2 Korintionan 11

Pablo i apòstelnan falsu

1Mare boso por soportá un poko lokura di mi parti! Sí, soportá mi!

2E zelo ku mi ta kuida boso kuné ta bini di Dios mes. Mi a komprometé boso pa kasa ku ún solo hòmber i mi ke hiba boso puru manera un bírgen serka djE; e hòmber ei ta Kristu. 3Mi tin miedu ku meskos ku e kolebra a korumpí Eva#Génesis 3:1-5,13 ku su astusia, boso tambe ta laga korumpí boso i ku boso ta pèrdè boso deboshon sinsero i puru#11:3 i puru: tin manuskrito ku no tin e palabranan akí pa Kristu. 4Mi ta papia asin'akí ku boso, pasobra si un hende bin prediká un ‘Hesus’, diferente for di Esun ku nos a prediká na boso, boso ta kore asept'é i fásilmente boso ta tuma un spiritu òf mensahe ku ta kompletamente diferente for di Spiritu Santu i e bon notisia ku boso a haña serka nos. 5Tòg mi no ta mira kiko e ‘superapòstelnan’ ei di boso tin ku ami no tin! 6Mi por ta un amatùr ora mi ta papia, pero, manera nos a demostrá boso tur na tur sorto di forma, konosementu sí mi tin!

7Ora mi a anunsiá e bon notisia di Dios na boso, mi no a pidi boso niun kontribushon finansiero. Mi a rebahá mi mes pa hasi boso importante. Kisas ta algu malu mi a hasi? 8Pa boso mi a aseptá kontribushon finansiero di e otro iglesianan i ta komo si fuera ta hòrta mi tabata hòrta nan pa por yuda boso! 9Tempu mi tabata serka boso, ku mi a haña mi den pèrtá finansiero, mi no a pidi yudansa di niun hende. E rumannan di Masedonia a proveé den tur mi nesesidatnan.#Filipensenan 4:15-18 Sí, meskos ku mi no tabata un peso pa boso den pasado, lo mi no ta den futuro tampoko! 10Anto mi ta orguyoso di esei, i mes sigur ku e bèrdat di Kristu ta biba den mi, mes sigur ta ku lo mi no laga niun hende na Gresia kita e motibu akí ku mi tin pa broma, fo'i mi. 11Di kon mi ta papia asina? Ta pasobra mi no ta stima boso? Nò, Dios mes sa ku mi ta stima boso!

12Lo mi sigui hasi loke mi ta hasiendo awor akí, ya e ‘superapòstelnan’ ei no ta haña niun motibu pa broma ku nan ta apòstel meskos ku nos. 13E hendenan ei no ta apòstel berdadero; nan ta apòstel falsu ku ta gaña hende i ta presentá nan mes komo berdadero apòstel di Kristu. 14Nada straño! Asta satanas ta presentá su mes komo angel di lus. 15P'esei anto no ta nada ekstraordinario ku su sirbidónan ta presentá nan mes komo sirbidó di hustisia. Finalmente nan lo haña e kastigu ku nan meresé pa nan aktonan.

Pablo su sufrimentu komo apòstel

16Mi ta ripití: niun hende no mester mira mi pa hende loko. Pero si boso hasié tòg, laga mi sigui hasi manera ta hende loko mi ta i broma un poko. 17Loke mi ta bai bisa boso, mi no ta bisa komo sirbidó di Señor, pero mi ta papia manera un hende loko ku ta kere ku e por broma ku su mes kosnan. 18Ya ku tin asina hopi hende ta broma djis pa motibu humano, mi tambe ta hasié. 19Boso mes ku ta pretendé di ta asina sabí, ta soportá hende loko ku mashá grasia! 20Meskos asina boso ta soportá esnan ku ta trata boso manera katibu, abusá di boso, tuma boso hasi kèns, menospresiá boso i bòfta boso den boso kara. 21Ku bèrgwensa mi tin ku atmití ku enberdat ami sí tabata muchu débil pa trata hende di e forma ei!

Pero awor laga mi papia manera hende loko: si tin hende ku por broma ku sierto kos, mi tambe por! 22Nan ta hebreo? Mi tambe! Nan ta israelita? Mi tambe! Nan ta desendiente di Abraham? Mi tambe! 23Nan ta sirbidó di Kristu? Awor sí mi ta papia manera hende loko mes: mi ta mas sirbidó di Kristu ku nan! Mi a traha mas duru, pasa mas tempu den prizòn,#Echonan 16:23 haña mas sla i haña mi hopi bia den peliger di morto! 24Sinku bia e hudiunan a duna mi e kastigu di 39 sla ku karbachi.#11:24 kastigu di 39 sla: e kantidat máksimo di sla ku por a duna un hende segun lei hudiu tabata 40. Pa sigurá ku no ta pasa e kantidat di 40 ei, hudiunan tabata duna 39 sla.#Deuteronomio 25:3 25Tres bia e romanonan a duna mi un halá di sota;#Echonan 16:22 un bia hende a piedra mi.#Echonan 14:19 Tres bia mi a haña mi den un situashon ku barku a kibra i un bia mi a pasa un dia i un anochi riba laman ganchu. 26Mi a pasa den hopi peliger durante mi tantísimo biahenan, esta peliger di riu, di ladron, di parti di mi mes kompatriotanan hudiu#Echonan 9:2 i hende no hudiu.#Echonan 14:5 Tabatin peliger den siudat, den lugá solitario, riba laman i di parti di ruman falsu. 27Mi mester a traha duru i soda; hopi bia mi a keda sin drumi. Mi a sufri hamber i set; hopi bia mi a keda sin kome, sin un dak riba mi kabes i sin sufisiente paña pa mi bisti. 28Anto aparte di tur otro kos, mi tin e peso diario di preokupashon pa e iglesianan. 29Ken ta sinti su mes suak sin ku ami tambe ta sinti suak huntu kuné? Ken ta kai den piká sin ku esei preokupá mi?

30Si ta broma mi mester broma, mi ta hasié ku loke ta demostrá mi debilidat! 31Dios i Tata di nos Señor Hesus sa ku mi no ta gaña; bendishoná ta su nòmber pa semper. 32A sosodé un bia ku e gobernador na Damasko, ku tabata bou di Rei Aretas, a pone guardia na porta di siudat pa arestá mi. 33Pero algun hende a laga mi baha den un makutu, via di un bentana ku tabatin den muraya di siudat i asina mi a skapa di su gara.#Echonan 9:23-25

Currently Selected:

2 Korintionan 11: BPK13

Highlight

Copy