Judit 10
10
Judit ta sali for di siudat
1Despues di a sklama na Dios di Israel, despues di tur e palabranan akí, 2Judit a lanta for di suela, yama su kriá i baha bai den kas, kaminda e tabatin kustumber di keda solamente dia di sabat i dianan di fiesta. 3El a kita su pañanan di rou i di biuda, dal un bon baño, hunta su kurpa ku perfume, habri su kabei i pone un nèt dòrná ku pèrla riba nan. El a bisti e shimis ku e tabata bisti na okashon di fiesta, manera tempu su kasá Manase tabata na bida. 4Despues Judit a bisti sandalia di fiesta, el a dòrna su kurpa ku armbant, koyar, renchi di dede i di orea; enfin ku tur su prendanan. El a drecha su mes dje bunita ei pa hala atenshon i pa sedusí tur hòmber ku mir'é.
5Despues el a pone un tiki hariña di pan, un kuki di figo, algun pan trahá segun leinan di kuminda pa hudiunan, un saku chikí di biña, un butishi di zeta, enfin tur su ekipahe, den un tas i a laga su kriá karga esaki.
6Nan a sali kas bai porta di siudat Betülua, ei nan a haña Uzías i e ansianonan di siudat Kabris i Karmi ta tene warda. 7Ora esakinan a mira Judit, ku su aspekto kambiá i henteramente diferente bistí ku di kustumber, su beyesa a impreshoná nan enormemente i nan a bis'é: 8‘Dios di nos antepasadonan bendishoná bo i laga bo plannan logra pa fama di Israel i gloria di Herusalèm.’ 9Judit a bùig ku rèspèt. Despues el a bisa nan: ‘Laga nan habri porta pa mi, e ora ei mi ta bai hasi loke boso a palabrá ku mi.’ E ora ei nan a pidi e guardianan habri porta pa Judit, manera el a pidi. 10E guardianan a hasi esei. Judit ku su kriá a sali for di siudat. E hòmbernan di siudat a keda wak kon el a baha yega na pia di seru disparsé.
Judit ta pasa pa e kampamentu enemigu
11Judit i su kriá a kana derechitu pasa den e vaye. Aya un guardia delantero asirio a para Judit. 12Nan a arest'é i a interog'é: ‘Di kua pueblo bo ta? Di unda bo ta bini i unda bo ta bai?’ Judit a kontestá: ‘Mi ta un hebreo, mi a bin djòin boso pasobra no ta dura muchu pa mi pueblo kai den boso man. 13Mi ta bai serka Holoferne mes, general di boso ehérsito, pa ami, komo doño di kurpa, dun'é informashon. Den un kòmbersashon personal lo mi mustr'é, kua kaminda e por pasa pa henter e region di seru kai den su man, sin niun di su sòldánan pèrdè su bida.’
14Ora e sòldánan a tend'é papia asina i nan a weta su kara, su beyesa a impreshoná nan enormemente i nan a bis'é: 15‘Loke a salba bo ta ku bo a bini inmediatamente serka nos shon. Bai su tènt, algun di nos lo kompañá bo te ora nan por entregá bo den su man. 16Ora bo ta su dilanti, no tene miedu, kont'é solamente loke bo a kaba di bisa awor ei i lo e trata bo bon.’ 17Nan a skohe shen sòldá ku a eskoltá Judit ku su kriá i hiba nan tènt di Holoferne.
18Henter e kampamentu a kore bini, pasobra e notisia di Judit su yegada a plama rònt. Nan a forma un kren rondó di dje pafó di e tènt, miéntras e tabata warda e momento pa nan present'é na Holoferne. 19Nan tabata atmirá su beyesa i esaki a pone nan haña rèspèt pa pueblo di Israel. Nan a komentá: ‘Ken por menospresiá un pueblo ku muhé asina bunita? Ta lokura pa laga un di nan hòmbernan na bida. Si e israelitanan haña un chèns, nan ta hinka tur hende den nan saku.’ 20E ora ei e guardia personal i e òfisirnan altu di Holoferne a sali for di e tènt i a eskoltá Judit bai paden kuné.
21Holoferne tabata drumí riba su kama bou di un muskitero koló kòrá püs, dòrná ku hilu di oro, esmeralda i piedranan mashá presioso. 22Nan a avisá Holoferne ku Judit a yega. El a sali bini na portal di e tènt. Sirbidónan tabata kana su dilanti ku flambeu riba soporte di plata. 23Ora Holoferne i su hendenan a mira Judit, nan a keda enkantá ku su beyesa. Judit a kai abou na suela pa dun'é honor, pero e sirbidónan di Holoferne a lant'é.
Currently Selected:
Judit 10: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013