Salmo 6
6
SALMO 6
SEÑOR, mi ta kibrá, yuda mi
Pa maestro di kanto. Ku instrumènt di kuèrdè. Na di ocho weis.#6:0 Na di ocho weis; otro posibel tradukshon: Riba lira di ocho kuèrdè Un salmo di David.
1SEÑOR, no kastigá mi den bo rabia,
ai, no suta mi den bo furia.#Salmo 38:1; Yeremías 10:24
2Kompashon, SEÑOR! Mi no tin forsa mas,
SEÑOR, kura mi, mi kurpa ta habraká.
3Sí, mi paden ta tur sobresaltá!
Anto Abo, SEÑOR, — te ki dia?
4Bolbe, SEÑOR, salba mi bida,
libra mi, pasobra Bo ta bon.
5Ningun morto no ta kòrda riba Bo.
Ken ta alabá Bo den reino di morto?#Salmonan 88:10-12; 115:17; Isaías 38:18-19; Sirag 17:27-28; Barug 2:17-18
6Mi ta agotá di keha tantu,
tur anochi mi ta yora riba kama,
mi ta muha mi kusinchi ku lágrima.
7Mi wowonan ta skur di fèrdrit,
nan ta kargá: ta mi opresornan su falta!
8Bai laga mi, hasidónan di maldat,#Mateo 7:23; Lukas 13:27
SEÑOR a tende mi ta yora.
9SEÑOR a skucha mi súplika,
SEÑOR a aseptá mi orashon.
10Ku kuantu bèrgwensa mi enemigunan
lo ta derotá, tur pareu!
Ohalá ku den ún fregá di wowo
nan por retirá di bèrgwensa!
Currently Selected:
Salmo 6: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
