Salmo 34
34
SALMO 34
SEÑOR ta bon pa esnan ku ta fiel n'E
Di David, ora el a fingi dilanti di Abimelèk di a bira di kabes i Abimelèk a kore kuné di moda ku David a skapa.#1 Samuel 21:13-15
1Mi ke alabá SEÑOR tur tempu,
su alabansa lo no kita fo'i mi boka.
2Mi alma ta gloria den SEÑOR,
laga humildenan bin tende i gosa.
3Kanta grandesa di SEÑOR huntu ku mi,
ban alabá su nòmber tur huntu!
4M'a akudí na SEÑOR: El a skucha mi,
El a libra mi di tur mi temornan.
5Esnan ku fiha riba djE lo bria
i nan kara lo no keda na bèrgwensa.
6Mira, tabatin un hende pober,
el a grita i SEÑOR a skuch'é.
El a libr'é for di tur su problemanan.
7SEÑOR su angel ta tene kampamentu
rònt di nan ku sirbi Dios, pa protegé nan.
8Purba i mira ki bon SEÑOR ta,#1 Pedro 2:3
felis t'esun ku ta skonde serka djE.
9Teme SEÑOR, boso, hende konsagrá n'E,
pasobra esnan ku respet'É
nan no tin falta di nada.
10Leonnan yòn ta pasa hamber i trafat,
ma esnan ku ta buska SEÑOR
no ta falta ningun bendishon.
11Bini, mi yunan, skucha mi:
ami ta bai siña boso
kon boso mester teme SEÑOR.
12Tin hende ku ke biba hopi tempu,
ku ke pasa nan dianan den bon?
13Anto warda bo lenga di maldat
i bo lepnan di papia mentira.
14Hui kos malu, hasi bon,
buska pas, trata di gan'é.
15Bista di SEÑOR ta riba hustunan,
su orea ta atento pa nan gritu.
16SEÑOR ta mira malechornan ku mal wowo,#1 Pedro 3:10-12
pa E kita nan rekuerdo fo'i mundu.
17Hustunan ta grita i SEÑOR ta kontestá nan
i ta libra nan di tur nan problemanan.
18SEÑOR ta serka esnan ku ta kibrá,
E ta salba hende abatí.
19Un hende hustu ta haña hopi sla,
ma SEÑOR ta salb'é di tur esei.
20E ta kuida su wesunan tur,
pa ningun di nan no kibra.#Huan 19:36
21Maldat ta trese morto pa malbadonan,
ken ku odia hende hustu lo pasa su kastigu.
22SEÑOR ta salba bida di esnan ku ta sirbiÉ,
ken ku skonde serka djE lo no haña kastigu.
Currently Selected:
Salmo 34: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
