Proverbionan 29
29
1Hende ku keda tèrko apesar di korekshon,
n'un momento dado ta haña asin'un kastigu, ku n' tin awa pa lab'é mas.
2Ora hende hustu ta na mando, tur hende ta kontentu;
ora mal hende ta goberná, tur hende ta gruña.
3Un hòmber ku stima sabiduria ta hasi su tata kontentu,
pero un amigu di muhénan di bida ta spat rikesa di su tata.
4Bou di un gobernante hustu ta bai e hendenan bon,
pero un hende ku ta keda eksigí belasting ta kaba ku e pais.
5Ken ku trastia su bisiña,
ta pone un trampa p'e.
6Mal hende ta kai den trampa di su mes piká,
pero hende hustu por kanta i keda kontentu.
7Hende hustu ta tene kuenta ku derechi di hende pober,
mal hende n' ta buska drechi.
8Un chèrchadó por instigá henter un siudat,
pero un hende sabí ta kalma tur emoshon.
9Si un hende sabí hiba un hende bobo dilanti,
e bobo lo ras i hasi chèrchè, ta bochincha so lo tin.
10Hende ku gusta drama sanger ta odia hende honesto,
i ta buska moda di mata nan.
11Hende bobo n' por dominá su rabia,
pero hende sabí sí.
12Un gobernante ku ta bai tras di mentira,
ta daña tur su sirbidónan.
13Tantu hende pober komo su opresor tin e kos akí komun:
ta SEÑOR ta laga nan tur dos mira lus.#Proverbionan 22:2; Mateo 5:45
14Si un rei husga pobernan ku honestidat,
su periodo di gobernashon semper lo ta seif.
15Halá 'i sota i korekshon ta hasi hende sabí;
un mucha lagá pa su kuenta,
ta pone kara di su mama na bèrgwensa.
16Ora mal hende ta bona, piká tambe ta bona,
pero hende hustu lo mira kaida di mal hende.
17Koregí bo yu i l'e laga bo biba trankil,
i duna bo hopi satisfakshon.
18Kaminda profeta n' ta haña revelashon,
e pueblo ta bira pa su kuenta,
felis e pueblo ku ta kumpli ku lei di Dios!
19No por koregí un katibu ku palabra,
pasobra ounke e ta komprondé, e n' ta hasi kaso.
20B'a yega di topa un hende ku ta papia pa loko?
Tin mas speransa p'un hende bobo.#Proverbionan 26:12
21Si un hende malkriá su sirbidó fo'i chikitu,
e sirbidó ta kousa problema na final.
22Hende rabiá ta trese desunion,
i hende ku ta rabia lihé ta hasi hopi piká.
23Hende orguyoso ta kai,
hende humilde ta haña honor.#Mateo 23:12; Lukas 14:11; 18:14
24Kómplise di un ladron ta enemigu di su mes,
pasobra ounke e ta tende maldishon,#29:24 Segun lei e mester papia, pasobra si e no papia, e ta haña kastigu. Mira Levítiko 5:1; Huesnan 17:2. e n' ta duna boka.
25Es ku tin miedu di hende ta pone trampa p'e mes,
es ku konfia den SEÑOR ta seif.
26Hopi hende ta buska oudiensia serka un gobernante,
pero ta serka SEÑOR ta haña hustisia.
27Hende hustu ta detestá hende deshonesto,
mal hende ta detestá hende ku ta sigui Dios.
Currently Selected:
Proverbionan 29: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
