Romanonan 14

No husga bo ruman

1Aseptá un hende ku ta débil den fe i no diskutí kuné tokante opinion personal. 2Un ta haña ku e por kome tur kos, miéntras e otro ku ta débil den fe ta kome bèrdura so. 3Esun ku ta kome tur kos no mester menospresiá esun ku no ta kome tur kos. Anto esun ku no ta kome tur kos no mester kondená e otro, pasobra Dios a aseptá esun akí tambe. 4Ken bo ta pa husga sirbidó di otro hende? Si e para firme òf kai, ta entre e i su Señor. I lo e para firme, pasobra Señor ta hasi esei posibel!

5Tin hende ta haña sierto dia mas importante ku otro dia. Pa otro hende tur dia tin mes balor. Kada ken mester ta konvensí di loke e ta kere! 6Esun ku ta balorá sierto dia mas ku otro dia, ta na honor di Señor e ta hasié; esun ku ta kome tur kos, ta na honor di Señor e ta kome, pasobra e ta gradisí Señor pa loke e ta kome. Esun ku no ta kome tur kos, tambe ta hasié na honor di Señor i e tambe ta gradisí Señor.#Kolosensenan 2:16 7Niun di nos no ta biba pa su mes i niun di nos no ta muri pa su mes. 8Si nos biba, ta pa Señor nos ta biba i si nos muri, ta pa Señor nos ta muri. Ke men, sea ku nos biba òf muri, ta na Señor nos ta pertenesé. 9Pasobra Kristu a muri i ta pa reina komo Señor El a bolbe biba, pa reina tantu riba esnan ku a muri komo riba esnan ku ta na bida. 10Awor abo ku no ta kome tur kos, pakiko bo ta kondená bo ruman? Anto abo ku ta kome tur kos, pakiko bo ta menospresiá bo ruman? Al fin i al kabo nos tur tin ku bai dilanti di Dios pa E husga nos.#2 Korintionan 5:10 11Pasobra tin skibí: ‘Ami Dios bibu, ta hura bo ku tur hende lo hinka rudia pa Mi i proklamá públikamente ku ta Ami ta Dios.’#Isaías 45:23 12Ke men ku kada un di nos mester duna kuenta na Dios di su mes echonan!

No laga bo ruman trompeká

13Awèl, no laga nos sigui kondená otro. Al kontrario, tuma desishon ku bo no ta pone bo ruman trompeká òf kai den piká. 14Mi sa, sí mi ta konvensí komo hende ku ta uní ku Señor Hesus, ku no tin niun kuminda impuru di su mes. Un kos ta impuru solamente si un hende mes hañ'é impuru! 15Anto si loke bo ta kome ta ofendé bo ruman, bo no ta trata ku amor. No laga e echo ku bo ta kome sierto kos, hinka e hende ku Kristu a muri p'e den pèrdishon! 16Ke men, no laga e kos bon ku boso tin haña mal nòmber. 17Pasobra reino di Dios no ta kuestion di loke hende ta kome i bebe, pero di hiba un bida hustu, di tin pas i goso den Spiritu Santu. 18Esun ku sirbi Kristu di e forma akí ta agradá Dios i ta keda bon mirá serka hende.

19P'esei anto nos mester buska ku afan loke ta kontribuí na pas entre ruman i nan kresementu komo komunidat di fe. 20No daña trabou di Dios pa motibu di kuminda! En realidat tur kuminda ta puru, pero ta malu pa kome loke ta un ofensa pa otro hende.#14:20 pero…hende; otro posibel tradukshon: pero ta malu pa un hende kome loke ta bai kontra di su konsenshi 21Ta mihó anto pa apstené di karni, biña òf kualke otro kos ku por pone bo ruman trompeká. 22Laga e fe ku ta pone ku bo por kome tur kos, keda entre abo ku Dios. Felis esun ku su konsenshi no ta remordé, ora e hasi loke ta korekto segun e!#Sirag 14:1 23Pero si un hende duda ku e por kome algu i e kom'é tòg, e ta kulpabel, pasobra e no ta kome ku e konvikshon ku fe ta duna. I tur loke no ta hasí ku e konvikshon ku fe ta duna, ta piká!

Currently Selected:

Romanonan 14: BPK13

Highlight

Copy