Sirag 12
12
Barka hende, keda tera
1Ora bo hasi bon,
sa pa ken bo ta hasi bon,
i lo bo haña danki pa bo bondat.
2Hasi bon pa bon hende,
lo bo haña bo rekompensa,
si no ta serka dje mes, ta serka Altísimo.
3Esun ku ta pensa maldat so pa hasi
i no ta yuda pober, no meresé ningun bondat.
4Yuda bon hende i no yuda pekadó.
5Hasi bon pa hende humilde,
i no duna mal hende nada!
Neng'é kuminda, no dun'é nada,
sino e por subi bo kabes
i pa kada bondat ku bo hasi p'e,
bo ta haña bo den dòbel tròbel.
6Pasobra Altísimo tambe ta detestá pekadó
i kastigá esnan ku no ta respet'É.
7Yuda bon hende i no yuda pekadó.
Danki di mundu ta pèrla pa porko
8Ora kos ta bai bon
bo no sa ken ta bo amigu;
pero ora kos ta bai malu,
bo ta sa ken ta bo enemigu.
9Ora kos ta bai bon,
ta duel bo enemigu;
ora kos ta bai malu,
bo amigu tambe ta laga bo na kaya.#Sirag 6:10-12
10No konfia bo enemigu nunka,
pasobra su maldat ta manera koper ku ta bira bèrdè.
11Maske e hasi komo si fuera ta mashá humilde e ta
i baha su mes pa bo, no konfia, tene kuidou!
E ta manera un spil di bròns, kon ku lombr'é,
e ta keda ku dewer.#12:11 E ta manera…dewer: tradukshon probabel; griego no ta kla
12No lag'é para band'i bo,
pasobra e ta tumba bo i tuma bo lugá.
No lag'é sinta band'i bo,
pasobra ta na bo lugá e ke sinta
i ora ta lat lo bo ripará ku duele
ku loke mi a papia tabata bèrdat.
13Ken tin duele di un domadó di kolebra si e kolebra mord'é
òf di tur esnan ku ta doma bestia feros?
14Esei ta konta tambe pa hende ku ta anda ku malechor
i ta kai den gara di su maldat.
15E malechor ei ta un ratu asina den bo kompania,
pero ora bo kai e no ta yuda bo lanta.
16Un enemigu tin boka dushi,
pero den su paden e tin gana di tira bo den un buraku.
Wowo di un enemigu ta yen di lágrima,
pero e chèns ku e haña,
gustosamente e ta drama bo sanger.
17Si un desgrasia pasa bo, e t'ei promé ku tur hende,
i bou di e kapa di ta yuda bo e ta pone pia pa bo.
18E ora ei e ta mustra su kara di bèrdè,
di kontentu e ta bati man, hari chikíchikí
i kana papia malu di bo.
Currently Selected:
Sirag 12: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013