Sirag 15
15
1Sí, esun ku ta respetá Señor ta hasi asina,
esun ku aten'é na lei ta haña Sabiduria.
2Sabiduria ta sali top'é manera un mama,
manera un brùit hóben e ta risibié.#Sabiduria 8:2
3E ta dun'é pan di saber pa kome
i awa di konosementu pa bebe.#Proverbionan 9:2-5
4Hende ta lèn riba sabiduria i lo no tambaliá,
konfia riba sabiduria i lo no keda brongosá.#Salmo 25:2
5Sabiduria ta als'é riba su mes amigunan
i dun'é don pa papia den komunidat.
6Lo e ta alegre i kontentu,
sabiduria ta dun'é un nòmber pa semper.#Sabiduria 8:10-15
7Hende sin balor no ta buska sabiduria
i orguyosonan no ta mir'é.
8E ta keda leu for di chèrchadónan
i sakadónan di mentira no tin noshon di dje.
9Hende malbado no ta digno di alab'é,
pasobra Dios no a duna nan sabiduria.
10Ta e sabio ta alab'é;
esun ku tin e por siña otro di dje.
Propio boluntat di hende
11No bisa: ‘Mi piká ta bini di Señor’,#Hakobo 1:13
pasobra Dios no ta hasi loke E ta odia.
12No bisa: ‘E mes ta laga mi kai den piká’,
pasobra E no tin nesesidat di pekadó.
13Señor ta odia tur loke ta detestabel,
i esnan ku ta respet'É tampoko no ta gusta e kosnan ei.
14Ta E a krea hende na kuminsamentu#Génesis 1:27
i a lag'é liber pa tuma su propio desishonnan.
15Si bo ke, bo por kumpli ku mandamentunan di Dios
i keda fiel na loke ta agrad'É.
16Tin kandela i awa poné bo dilanti:
saka bo man pa esun ku bo ke.
17Dilanti di hende tin bida i morto:#Deuteronomio 30:15-20; Yeremías 21:8
esun ku e gusta mas, Señor ta dun'é.
18Señor su sabiduria ta mashá grandi,
su forsa ta tremendo i E ta mira tur kos.
19Su bista ta riba esnan ku ta respet'É;
tur loke hende hasi E sa.#Salmo 33:13-15; Proverbionan 15:3; Sirag 23:19; Hebreonan 4:13
20E no a manda ningun hende hasi maldat
ni a duna pèrmit pa ningun hende hasi piká.
Currently Selected:
Sirag 15: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013