Proverbionan 25
25
1Esakinan tambe ta dichonan di Salomon, ku hendenan den servisio di rei Ezekías, rei di Huda, a kopia.
2Nos ta keda boka habrí ora nos mira kon Dios sa di skonde su kamindanan.
Nos ta keda babuká ora nos mira
kon rei sa di trese kosnan importante na klaridat.
3Altura di shelu,
profundidat di tera
i pensamentu di rei,
no ta kosnan ku hende por penetrá drenta.
4Kita skuma fo'i dje plata, e ora ei e platé por traha un vas mashá bunita. 5Kita mal konsehero for di den bisindario di rei, e ora ei e ta goberná hustu i su trono ta keda firme.
6Sá bo lugá den presensia di rei, no tuma lugá di un dignatario. 7Ta mihó rei bisa bo: ‘Subi bini akí’, ku e humiliá bo den presensia di e dignatario ku bo a mira einan.#Sirag 7:4-6; 13:9-10; Lukas 14:8-10
8No kore hiba loke bo mira dilant'i hues, pasobra otro testigu por desmentí i a lo largu bo n' sa kiko hasi.
9Regla un asuntu ku e persona envolví, pero no usa komo prueba loke un otro hende a konfia bo. 10Pasobra ora sali na kla ku bo n' por warda un sekreto, bo a daña bo mes nòmber i lo bo keda ku bèrgwensa.
11Un bon palabra na e momento eksakto, ta un apel di oro den un skalchi di plata.
12Un skual huisioso i orea ku ta skucha; esun t'un renchi, e otro un kadena di e oro mas puru.
13Manera un refresko riba un dia 'i kosecha ku hopi solo,
un bon mensahero ta pa su doñ'i trabou, e ta dun'é mas ánimo.
14Hende ku ta primintí i no ta kumpli
ta manera nubia i bientu ku tòg n' ta trese áwaseru.
15Pasenshi ta kalma rabia,#25:15 Pasenshi…rabia; otro posibel tradukshon: ku pasenshi ta kalma un lider
palabra suave ta kibra resistensia.
16Si bo a topa algu di kome ku ta dushi, no kome di mas,
p'e no repugná bo pone bo arohá.
17Si bo sa bishitá un konosí, no bai di mas,
p'e no fada ku bo i kuminsá odia bo.
18Lanta falsu testimonio ta mes mortal ku un chikoti, un spada i un hacha skèrpi. 19Es ku den tempu di apuro pone su konfiansa den hende inkonfiabel, ta manera hende ku ke kome ku un djente kibrá òf ku ke kana ku un pia isuek.
20Si bo kana yega yen di alegria serka un hende tristu, ta komo si fuera bo ta kita su paña riba un dia ku ta hasi friu, si fuera bo ta basha binager den un líkido ku ta kontené soda.
21Si bo enemigu tin hamber, dun'é di kome, i si e tin set, dun'é di bebe; 22asina bo ta pone su kara kai di bèrgwensa i SEÑOR lo paga bo.#Romanonan 12:20
23Bientu fo'i nort ta trese áwaseru,
mala lenga, kara rabiá.
24Mihó biba na punta di un dak,
ku den henter un kas, ku un muhé ku ta buska kestion.#Proverbionan 21:9,19
25Bon notisia for di un pais leu,
ta manera awa friu pa un garganta seku.
26Un bròn trubel, un pos venená,
esei ta e hende hustu,
ku ta laga mal hende dikt'é kon e tin ku biba.
27No ta bon pa kome muchu miel,
pero ta un honor pa investigá loke ta difísil.#25:27 ta un honor…difísil: teksto probabel; hebreo no ta kla.
28Manera un siudat sin muraya i eksponé na peliger,
asina t'e hende ku no por dominá su mes.
Currently Selected:
Proverbionan 25: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
