Salmo 7
7
SALMO 7
SEÑOR, husga mi segun bèrdat
Lamento di David, kantá na SEÑOR pa motibu di loke Kush, di tribu di Benhamin, a hasié.
1SEÑOR, mi Dios, serka Bo mi ta buska mi refugio,
libra mi di mi persiguidónan, salba mi;
2djis nan ta kohe mi sker mi na wèrki
manera un leon — i no tin hende pa salba mi.
3SEÑOR, mi Dios, si mi a hasi esaki:
si akaso mi a laga nan susha mi man,
4si mi a paga bondat di mi amigu ku maldat
i laga mi enemigu bai sin dun'é kastigu#7:4 i…kastigu; otro posibel tradukshon: i sin motibu a hasi mi enemigu violensia —
5anto laga e enemigu persiguí i kohe mi,
lag'é tuma mi bida i trapa riba dje
i pone mi alma drumi den tera.
6Lanta ariba, SEÑOR, den bo rabia,
alsa Bo kontra furia di esnan ku ta pèrta mi;
lanta bin yuda mi: Abo so por saka huisio!
7Laga e gran reunion di nashonnan rondoná Bo
i Abo presidí nan for di ariba:#7:7 Abo…ariba; otro posibel tradukshon: bolbe i subi altu riba nan
8SEÑOR ta Hues di nashonnan!
SEÑOR, husga mi segun mi meresé,
konforme mi kondukta ku ta limpi,
di akuerdo ku mi bida inosente.
9Pone un fin na maldat di pekadónan,
ma duna bo sosten na hende hustu;
Bo n' ta sondia kurason i konsenshi,
o Dios, ku ta hustu?#Yeremías 17:10; Revelashon 2:23
10Dios su protekshon ta mi eskudo,
E ta salba hende sinsero;
11Dios ta un Hues hustu, un Dios
ku ta kore riba hende, tur dia.
12Si un hende no ke drecha su bida,
Dios ta mula su spada,
E ta hala bog i ta mek,
13ta drecha armanan mortal kontra dje
i pega punta di flecha na kandela.
14Mira, si un hende konsebí un krímen,
ta barasá di maldat i ta pari mentira,
15ta un buraku el a koba, hasiendo é mas hundu,
ma despues e mes ta kai den e pos ku el a traha.
16E malu ku el a hasi ta kai bèk riba dje,
su violensia ta pone ku e ta kibra su garganta.
17Mi ta alabá SEÑOR, pasobra E ta hustu,
kanta gloria na nòmber di SEÑOR, Esun Altísimo!
Currently Selected:
Salmo 7: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
