Salmo 35
35
SALMO 35
Kai aden, SEÑOR, enemigu ta persiguí mi
Di David.
1SEÑOR, bringa kontra esnan ku ta bringa mi,
ataká mi atakantenan!
2Kohe harnas i eskudo,
lanta, bin yuda mi.
3Saka lansa i hacha di guera
kontra mi enemigunan.
Bisa mi: Mi ta bo Salbador!
4Brongosá i humiliá tur esnan
ku ke kita mi bida;
laga esnan ku ke hasi mi daño
hala atras yen di bèrgwensa.
5Laga nan ta bagas pa bientu,
— SEÑOR su angel nan tras; —
6nan kaminda sea skur i lag'é slep,
— SEÑOR su angel persiguí nan. —
7Sin motibu nan a skonde un buraku
bou di nan reda pa mi;
nan a kob'é pa kohe mi bida
sin ningun motibu.
8Laga desaster sorprendé nan kada un
na un ora inesperá;
laga e reda skondí kohe nan
i nan mes kai den buraku.
9Anto lo mi ta kontentu ku SEÑOR
i lo mi gosa su yudansa.
10Di henter mi alma lo mi bisa: ‘SEÑOR,
ken ta manera Bo?
Abo ku ta libra un hende débil
di unu mas fuerte kuné,
un hende den mesté i un pober
di esnan ku ta eksplotá nan.’
11Testigunan falsu a lanta
puntrando kos ku mi no sa;
12nan a tuma bon hasi malu,
nan a laga mi sin amparo.
13Ami enkambio, ora nan tabata malu,
m'a tuma un saku pa bistí;
mi a mortifiká mi ku ayuno,
m'a resa kada be di nobo.
14Komo si fuera pa un amigu o ruman
mi tabata kana tristu;
manera na luto pa un mama
mi a baha kabes.
15Ma ora mi a trompeká, nan a gosa
i nan a kore bini huntu,
bini huntu pa dal mi di gòlpi,
nan no a kansa di sara mi;
16nan a tèr mi hasi chèrchè di mi,#35:16 nan a tèr…di mi: tradukshon probabel; hebreo no ta kla.
a kou djente kontra mi.
17Kuantu tempu mas, Señor,
Bo ta djis para mira?
Salba mi bida, loke sobra di mi,
di furia feros dje leonnan;
18lo mi gaba Bo den gran asamblea,
i alabá Bo dilant'i multitut.
19No laga mi enemigunan falsu
tuma gustu riba mi,
ni esnan ku ta odia mi sin motibu#Salmo 69:4; Huan 15:25
kinipí wowo ku otro.
20Nan no ta papia asuntunan di pas;
nan plannan traishonero
ta kontra hendenan ketu den pais.
21Nan ta alsa bos kontra mi
i ta bisa: ‘Esta nò!
Nos mes wowo a mira awor!’
22T'Abo a mira, SEÑOR, no keda ketu,
no keda leu fo'i mi, Señor!
23Lanta pa mi haña mi derecho,
Señor mi Dios, pleita mi kaso.
24Abo husga mi segun bo hustisia,
o SEÑOR, mi Dios,
pa nan no tuma gustu riba mi.
25No laga nan pensa den nan mes:
‘Esta bon! Nos a logra!’
i no bisa: ‘Ata nos a gulié!’
26Laga esnan ku ta gosa mi desgrasia
haña bèrgwensa i bira blek;
mare esnan ku a alsa bos kontra mi
keda tapá ku bèrgwensa i konfushon.
27Ma mare esnan ku ke mira mi viktoria
grita di alegria i ta kontentu,
bisando kada be: ‘SEÑOR ta grandi!
E ke pa tin pas pa su sirbiente.’
28Lo mi n' tin boka pa kanta bo hustisia
i pa alabá Bo henter dia.
Currently Selected:
Salmo 35: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
