Hoséas 5
5
SEÑOR ta akusá e lidernan di pueblo
1SEÑOR ta bisa:
‘Tende, saserdotenan!
Paga tinu, lidernan di Israel!
Skucha, kas real!
Ta boso ta responsabel pa mantené hustisia,
pero na Mispa boso tabata un trampa pa mi pueblo,
un nèt hanchu habrí riba seru di Tabor;
2boso a koba un buraku hundu pa hende kai aden na Shitim
pero Mi ta bai kastigá boso tur!#5:2 Tradukshon probabel; teksto hebreo di v. 2 no ta kla.
3Mi konosé Efraim,
Mi sa kiko ta pasando na Israel.
Awor ku abo, Efraim, a aktua komo prostituta,
Israel a keda impuru!’
4Nan echonan ta stroba nan
di bai bèk serka nan Dios.
Pasobra inmoralidat a poderá di nan
i nan no konosé SEÑOR mas.
5Israel su orguyo ta testiguá kontra dje,
Israel i Efraim ta trompeká riba nan mes maldat
i huntu ku nan, Huda tambe ta trompeká.
6Ku nan sakrifisionan di karné, kabritu i baka
nan lo buska SEÑOR,
pero nan lo no hañ'É;
El a retirá for di nan.
7Nan tabata infiel na SEÑOR,
pasobra nan a haña yu djafó.
Nan fiesta di Luna Nobo ta trese destrukshon
pa nan i nan kunukunan.
E pueblo ta buska yudansa kaminda robes
8SEÑOR ta bisa:
‘Supla kachu na Guibea,
toka tròmpèt na Rama,
bati alarma na Bet-Awèn!
Benhamin, nan ta kore bo tras.
9Dia Mi bai kastigá,
Efraim ta bira un desierto seku.
Mi desishon ta tumá,
Mi ta anunsi'é bou di e tribunan di Israel.
10Lidernan di Huda ta manera hende
ku ta tuma pais di otro hende hasi di nan;#Deuteronomio 19:14; 27:17; Proverbionan 22:28
Lo Mi basha mi rabia manera un lawin'i awa riba nan.
11A oprimí Efraim,
kibra derecho aya,
pasobra el a skohe pa bai tras di kakushi.
12P'esei Mi ta un postema pa Efraim,
un plèki putrí pa pueblo di Huda.
13Efraim a haña sa ku e tabata malu
i Huda a mira su postema.
E ora ei Efraim a dirigí su mes na Asiria,
manda mensaheronan serka e gran rei.#2 Reinan 15:19; 16:7
Pero e no ta kapas pa kura boso,
e no por kita boso postemanan.
14Pasobra Mi mes, manera un leon Mi ta lanta kontra Efraim,
manera un yu di leon kontra pueblo di Huda.
Mi ta sker nan i Mi ta bai,
Mi ta bai ku nan i ningun hende no ta ranka nan fo'i Mi.
15Mi ta retirá Mi, bai e lugá kaminda Mi ta biba
te ora nan konfesá nan kulpa
i buska Mi.
Den nan apuro nan lo anhelá Mi.’
Currently Selected:
Hoséas 5: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013