2 Korintionan 10

Pablo ta defendé su trabou

1Ami, Pablo, ta hasi un apelashon personal riba boso. Tin papiá ku mi ta mansu ora mi ta serka boso, pero ku mi ta fuerte ora mi ta leu! Wèl, mi ke hasi e siguiente apelashon riba boso den nòmber di Kristu ku ta mansu i bondadoso. 2No pone mi aktua ku man fuerte kontra boso, ora mi bin bishitá boso. Pasobra mi ta pensa ku mi por aktua ku tur konfiansa kontra esnan ku ta bisa ku ta motibu humano ta guia nos. 3Enberdat, nos ta ser humano sí, pero esei no ke men ku nos ta bringa ku arma di e mundu akí. 4E armanan ku nos ta bringa kuné no ta arma humano, pero nan ta kargá ku poder di Dios, kapas pa destruí kualke fòrti! Nos ta tumba argumento falsu 5i kada atake dirigí kontra konosementu di Dios. Nos ta arestá kada pensamentu, pon'é obedesé Kristu. 6Anto unabes ku boso mustra ku boso ta obedesé Kristu kompletamente, nos ta kla pa kastigá tur rebeldia.

7No pèrdè loke ta bon kla for di bista! Si un hende ta pensa ku e ta pertenesé na Kristu, e mester tene kuenta ku nos tambe ta pertenesé na Kristu! 8Por ta mi a broma un tiki di mas ku e outoridat ku Señor a duna nos, pero mi no tin bèrgwensa! Mi a haña e outoridat ei pa yuda boso krese i no pa kibra boso. 9Mi no ke duna impreshon ku ta spanta mi ke spanta boso ku mi kartanan. 10Tin hende ta bisa: ‘Pablo su kartanan ta mashá fuerte i severo, pero ora e personalmente ta huntu ku nos, e no ta impreshoná nos, ni su palabranan no tin nada aden!’ 11Pero esun ku ta papia asina, mester komprondé ku manera nos ta skibi boso ora nos ta leu, asina nos lo aktua ora nos ta serka boso!

12Ta klaro ku nos no ta tribi di pone nos den kategoria di esnan ku ta gaba nan mes ni di kompará nos ku nan. Nan ta bobo, pasobra nan ta midi ku nan mes midí i ta kompará nan mes ku otro. 13Pa loke ta trata nos, nos no ta broma pasa midí. Ta Dios ta Esun ku a fiha kon leu nos trabou mester yega i El a pèrmití nos yega serka boso na Korinte. 14P'esei nos no a pasa nos límite, ora nos a bini serka boso; pasobra nos tabata esnan promé ku a trese e bon notisia di Kristu serka boso. 15Ke men anto ku nos no ta sali for di nos teritorio ni ta broma ku sodó di otro hende, ora nos broma ku boso. Al kontrario, ta nos speransa ku boso fe lo krese i ku nos por tin hopi mas kos di broma kuné, sin pasa e límite ku Dios a fiha pa nos. 16E ora ei nos por hiba e bon notisia na lugá muchu mas leu ku kaminda boso ta, sin broma ku trabou ku otro hende a hasi den e teritorio ei. 17Pero Skritura ta bisa: ‘Laga esun ku ke broma, broma ku Señor!’#Yeremías 9:24 18Pasobra no ta esun ku rekomendá su mes ta ser konsiderá un bon hende, pero esun ku Señor rekomendá.

Currently Selected:

2 Korintionan 10: BPK13

Highlight

Copy