Hoséas 7
7
1Na momento ku Mi ke kura Israel,
maldat di Efraim ta sali na kla,
e pikánan di Samaria:
nan ta entretené nan mes ku engaño,
ladronnan ta penetrá drenta den kas,
pafó riba kaya bandidunan ta sakia.
2No ta drenta nan kabes
ku Mi ta keda kòrda nan pikánan.
Mi ta mira nan sosodé Mi dilanti,
nan a keda pegá den nan.’
Kòmplòt kontra nan propio lidernan
3SEÑOR ta bisa:
‘Nan ta hasi rei alegre,
pero ta trama mal plan.
Nan ta dibertí e lidernan,
pero nan palabranan ta engaño.
4Infiel nan ta, nan tur.
Nan ta un fòrnu ku ta keda sendé,
maske e panadero tarda pa pone mas palu
te ora e mansa ku el a mansa reis.
5Pa kolmo dia ku e lidernan a hasi nos rei malu
ku biña tèrko,
e dia ei e ku e gañadónan ei a duna otro man.
6Miéntras nan tabata dun'é homenahe
e traishon tabata kima den nan kurason manera den fòrnu:
henter anochi e ta saka huma,
pero mainta e ta saka vlam manera kandela grandi.#7:6 Tradukshon probabel di v. 4-6; teksto hebreo di e versíkulonan akí no ta kla.
7Nan tur ta manera fòrnu sendé:
nan ta devorá nan lidernan.
Rei tras di rei a kai.
I ningun di nan no ta akudí na Mi.’
Israel ta buska yudansa kaminda robes
8Señor ta bisa:
‘Efraim a meskla su mes ku pueblonan strañero.
E ta manera un kuki ku no a keda ibòltu.
9Strañeronan a kaba ku su forsa,
sin ku el a ripará.
Bieu i gastá el a bira,
sin ku el a ripará.
10Israel su orguyo ta testiguá kontra dje,
pero nan no ta bolbe serka Mi,
nan no ta buska Mi,
apesar di tur loke ta pasa.
11Efraim a bira manera un palomba,
bobo i sin sintí;
nan ta pidi Egipto bin yuda nan,
despues nan ta akudí na Asiria.
12Pero asina nan sali bai,
Mi ta habri mi nèt riba nan.
Mi ta hala nan abou
manera para for di den laria.
Mi ta kohe nan
asina tende zonido di nan trupa.
13Desaster ta warda nan,
pasobra nan a hui bai fo'i Mi.
Destrukshon ta bini riba nan,
pasobra nan a bira infiel na Mi.
Mi a libra nan,
pero nan a gaña Mi.
14Nan no ta invoká Mi di henter nan kurason,
pero riba nan kama nan ta drumi keha
i rogando pa grano i biña
nan ta kòrta nan mes;#7:14 kòrta nan mes: segun algun manuskrito hebreo; e otro manuskritonan hebreo tin: nan ta biba manera strañero#Deuteronomio 14:1; 1 Reinan 18:28
asina nan ta demostrá nan resistensia kontra Mi.
15T'Ami tabata Esun ku a instruí nan
i ku a duna nan brasa forsa,
pero nan ta plania maldat kontra Mi.
16Nan ta akudí na tur hende,
pero ariba, na Mi, si nò;
nan ta inkonfiabel
manera un bog slap.
Egipto lo hasi chèrchè di nan
si nan lidernan muri pa medio di spada,
pasobra nan a maldishoná Mi.’
Currently Selected:
Hoséas 7: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013