Sirag 14
14
1Felis esun ku no ta malusá su boka
ni tampoko tin remordimentu di su pikánan.#Romanonan 14:22; 1 Huan 3:21
2Felis e hende ku tin un konsenshi ku no ta akus'é
i ku ta perseverá den su speransa.
3Hende pichiri no tin nada na su rikesa
i kiko un hende asina ta hasi ku plaka?
4Esun ku spar di tal manera no tin mashá probecho,
e ta akumulá pa otro
i ta hende straño lo fiesta ku su biennan.#Salmo 39:6; Predikador 6:2; Lukas 12:16-21
5Si un hende ta malu pa su mes
pa ken lo e ta bon?
E no ta gosa ni di su mes biennan.
6Niun hende ta mas malu
ku esun ku ta pichiri ku su mes
i t'e mes mester paga pa e maldat akí.
7I si e duna algu mes, ta pa kibukashon;
despues su avarisia ta sali na kla atrobe.
8Hende pichiri ta mal hende,
ora e weta hende den nesesidat, e ta kita kara.
9Hende haragan nunka no tin basta,
e mal karakterístika ei ta seka tur su sintimentunan.
10Ni pa e mes e no ta kumpra pida pan,
hambrá e ta kai sinta na su mes mesa.
Gosa di bo dia
11Mi yu, si bo tin algu, gosa di dje
i duna Señor e ofrendanan ku ta tok'É.
12Kòrda ku morto no ta duna tempu
i ku bo no sa ki dia t'e dia.
13Promé bo muri hasi bon pa bo amigunan
i duna nan segun bo por.
14No keda sin probechá di un dia felis,
sòru pa bo parti di felisidat no pasa bo bai.#Predikador 5:18
15Tòg ta pa otro hende bo mester laga loke bo a mata kurpa p'e
i nan ta tira lòt riba esei partié ku otro, n' ta bèrdat?
16Duna i kohe i malkriá bo mes,
pasobra den reino di morto no tin nada di gosa mas.#Predikador 9:10
17Tur loke ta bibu ta gasta manera paña
i for di ántes e regla ta konta: Muri mester muri!
18Nos ta manera blachi na un palu yen;
algun ta muri, otro ta spreit.
Meskos asina ta pasa ku hende,
algun ta muri, otro ta nase.
19Tur loke hende traha ta putri bai
i huntu ku e kosnan ei tambe esun ku a traha nan.#Predikador 1:3-4
PROPIO RESPONSABILIDAT DI HENDE
Sabiduria komo bon kompañero
20Felis e hende ku ta meditá riba sabiduria#Proverbionan 8:32-35
i ta hasi esfuerso pa haña konosementu,
21ku ta dirigí su kurason riba kamindanan di sabiduria
i ta reflekshoná riba su bereanan;
22ku ta sali su tras manera un investigadó
i ta vigilá tur su pasonan.
23Ku ta lur dor di bentana di sabiduria
i ta para skucha na su porta.
24Ku ta lanta su kampamentu band'i kas di sabiduria,
i ta bati e pènchinan den su muraya.
25Ku ta lanta su tènt band'i dje
i ta bai biba den un bon kas.
26E ta traha su nèshi den su blachinan
i pasa nochi riba su takinan.
27E ta buska protekshon kontra kalor den su sombra
i keda biba den kas di sabiduria.
Currently Selected:
Sirag 14: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013