibeli.
5Judeasi, ha s'a utwile za lunya lo lu ezizwe kwa banabahabo, a laela batu ba hae. 6Ha ba se ba kupile Mulimu, yena muatuli yo munde, a lwanisa ba ba bulaile banabahabo. A cisa likamba la Jopa, mi hape a bulaya ni batu kaufela ba ba ne ba sabezi mwateñi. 7Cwale ka ku fumana kuli minyako ya munzi ne i kwalilwe ka tata a zwa, kono a nz'a hupula ku y'o kuta hape ku t'o feleleza ba ba siyezi mwa Jopa.
8Kono a utwa kuli batu ba mwa Jamunia ba lelile ku eza Majuda ba ba ne ba li ku bona ka mukwa o swana. 9A lwanisa ba Jamunia ka nako ya busihu mi a cisa likamba ni lisepe za bona. Musi wa teñi wa ya hahulu mwahalimu mane wa bonahala kwa Jerusalema ili sibaka se si eza libima ze mashumi a mane ka ze supile ni si li siñwi.
Musipili wa ku ya kwa Giliadi
(1 Mak 5.9-54)
10Ha ba se ba siile munzi, mi ba zamaile libima ze peli ku liba ku Timoteasi, Judeasi a lwaniswa ki mpi ya Maarabe ye n'e na ni masole ba mahutu ba likiti ze ketalizoho ni ba lipizi ba mianda i ketalizoho. 11Ya ba ndwa ye tata hahulu ye sabisa, kono ka tuso ya Mulimu ba Judeasi ba tula lila za bona. Cwale bazamai bao, ba ba ne ba tuzwi, ba kupa kozo ku Judeasi ni ku sepisa kuli ba ta mu fa mitapi ni ku tusa Majuda mwa linto kaufela. 12Ka ku lemuha kuli mwendi ne ba ta ba ni tuso ye tuna ku bona mwa mikwa ye miñata, Judeasi a lumela ku ba fa kozo mi ha ba se ba lumelezwi cwalo, Maarabe ba kuta mwa litende za bona.
13Cwale hape Judeasi a lwanisa munzi o muñwi o n'o silelelizwe ka mamota, mi u tezi wa batu ba mishobo-shobo. Libizo la munzi wo n'e li Kasipini. 14Ka ku sepa kuli mamota a munzi wa bona a tiile hahulu ni kuli ne ba na ni lico ni linto ze ñata mwateñi, bona bao ba ba ne ba kwalezwi ba shendaula ni ku seha Judeasi ni batu ba hae. Ba ba lwahaka ni ku ba nyefula hahulu, mane ni ku bulela lika ze maswe-maswe luli ze sa latwi ki Mulimu. 15Kono Judeasi ni batu ba hae ba kupa tuso ku Mulimu, ili yena mubupi wa lifasi kaufela, ya n'a lutuluzi mamota a Jeriko ka nako ya Joshua mi a si na lilutululiso kamba mishini ya ndwa. Cwale kiha ba tubaka limota ka tata. 16Mi ka lilato la Mulimu ba hapa muleneñi ni ku bulaya batu ba bañata hahulu, mane kasa ka ka ne ka likana licika la sibima mwa butuna ka tala hahulu mali, mane haisi ku buba.
