2 Korintionan 9

Donashon pa e rumannan na Hudea

1No ta na nodi pa mi skibi boso tokante yudansa pa e kreyentenan na Hudea. 2Mi sa ku boso ta dispuesto pa yuda i mi ta broma ku boso serka e hendenan na Masedonia; mi a bisa: ‘E rumannan na Gresia ta kla pa yuda for di aña pasá!’ I boso zelo pa yuda a animá mayoria di e hendenan na Masedonia pa duna un man. 3Awor mi ta manda e rumannan akí serka boso pa nos bromamentu ku boso, den e asuntu akí, no resultá enbano. Nos ta manda nan pa enberdat boso pone boso kontribushon kla manera nos a bisa e otronan. 4Pasobra si e hendenan di Masedonia bini huntu ku mi i nan haña ku boso no ta kla, esei lo ta un bèrgwensa pa nos ku a konfia den boso — pa no papia mes di e bèrgwensa ku boso mes lo sinti! 5P'esei mi a haña ta nesesario pa pidi e rumannan akí bai serka boso promé ku mi bini, pa yuda boso prepará e kontribushon ku boso mes a primintí. E ora ei lo ta kla ku ta trata di un donashon generoso i no di algu ku a fòrsa boso pa duna.

6Kòrda bon, e persona ku sembra tiki, ta kosechá tiki! Anto es ku sembra hopi, ta kosechá hopi! 7Tur hende mester duna di akuerdo ku loke nan a disidí di nan kurason, no tristu òf fòrsá, pasobra Dios gusta hende ku ta duna kontentu!#Sirag 35:9 8I Dios por duna boso tur kos na abundansia, ya semper i den tur sentido boso por tin mas ku sufisiente pa boso mes i pa kontribuí ku tur bon obra. 9Manera Skritura ta bisa:

‘E ta un hende ku ta parti ku man lòs pa esnan ku tin mester,

e bon ku e ta hasi lo keda pa semper.’#Salmo 112:9

10Dios ku ta proveé simia pa e sembradó sembra kuné i pan pa hende kome,#Isaías 55:10 lo duna boso simia ku ta multipliká, ya e bon ku boso ta hasi ta bira un kosecha riku. 11Dios ta enrikesé boso den tur kos pa asina boso por ta generoso tur ora. Asina hende lo gradisí Dios pa boso donashon, ku nos ta entregá nan. 12Pasobra e yudansa akí no ta sirbi solamente pa yuda e rumannan den nan nesesidat, pero tambe pa hende gradisí Dios mashá hopi mes. 13E yudansa ku boso ta duna, ta proba bon kla ku boso ta obedesidu na e bon notisia di Kristu ku boso ta profesá. E yudansa ei i e generosidat ku boso a mustra e rumannan ei i tur otro hende, lo pone hopi hende glorifiká Dios. 14Nan lo resa pa boso ku hopi kariño, pasobra Dios a mustra boso su grasia na abundansia. 15Laga nos gradisí Dios pa su regalo ku no por deskribí ku palabra.

Currently Selected:

2 Korintionan 9: BPK13

Highlight

Copy