Fare sḭ ma 29
29
1Ndu ge ne kuri mḛreya, baŋ tukcuk mbo ban uzi,
a̰me ge ndu gwan ke ne na pe to.
2Swaga ge naa ge dosol ma ne ame gan, naa ke laar saal,
amma swaga ge naa ge sone ma ne ame gan, naa sun ta.
3Ndu ge na laar ne wa̰ zwama ke na bá sḛ tuli,
ndu ge ne wat naa zaab ge kaya ma pe zi, ban na kaŋ kwaɗa ma.
4Gan ge ne kun sarya ge ne na viya̰ go ɗeŋgre na suwal digi,
amma bage ne ame kaŋ siyal gḛ burmi na suwal.
5Ndu ge ne lase na kon,
hul faɗe na koo se.
6Ndu ge sone det faɗe ge na sone ne zi,
ndu ge dosol zon digi ne laar saal.
7Ndu ge dosol kwa eya ge ne naa ge a̰se ma pe kwa,
amma ndu ge sone ne kwarra mbe no to.
8Naa ge kalam ma dun ol suwal diŋ,
naa ge zwama ma hun gool.
9Kadɗa ndu ge zwama ma ne ndu ge daal ke sarya ɗe,
ko na saŋge pore, ko na má̰, ne pool ge ɓol ɗigliya to.
10Naa ge hun siya ma kwane naa ge ɗeŋger ma kwane,
amma naa ge ɗeŋger ma ka ɓyare nama pe ɓyare.
11Daal ben na dwatɗa zum
zwama ndal na ne na sḛ zi.
12Kadɗa gan za̰ fare ge hale ma,
na naa ga̰l ge temel ma pet a saŋge naa ge sone ma.
13Ndu ge a̰se ma ne ndu ge ne ke naa yál a det ya swaga ge ɗu go:
Ago a Bage ɗiŋnedin sḛ hage nama ndwara kwar swaga ne jwak.
14Gan ge ne kun naa ge a̰se ma sarya fareba pal
na muluk pe ɗur se ɗiŋnedin.
15Iyalla ne mḛreya hon naa zwama,
bool ge a ne kan na pe digi hon na ná saaso.
16Swaga ge naa ge sone ma ne kat gḛ sone zuli se.
Amma naa ge dosol ma mbo kwa nama detɗa.
17Mḛre mo vya, mo mbo kat swaga halas,
mo mbo ɓol laar saal ne na ta.
18Swaga ge daalam ne kat to, ɓase ma gá mborra bataraŋ zi,
ndu ge ne koy eya ma ɓol wak busu.
19A mḛre mo̰r ne fare janna baŋ to,
ko na kwa na pe puy, gwan ne na pala se to.
20Kadɗa mo ɓol ndu ge ne sot na wak se yayak ya,
kwa go, ndu ge dale nde nde waɗe na.
21Ndu ge ne ke na mo̰r pe gḛ ne dore ya tek,
mbo hat na taŋgay.
22Laar ol tol gool,
ndu ge juliliya ke sone gḛ.
23Pala ga̰l gwan ne ndu pala se,
amma ndu ge suul mbo ɓol hormo.
24Bage ne zam dagre ne syala, sen tene,
kwa kwa go wak vḛneya ya go, fut na pe zum to#Lev 5:1..
25Sya naa dasana ma vo, hon naa yál,
Amma ndu ge ne kan na saareya ma Bage ɗiŋnedin pal kat swaga halas.
26Naa gḛ a ɓyare doreya ge bama gan ne,
a Bage ɗiŋnedin ɗeŋgo kun ndu ge daage sarya be vareya ne.
27Naa ge dosol ma ndil naa ge ya̰l ma kaŋ senna,
naa ge sone ma ndil naa ge ɗeŋger ma kaŋ senna.
Currently Selected:
Fare sḭ ma 29: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
