Buka ya Bubeli ya Makabaeusi 11
11
Milelo ya pili ya Lisiasi
(1 Mak 4.26-35)
1Kapili-pili mwamulaho wa zeo kaufela, Lisiasi y'a n'a hulisize mulena, ya n'a li mwanahabo yena ni yo muhulu wa mubuso, n'a nyemisizwe hahulu ki ze ne ezahalile. 2A kopanya makuta a masole ba mahutu ba ba bata ku eza likiti ze mashumi a supile ka li li liñwi ni mpi ya hae ya lipizi kaufela. A liba kwa Majuda ka muhupulo wa ku y'o hapa Muleneñi o Kenile ni ku u eza sibaka se ba ta pila Magerike. 3N'a hupula ku eza mutelo wa Tempele inge mo ne ku ezahalezi kwa macaba a mañwi, ni ku lekisanga situlo sa muprisita yo muhulu ka silimo ni silimo. 4A tokwa ku isa pilu ka za maata a Mulimu, kono a sepa feela mashumi a likiti za makuta a masole ba mahutu, likiti za masole ba hae ba lipizi, ni litou za hae ze mashumi a supile ka li li liñwi.
5H'a kena mwa Judea, a liba Beti-Zuri, sibaka se si silelelizwe hahulu, se si eza musipili o likana libima ze mashumi a malalu ka ze peli ku zwa mwa Jerusalema, mi a kala ku u lwanisa ka tata. 6Cwale Makabaeusi ni batu ba hae ha ba utwa kuli Lisiasi u kwalezi batu mwa makwakwa, bona ni buñata bwa batu ba huweleza ni ku cipita ili ku kupa Mulimu kuli a ba lumele lingeloi le linde ku t'o tusa Isilaele. 7Yena Makabaeusi kasibili a ba yena wa pili ku nga lilwaniso, mi a susueza ba bañwi ku itombola bupilo bwa bona ku y'o tusa banabahabo bona. Cwale ba tamana hamoho sina mutu a li muñwi. 8Ha ba se ba li fakaufi ni Jerusalema, kwa bonahala mutu ya pahami pizi, a apezi ze sweu, mi a ba etelela a zukuza lilwaniso za gauda. 9Kamukan'a bona ba lumba Mulimu ya musa, mi ba ikutwa bundume mwa lipilu kuli mane ne ba ta kona ku lwanisa, isiñi batu feela, kono ni libatana ze sabisa hahulu, mane ni mamota a lisipi. 10Ba zwelapili ba itukisize hande ba nze ba na ni mutusi wa bona wa kwa lihalimu, kakuli Muñ'a Bupilo n'a s'a ba shemubile. 11Ba kena lila inge litau, ni ku bulaya masole ba mahutu ba likiti ze lishumi ka si li siñwi ni ba lipizi ba sikiti ka mianda ye silezi mi ba tula ba ba ne ba siyezi kamukana. 12Buñata bwa bona bao ba saba ba holofezi, ba si na lilwaniso. Lisiasi, yena, a pila ka lubilo lo lu swabisa maswe.
Lisiasi u eza kozo ni Majuda
(1 Mak 6.56-61)
13Cwale kakuli Lisiasi n'a na ni butali, mi h'a nahana mw'a tulezwi, a lemuha kuli Maheberu ne ba na ni maata kakuli ne ba lwanezwi ki Mulimu ya Maata. 14Kikabakaleo a ba lumela manzwi a ku ba shemba-shemba kuli ba lumelelane ku pilisana hande, mane a ba sepisa kuli u ta kona ku sikulula mulena kuli a be mulikan'a bona. 15Cwale Makabaeusi, ka ku hupula ku tusa batu, a amuhela mulelo wa Lisiasi kakuli mulena n'a lumezi likupo za Majuda kaufela, z'a file Makabaeusi ku Lisiasi mwa liñolo.
