Hoséas 6
6
Duele falsu
1E pueblo ta bisa:
‘Ban, laga nos ban bèk serka SEÑOR.
El a sker nos,
pero lo E kura nos.
El a dal nos,
pero lo mara ferbant na nos heridanan.#Job 5:18
2Despues di dos dia E ta bolbe laga nos biba,
di tres dia lo E pone nos lanta ariba.
Nos lo biba den su serkania.
3Nos ke stima SEÑOR,
hasi tur esfuerso pa konos'É.
Mes sigur ku di dia ta habri
mes sigur ta ku E ta bini.
E ta bini pa nos manera áwaseru,
manera áwaseru di primavera ku ta muha tera papa papa.’
4SEÑOR ta kontestá:
‘Kiko Mi mester hasi ku bo, Efraim?
Kiko Mi mester hasi ku bo, Huda?
Boso amor ta manera neblina di mainta,
manera serena
ku mainta trempan ta disparsé.
5P'esei pa medio di profetanan Mi a kap boso,
mata boso ku mi palabranan.
Manera lus di solo ta sali,
asina loke Mi ta komprondé bou di derecho a sali na kla.
6Pasobra ta amor Mi ta ferwagt i no sakrifisio,#Mateo 9:13; 12:7
mihó boso konosé Mi di bèrdè komo Dios
ku boso ofresé Mi sakrifisio di kandela.#1 Samuel 15:22; Proverbionan 21:3; Amos 5:22-24; Mikéas 6:6-8
7Pero nan a kibra e aliansa ku Mi,
manera Adam a hasi.
Ta aya nan a bira infiel na Mi:
8na Guilead, e siudat di kriminal,
manchá ku rastro di sanger.
9E saserdotenan ta un trupa di bandidu,
nan ta drumi lur
i ta mata hende riba e kaminda pa Shikem,
nan práktikanan ta bergonsoso!
10Mi a mira kosnan repugnante
serka e pueblo di Israel:
Efraim a bira infiel na Mi,
Israel a hasi su mes impuru.
11Pa bo tambe dia di kosecha lo yega, Huda,
ora Mi trese kambio den suerte di mi pueblo.
Currently Selected:
Hoséas 6: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013