Judit 9
9
Judit ta resa
1Tabata nèt na momento ku nan tabata ofresé sakrifisio di sensia pa e anochi ei den kas di Dios na Herusalèm.#Éksodo 30:8; Salmo 141:2 Judit a bùig ku su kara te na suela, stroi shinishi riba su kabes, kita su paña di rou i sklama na bos altu na Señor. 2‘Señor, Dios di mi antepasado, Bo a duna Simeon spada den su man pa e tuma vengansa riba e strañeronan ku a gara un mucha muhé pa nan deshonr'é, saka su bèlnan, abusá di dje, profaná su skochi i kita su honor.#Génesis 34 Maske Bo a bisa: “Nò, no mag hasi e kosnan ei”, tòg nan a hasi nan.
3P'esei Bo a entregá nan hefenan na morto, nan kama a keda papá ku sanger, pasobra nan mes a laga Simeon sedusí nan pa risibí sirkunsishon. Bo a mata nan tur: katibu, prínsipe i e gobernador riba trono. 4Nan kasá Bo a entregá komo botin, nan yu muhénan komo prizonero i tur nan propiedat Bo a duna pa repartí bou di bo pueblo stimá. Pasobra Simeon ku Levi tabata hende ku zelo pa bo kaso. E bèrgwensa di nan famia tabata repugná nan. Nan a sklama na Bo pa Bo yuda nan. O Dios, mi Dios, skucha awor tambe mi orashon, orashon di un biuda!#Deuteronomio 10:18; Salmo 146:9
5Tòg t'Abo ta Esun ku a laga tur e kosnan sosodé e dia ei, promé ku esei i despues tambe. Loke nos ta pasa aden awor tambe i loke ta bini mañan, tur t'Abo a plania.#Isaías 44:6-8 Loke Abo plania ta esei ta sosodé. 6Loke Abo disidí ta presentá su mes Bo dilanti i bisa: “Ata nos akí,” pasobra ya Bo a habri tur bo kamindanan#Salmo 135:6; Isaías 46:9-13 i bo desishon ta keda kumplí.
7Mira kon e asirionan a reuní nan ehérsito ku tur su forsa. Nan ta broma ku nan kabai i ku nan sòldánan di kabayeria i ta blòf ku e man fuerte di nan sòldánan di infanteria. Nan ta konfia riba eskudo i lansa, riba bog i slengu i nan no sa ku t'Abo ta Señor, ku por para asta guera mes; 8Señor ta bo nòmber. Aplastá anto nan ehérsito ku bo poder, kibra nan forsa ku bo furia. Tòg nan tin plan di profaná bo santuario, mancha e tènt kaminda bo presensia ta manifestá i basha bo altá abou ku pata di kabra.#Éksodo 20:25 9Wak nan soberbia, basha bo rabia riba nan, duna ami, un muhé débil, forsa pa mi ehekutá loke mi a plania. 10Laga mi palabranan bunita hiba shon i sirbidó na nan morto i laga mi mata e shon den persona di su sirbidó. Laga man di un muhé aplastá nan arogansia.#Huesnan 4:9,17-22 11Pasobra bo forsa no ta sinta den kantidat grandi i bo dominio no ta dependé di hende violento.#Huesnan 7:2-7; 1 Samuel 14:6 Pero Bo ta Dios di esnan humiliá, Bo ta yudansa di esnan di ménos rekurso, orketa di esnan suak, protektor di esnan desesperá, salbador di esnan sin speransa.
12Dios di mi tata Simeon i Dios di bo pueblo Israel, gobernador di shelu i tera, kreador di awa, rei di henter bo kreashon, skucha mi plegaria. 13Laga mi palabranan engañoso baha manera un gòlpi destruktivo riba esnan ku ta plania maldat kontra bo aliansa, kontra bo tèmpel sagrado, kontra seru di Sion i kontra e pais Israel.#Ester (deuterokanóniko) 4:17s 14Mare henter bo pueblo i tur tribu sinti ku Abo ta Dios, Dios di tur poder i forsa, i ku no tin ningun otro ku ta protegé e pueblo di Israel.’#Isaías 42:8; 43:10-11; 45:22-24
Currently Selected:
Judit 9: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013