Ndwa ya Karinaimi
(1 Mak 5.37-44)
17Cwale ha ba se ba zamaile musipili o eza libima ze mwanda ka mashumi a ketalizoho, ba fita mwa Karakisi ili mwa naha ya Majuda ba ba ne ba bizwa Matobia. 18Ne ba si ka fumana Timoteasi mwa naha yeo kakuli n'a si ka i hapa, haisi feela kuli n'a siile mpi ya hae ye ñwi ye tata hahulu mwa sibaka se siñwi. 19Cwale bo Dositeusi ni Sosipateri, bazamaisi ba babeli ba ndwa ya Makabaeusi, ba ya mi ba y'o yundisa mpi yeo, ye n'e siilwe ki Timoteasi mwa lukwakwa, ye n'e na ni masole ba ba fitelela likiti ze lishumi. 20Haili yena Makabaeusi kasibili a alula mpi ya hae ka makuta ni ku a fa bazamaisi ba ona, mi cwale yena a akufela ku latelela Timoteasi ya n'a na ni makuta a masole ba mahutu ba likiti ze mwanda ka mashumi a mabeli ni ba lipizi ba likiti ze peli ka mianda i ketalizoho. 21Cwale Timoteasi ha s'a zibile kuli Judeasi n'a s'a sutelezi a sabiseza basali, bana ni tutu kaufela kwa sibaka se si bizwa Karinaimi kabakala kuli sibaka seo ne si li tata hahulu kwa ku si beya mwahali bakeñisa bunyinyani bwa libaka za ku sutelela ku sona. 22Likuta la pili la Judeasi li sa bonahala feela, lila za kenwa ki sabo ye tuna hahulu ni ku lyangana, mi ka ponahazo ya tuso ya Mulimu ya bona linto kamukana za hasanela mwa maneku kaufela. Hañata ne ba holofazwa ki bahabo bona ha ne ba nze ba mata-mata kafa ni kafa ni ku ikiñateka kwa mikwale ya bona. 23Judeasi yena a ba lelekisa ka tata, a pumaka baezalibi bao ka mikwale, mane a bulaya batu ba ba likana ku eza likiti ze mashumi a malalu. 24Cwale Timoteasi, yena kasibili, ha s'a hapilwe ki bo Dositeusi ni Sosipateri ni masole ba bona, a kupa ka butali kuli a lukululwe. A li ki yena ya babalela bashemi ba ba bañata, ni ba bañwi ba banabahabo ba mwa maata a hae, ni kuli ki yena feela ya kona ku ba pilisa. 25Cwale kwa mafelelezo a ba kolwisa kuli u ka taleleza sepiso ya hae, ni ku ba kutisa ba iketile hande. Ba mu lukulula kuli ba puluse banabahabo bona.
26Cwale Judeasi a ya kwa Karinaimi ni kwa Atarigatoni, mi a y'o bulaya batu ba likiti ze mashumi a mabeli ka ze ketalizoho.
Ku kuta ka nzila ya Eferoni ni Sitopolisi
(1 Mak 5.45-54)
27Mwamulaho ha s'a tuzi lila ze, a isa mpi ya hae kwa Eferoni, munzi o silelelizwe mw'a n'a pila Lisiasi. Micaha ba ba tiile ne ba yemi kwand'a mamota, mi ba itwanela ka tata. Hape ni mwahali ne ku na ni limishini ni lilwaniso za ndwa ze ñata. 28Kono Majuda bona ba kupa tuso ku Mulimu ya Pahami, ya kona ku hasanya basilelezi kamukana ka maata a hae, ba kena mwa muleneñi, mi ba bulaya batu ba ba ne ba li mwahali ba ba bata ku fita fa likiti ze mashumi a mabeli ka ze ketalizoho. 29Ha ba zwa mo ba liba kwa Sitopolisi ili musipili o eza libima ze mwanda ka mashumi a mabeli ku zwa mwa Jerusalema. 30Kono Majuda ba ba ne ba yahile mwateñi ba kolwisa Judeasi kuli batu ba mwa Sitopolisi ne ba ba pilisa hande hahulu, mi hape ne ba na ni musa hahulu ka linako za manyando a bona. 31Cwale yena ni batu ba hae ba itumela hahulu mi a ba susueza kuli ba swanezi ku ekeza ku tiisa kutwano ya bona ni batu ba hae ka linako ze taha.
