Mateo 4

Hesus ta vense tentashon

(Marko 1:12-13; Lukas 4:1-13)

1Spiritu di Dios a hiba Hesus den desierto pa diabel purba lag'É kai den tentashon.#Hebreonan 2:18; 4:15 2Despues di a yuna kuarenta dia largu, Hesus a haña hamber. 3E tentadó a bini serka djE i bis'É: ‘Si Bo ta Yu di Dios, manda e piedranan ei bira pan!’ 4Hesus a kontest'é: ‘Skritura ta bisa:

“Hende no ta keda na bida

dor di kome pan so;

pa tur kos e ta dependé

di palabra di Dios.” ’#Deuteronomio 8:3

5Despues diabel a bai e siudat santu kunÉ i a pon'É riba e punta di mas altu di tèmpel. 6El a bisa Hesus: ‘Si Bo ta Yu di Dios, benta bo kurpa abou, pasobra tòg Skritura ta bisa:

“Lo E duna su angelnan òrdu tokante Bo;

nan lo karga Bo den nan man,

pa Bo no dal bo pia kontra piedra.” ’#Salmo 91:11-12

7Hesus a kontest'é: ‘Ma Skritura ta bisa tambe: No pone Señor bo Dios na prueba.’#Deuteronomio 6:16

8Tambe diabel a bai ku Hesus riba un seru mashá altu mes kaminda el a mustr'É tur e reinonan di mundu den tur nan grandesa. 9El a bisa Hesus: ‘Si Bo kai na rudia adorá mi, Bo ta haña tur e kosnan akí serka mi.’ 10Hesus a kontest'é: ‘Kita for di mi bista, satanas! Pasobra Skritura ta bisa:

“Señor, bo Dios, so bo mester adorá

i t'E so bo mester sirbi.” ’#Deuteronomio 6:13

11E ora ei diabel a bai lag'É i angelnan a bin sirbiÉ.

Hesus ta kuminsá prediká

(Marko 1:14-15; Lukas 4:14-15)

12Ora Hesus a tende ku nan a entregá Huan i a koh'é prezu,#Mateo 14:3; Marko 6:17; Lukas 3:19-20 El a retirá bai Galilea. 13E no a keda Nazarèt, ma a bai biba na Kafárnao#Huan 2:12 kant'i lago di Galilea, den region di Zebulon i Naftali. 14Asina e siguiente palabranan di profeta Isaías a keda kumplí:

15‘Tera di Zebulon i Naftali,

ruta kant'i laman, region n'e otro banda di Yordan,

Galilea, distrito di pagano.

16E pueblo ku tabata biba den tiniebla

ta mira un lus grandi.

Nan tabata biba den un tera ku skuridat profundo,

pero un lus ta bria riba nan.’#Isaías 9:1-2

17For di e momento ei Hesus a kuminsá proklamá: ‘Bira lomba pa piká, pasobra reino di shelu ta serka.’#Mateo 3:2

Hesus ta yama su promé disipelnan

(Marko 1:6-20; Lukas 5:1-11)

18Hesus tabata kana un bia kantu di lago di Galilea. El a mira dos ruman piskadó, esta Simon, tambe yamá Pedro, i Andreas. Nan tabata tira reda den lago. 19Hesus a bisa nan: ‘Sigui Mi i Mi ta hasi boso piskadó di hende.’ 20Nan no a pèrdè pa gana, mesora nan a laga nan reda para siguiÉ. 21Hesus a sigui kana un poko mas leu i a mira dos otro ruman, Hakobo i Huan, yu di Zebedeo. Nan tabata sintá den boto ta prepará nan reda huntu ku nan tata. Hesus a yama nan i a bisa nan siguiÉ. 22Mesora nan a bandoná e boto i nan tata Zebedeo pa sigui Hesus.

Hesus ta siña e multitut i ta kura enfermo

(Lukas 6:17-19)

23Hesus a biaha rònt Galilea. E tabata duna siñansa den nan snoa, prediká e bon notisia tokante e reino i kura tur enfermedat i malesa ku e pueblo tabatin.#Mateo 9:35; Marko 1:39 24Su fama a plama rònt Siria; nan tabata trese tur hende malu serka djE, tur ku tabata sufri di kualke enfermedat, ku tabata poseé pa demoño, ku tabata kai djimpi i hende ku tabata lam, i E tabata kura nan. 25Mashá hopi hende di Galilea, Dekápolis, Herusalèm, Hudea i e region na otro banda di Yordan tabata sigui Hesus.

Currently Selected:

Mateo 4: PBDC13

Highlight

Copy