Sirag 7
7
Relashon ku korte
1No hasi malu i lo bo no topa ku malu.
2Keda leu for di piká i piká lo keda leu for di bo.
3No sembra inhustisia; sino un kosecha shete be pió lo sali den e roinan.
4No pidi Dios un puesto kaminda lo bo tin mando,
ni pidi rei un puesto di minister.
5No pretendé dilanti di Dios di ta perfekto,
ni dilanti di rei di ta sabí.
6No ambishoná puesto di hues, si bo no ta basta fuerte
pa kombatí inhustisia di bèrdat,
pasobra un di e grandinan lo por influensiá bo
i lo bo por mancha bo integridat.
7No hasi nada ku ta perhudiká bienestar general,
pa bo no keda mal mirá serka bo kompatriotanan.
8No kometé mesun fayo dos bia;
for di e promé bia ya bo tabata kastigabel.
9No pensa: ‘Dios Altísimo ta aseptá mi ofrendanan sigur,
pasobra ta hopi nan ta.’#Proverbionan 21:27
10No tene miedu di pidi Dios algu
ni keda sin hasi obra di karidat.
11No hasi bofon di hende den pèrtá,
pasobra ta Un tin ku ta rebahá hende i ta als'é atrobe.#1 Samuel 2:7
12No gaña riba bo ruman,
ni tampoko riba bo amigu.
13Bo no mester saka mentira mes;
ta un mal kustumber ku no ta produsí nada bon.
14No papia hopi den reunion di ansianonan
i ora bo ta resa no ripití meskos kada be.#Mateo 6:7
15No repudiá trabou duru ni trabou den kunuku;
esei tambe ta parti di Dios su man kreador.
16No djòin e grupo grandi di mal hende;
kòrda ku Dios no ta tarda pa manda su kastigu.
17Sòru prinsipalmente di kaba ku tur bo orguyo,
pasobra kastigu pa e malechor ta kandela i bichi.#7:17 Hebreo ta añadí: No bisa lihé: 'Esta malora! Lag'é den man di Dios i aseptá su desishon.
Relashonnan personal
18No kambia un amigu pa plaka,
ni un ruman stimá pa e oro di mas fini.
19Si bo por kasa ku un muhé sensato, no pèrdè e chèns ei.
Un muhé amabel tin mas balor ku oro.
20No trata un katibu ku ta kumpli bon ku su trabou, malu
ni tampoko un obrero ku ta hasi su trabou ku dedikashon.
21Apresiá un katibu sensato di henter bo kurason#Levítiko 19:18; Sirag 33:31
i no keda sin dun'é su libertat.#Éksodo 21:2; Levítiko 19:18; Deuteronomio 15:12-15; Sirag 33:31
22Si bo tin bestia di kria, kuida nan!
I si bo tin benefisio di nan, sòru keda ku nan.
23Bo tin yu hòmber? Eduká nan
i siña nan baha kabes for di trempan.
24Bo tin yu muhé? Tira bon bista riba nan
i trata nan poko severo.
25Kasa bo yu muhénan — e ora ei bo a hasi algu bunita —
pero kasa nan solamente ku hòmbernan sensato.
26Bo tin un esposa ku bo ta stima? No kore kuné.
Si bo no ta gusta un muhé, no entregá bo n'e.
27Honra bo tata ku henter bo kurason
i no lubidá bo mama su doló di parto.
28Kòrda ku ta nan bo tin ku gradisí pa bo bida
i kiko abo por duna nan bèk pa loke nan a duna bo?
29Teme Señor di henter bo kurason
i respetá su saserdotenan.
30Stima bo Kreador ku tur bo forsa
i no bandoná su sirbidónan.
31Respetá Señor i honra e saserdote,
dun'é loke ta tok'é, manera a ordená bo:
e promé frutanan di kunuku,
sakrifisio pa pordon di piká,
e partinan di skouder di e bestianan pa sakrifisio,
un parti den tur ofrenda hasí na Dios,
e désimo parti di bo entrada.
32Sea generoso ku hende pober,
e ora ei Dios lo rende pa bo.
33Den bo generosidat bo mester enserá tur hende ku ta na bida,
i inkluí mortonan tambe den e generosidat ei.
34No keda sin bai serka esnan ku ta yora,
i sinti pena di esnan na luto.
35No keda sin bishitá hende malu;
lo bo haña hopi amor bèk p'esei.
36Den tur loke bo hasi pensa riba bo fin,
i den tur eternidat lo bo no hasi piká.
Currently Selected:
Sirag 7: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013