Ndwa ya ku lwanisa Gorgiasi
Ba y'o fita kwa Jerusalema pili Mukiti wa Kutulo u si ka ezahala. 32#Mut 23.16 Mwamulaho wa mukiti wo, o bizwa wa Pentekonta, ba yela Gorgiasi, muzamaisi yo muhulu wa mpi wa Maedomo. 33A ba katanyeza a na ni makuta a masole ba mahutu ba likiti ze talu ni ba lipizi ba mianda ye mine. 34Ndwa ha i lwana, Majuda ba sikakañi ba shwa.
35Munna ya n'a bizwa Dositeusi, yo muñwi wa Matobia ya n'a li fa pizi mi ili munna ya maata hahulu, a swala Gorgiasi fa siapalo. A mu hoha-hoha ka tata, a nz'a hupula ku nga sifosi yo a nz'a sa pila, kono yo muñwi wa masole ba lipizi ba Matirasia a shiukela Dositeusi, a mu puma liheta, mi cwale Gorgiasi a punyuha, mi a y'o fita kwa Marisa. 36Cwale kakuli ka yona nako yeo Esidriasi ni likuta ne ba se ba lwanile nako ye telele mi ne ba se ba katezi hahulu, Judeasi a kupa Mulimu kuli a bonise luli kuli ki yena mutusi ni mueteleli wa bona wa ndwa.
37Cwale ka ku huweleza hahulu ni ku bulela manzwi a lipina za ndwa ka puo ya bo kukw'a hae, Judeasi a tula makuta a Gorgiasi.
Sitabelo sa ba ba shwile
38Cwale Judeasi a kopanya makuta a hae mi a ya kwa muleneñi wa Adulami, mi kakuli lizazi la busupa la sunda ne li se li fitile, ba ikenisa ka mukwa wa sizo sa bona mi ba pumula ka la Pumulo mwa sibaka seo. 39Ka le li tatama ba taha ku Judeasi kakuli ki nto ye ne tokwahala kuli ba y'o nga litupu za ba ba ne ba shwile mwa ndwa mi ba y'o bulukwa mwahal'a banabahabo bona, ili mwa mabita a bo kukw'a bona. 40#Mul 7.25 Kono ha ba se ba fumana liunduma mwa pokoto ya yo muñwi ni yo muñwi za milimu ya maswaniso ze ne ba ngile kwa Jamunia, mi ili ze ne ba haniswa Majuda ku ba ni zona ka Mulao, kwa zibahala hande ku mañi ni mañi kuli kikabakaleo ba shwile. 41Cwale kaufel'a bona ba lumba mikwa ya Mulimu, muatuli ya lukile ya bonahaza ze patilwe. 42Kaufela ba lapela ku kupa kuli libi ze ne ba ezize li takulwe kaufela. Ku tuha fo Judeasi ya lukile a bulelela batu ili ku ba eleza hahulu kuli ba ambuke libi, kakuli ne ba se ba iponezi ili bona sibi mo si ezelize ku ba ba ne ba se ba shwile. 43Ku tuha fo a eza koleko ya mali a silivela a eza lidirakima ze bata ku ba likiti ze peli mi a li lumela kwa Jerusalema ku y'o ezisa sitabelo sa swalelo ya libi. Ne li kezo ye nde, ye lukela hahulu, y'a ezize ka ku lumela kuli zuho ya bafu i teñi. 44Kakuli haiba n'a si ke a ba ni muhupulo wa kuli ba ba shwile ba ta zuha hape, ne i ta ba nto ye sa tokwahali hahulu, ni ya bukuba, ku lapelela ba ba shwile. 45Kono haiba n'a hupula ka za mupuzo o mutuna o beezwi ba ba shwela Mulimu, n'e li muhupulo o munde o kenile. Le, ki lona libaka l'a ezelize sitabelo se sa maswabi bakeñisa ba ba shwile kuli ba te ba lukululwe kwa libi za bona.
Currently Selected:
Buka ya Bubeli ya Makabaeusi 12: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.