Mateo 3

Huan Boutista ta prediká

(Marko 1:1-8; Lukas 3:1-9,15-17; Huan 1:19-28)

1Den e dianan ei Huan Boutista a bini desierto di Hudea pa prediká 2i el a bisa: ‘Bira lomba pa piká, pasobra reino di shelu ta serka.’#Mateo 4:17; Marko 1:15 3E tabata e hòmber di ken profeta Isaías a bisa:

‘Un hende ta grita den desierto:

Prepará kaminda pa Señor,

hasi kaminda korkobá règt

pa E pasa.’#Isaías 40:3

4Huan tabata bisti paña trahá di lana di kamel i e tabatin un faha di kueru na su sintura.#2 Reinan 1:8 E tabata kome dalakochi i miel di abeha di mondi. 5For di Herusalèm, for di henter e region di Hudea i for di henter e region rònt di riu di Yordan tur hende tabata bini serka dje. 6Nan tabata konfesá públikamente loke nan a hasi malu i e tabata batisá nan den riu di Yordan.

7Ora Huan a mira ku hopi fariseo i saduseo tabata bini serka dje pa batisá, el a bisa nan: ‘Rasa di kolebra,#Mateo 12:34; 23:33 ken a atvertí boso pa boso hui pa e huisio benidero di Dios? 8Mihó boso produsí fruta adekuá pa mustra ku boso a kombertí. 9No pensa den boso mes ku boso ta skapa pasobra boso ta desendiente di Abraham.#Huan 8:33 Ami ta bisa boso: Dios por traha desendiente pa Abraham for di e piedranan ku tin aki. 10Ya a pone machete kla na pia di e palunan pa kòrta tur palu ku no karga bon fruta tira afó den kandela.#Mateo 7:19 11Ami ta batisá boso ku awa ku mira riba boso kombershon, ma Esun ku ta bini despues di mi lo batisá boso ku Spiritu Santu i kandela. E ta mas importante ku mi; mi no ta sirbi ni pa kita su sandalia for di su pia! 12E tin e zefta pa bencha trigo kla den su man i lo E limpia su plenchi di bati trigo. Lo E hunta e trigo den mangasina, ma e bagas E ta kima den kandela ku no ta kaba nunka!’

Boutismo di Hesus

(Marko 1:9-11; Lukas 3:21-22; Huan 1:32-34)

13Den e tempu ei Hesus a bini for di Galilea serka Huan na riu di Yordan pa Huan batis'É. 14Huan ker a stòp E, p'esei el a bis'É: ‘Ta ami mester laga Abo batisá mi, anto Abo ta bini serka mi?’ 15Ma Hesus a kontest'é: ‘Laga bai asina numa, pasobra ta di e forma akí nos mester kumpli ku tur loke ta boluntat di Dios.’ E ora ei Huan a batisá Hesus numa. 16Nèt ora Hesus tabata sali for di awa, shelu a habri p'E i El a mira Spiritu di Dios a baha riba djE manera un palomba. 17A zona un stèm for di shelu: ‘E ta mi Yu stimá; E ta legria di mi kurason.’#Génesis 22:2; Salmo 2:7; Isaías 42:1; Mateo 12:18; 17:5; Marko 1:11; Lukas 9:35

Currently Selected:

Mateo 3: PBDC13

Highlight

Copy