16Manzwi a liñolo, le ne li ñolezwi Majuda kaufela ki Lisiasi, ki a, “Ki na Lisiasi. Ni lumelisa Majuda kaufela. 17Lindumeleti za mina, bo Joani ni Abisalomi, ba ni file liñolo la mina ni ku ni kupa kuli ni lumele ka za litaba ze talusizwe mwateñi. 18Linto kamukana ze ne tokwahala ku bihiwa ku mulena ni mu bihezi zona. Ze lukela ku na, ni li lumezi. 19Cwale haiba mu ta kuteka mubuso, na, ni ta eza mo ni ta konela kaufela kwapili ku hulisa zwelopili ya mina. 20Haili ka za litaba kaufel'a zona fo li kuma, ni laezi bayemeli ba mina ni manduna ba ka ku ambolisana ni mina ka zona. 21Ni mi lakaleza bupilo bo bunde hahulu. Kacenu le ki la bumashumi a mabeli ka ka a mane la kweli ya Dioskorosi, ka silimo sa mwanda ka mashumi a mane ni ze supile ka si li siñwi.”
22Liñolo la mulena ne li li cwana, “Ki na Mulena Antiokusi. Ni lumelisa mwanahesu Lisiasi. 23Cwale kakuli ndat'a luna u shwile, takazo ya luna kikuli batu ba ba mwa mubuso ba si ke ba haniswa ku pila ka mikwa ya sihabo bona. 24Lwa utwisisa kuli Majuda ha ba lumeli mulao wa ndat'a luna wa ku kena mwa mikwa ya Sigerike, kono ba lata ku pila ka mukwa wa sizo sa bona, mi ba kupa kuli lu ba lumelele ku buluka milao ya bona. 25Cwalehe, sina ha lu hupuzi kuli batu ba, ba lukuluhe sina ba bañwi, muhupulo wa luna kikuli Tempele i kutisezwe ku bona ni kuli ba pile ka ku latelela mikwa ya bo kukw'a bona. 26Cwalehe, i ta ba musebezi wa hao ku ba lumela manzwi a bulikani, ili kuli ha ba ta ziba mulao wa luna ba te ba be ni sepo ye tiile ni ku zwelapili ka za bupilo bwa bona ba nze ba tabile.”
27Liñolo la mulena kwa sicaba sa Majuda ne li bulela cwana, “Na, Mulena Antiokusi, ni lumelisa ba bahulu ba Majuda hamoho ni bona Majuda kaufela. 28Haiba mwa pila hande, ki hande hahulu, mi mane ki yona nto ye lu mi lakaleza. Luna kwanu kasibili lwa pila hande. 29Lu se lu zibisizwe ki Menelausi kuli mu lakaza ku kutela kwa hae ni ku y'o talima za bupilo bwa mina. 30Kikabakaleo lu tiisa kuli bao kamukana ba ba ta kuta pili kweli ya Zantikusi i si ka fela, ba ta ba ni niti ya ku iketa ba sa sabi se siñwi. 31Majuda ba ce lico za mishobo ye lumelelwa ki milao ya bona sina pili, mi ha ku na wa ku bona ya ta katazwa ka mukwa ufi ni ufi wa mulatu o sa zibwi. 32Cwalehe, ni mi lumela Menelausi ku t'o mi wisa lipilu. 33Mu lumele hande. Kacenu le ki la bulishumi ka a ketalizoho mwa kweli ya Zantikusi mwa silimo sa mwanda ka mashumi a mane ni ze supile ka si li siñwi.”
34Baroma ni bona ba lumela Majuda liñolo le ne li ñozwi cwana, “Luna bo Kintusi Memiusi ni Tite Maniusi, lindumeleti za Baroma, lu lumelisa Majuda. 35Hape luli linto kaufela z'a mi lumelezi Lisiasi, mwanahabo mulena, ni luna lwa li lumela. 36Haili ka za litaba z'a hupuzi ku isa ku mulena, mu ambolisane ka zona hande, mi mu si ke mwa liyeha ku lu lumela mihupulo ya mina ili kuli lu y'o mi fitiseza yona, kakuli lu se lu ya kwa Antioke. 37Mu si ke mwa liyeha ku lu lumela ba ba ta kona ku lu bulelela ka za mihupulo ya mina. 38Mu lumele hande. Kacenu ki la bulishumi ka a ketalizoho mwa kweli ya Zantikusi mwa silimo sa mwanda ka mashumi a mane ni ze supile ka si li siñwi.”
Currently Selected:
Buka ya Bubeli ya Makabaeusi 11: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.