Sirag 8
8
Prudensia den relashon ku otro
1No kuminsá un kaso kontra un hende ku tin influensia;
imaginá bo bo kai den su man.
2No lastra un hende riku hiba dilanti di hues,
pasobra e por paga e testigunan pa nan bai kontra bo
i pone bo pèrdè bo kaso.
Plaka a hinka hopi hende kaba den pèrdishon
i asta reinan el a korumpí.
3No pleita ku un hende ku ta papia manera lora;
no hinka palu bou di kandela.
4No sea demasiado familiar ku un hende sinbèrgwensa,
pa e no zundra bo mama.
5No sigui reprochá un hende ku ta arepentí su piká;
kòrda ku nos tur ta pekadó.
6No menospresiá un hende pasobra e ta bieu;
pasobra por ta nos tambe bira bieu un dia.
7No alegrá bo ku morto di un hende,
kòrda ku ta nos tur mester muri.
8Sigui siñansa di sabionan ku zelo;
studia nan proverbionan ku atenshon.
Pasobra ta di nan bo ta haña instrukshon
i asina bo por presentá dilanti di grandinan.
9No pèrdè e chèns di siña di bieunan
loke nan a tende di nan mayornan.
Pasobra ta di nan bo por siña ta sensato
i duna kontesta na e momento adekuá.
10No duna un hende sin konsenshi chèns pa okashoná desgrasia,
sino lo bo por sende un kandela na kua lo bo por kima bo mes.
11No reakshoná di mas ora un hende hasi bofon di kosnan sagrado,
ta nèt esei e tabata ke.#Proverbionan 9:7
12No fia un hende ku tin mas poder ku bo sèn;
si bo hasié tòg, konsiderá e sèn ei pèrdí.
13No para bòrg fo'i bo forsa;
si bo hasié tòg, konta ku t'abo t'esun ku tin ku paga.#Proverbionan 6:1-2; Sirag 29:14-20
14No entamá un kaso kontra un hues;
pasobra pa motibu di su posishon t'e lo gana e kaso.
15No biaha ku un hende ku ta riska hopi;
e ta pone bo kai di problema den problema,
pasobra semper e ta hasi nèt loke e ke
i e ora ei e ta hinka bo tambe den pèrdishon.
16No pleita ku un hende kabes kayente,
no bai kuné kaminda boso ta so;
e no ta spanta pa mata hende,
i kaminda no tin yudansa e ta dal bo mata.
17No konta un hende kèns bo kosnan íntimo,
pasobra e no ta kapas di warda un sekreto.
18No hasi nada dilanti di un hende straño,
nada ku e no mag weta;
pasobra bo no sa kiko lo e por bai papia despues.
19No habri bo kurason pa tur hende,
lo bo no gosa di esei.
Currently Selected:
Sirag 8: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013