Fare sḭ ma 30
30
Fare sḭ ma ge Agur ne
1Fare janna ge Agur ge Yake vya ne. Na ka̰l ge ne jya̰ Itiyel, ndwara go Itiyel ma ne Ukal no.
2Mbi ndu ge ne waɗe dale ne naa dasana ma buwal zi ne,
mbi ne kwarra ge naa dasana ma ne to pet.
3Mbi be ame zwama to,
mbi kwa Bage mbegeya uzi hini cat kwa.
4A wuɗi ndé mbo digi ya ne ɗo, gwa̰ ya se no ɗaa?
A wuɗi wan saam na tok pul zi ne ɗaa?
A wuɗi zal mam na ba̰r ga̰l wak zi ne ɗaa?
A wuɗi e warbe ge suwar ne ne ɗaa?
Na dḭl gyana ɗaa? Na vya dḭl gyana ɗaa?
Mo kwa na kwa’a?
5Fare ge Dok ne ma pet, a ɗyage ɗyage,
a ɓiyaar ne ne ndu ge ne woy tene na zi pe.
6Ka̰ fare na fare janna ma pal to,
na kaage na mḛre mo ɗo, mo saŋge ndu ge hale to.
7Mbi kaɗe mo kaŋ ma azi,
zḛ tek ge siya gale ne be ge wan mbi, ho̰ mbi nama.
8Abe sone kerra ma ne hale kunna ne mbi ta uzi kaal,
ya̰ mbi kat a̰se ɗaɗa, ko gan njwanjway to,
ho̰ mbi kaŋzam mbyatɗa ɗeŋgo.
9Na kaage huriya zi, mbi sḛ mo to,
ko mbi jya̰ go: «Bage ɗiŋnedin wuɗi ne de» to,
ko woɗegeya zi, mbi mbo syala ɗo,
mbi é mo dḭl vḛneya to.
10Ò mo̰r na bageyal wak zi to,
na kaage na vḛne na wak mo pal ɗo, mo gá ne yál mo pal to.
11Naa a̰me ma vḛne bama wak bama bá ma pal,
a e wak busu bama ná ma pal to.
12Naa a̰me ma ndil ta kwaya̰l,
e no ɗe, a be usi bama sḛ pisil ma uzi to.
13Naa a̰me ma pala ga̰l waɗeya,
a ndil naa ge may ma senna.
14Naa a̰me ma kiya̰r dimma ne kasagar go,
nama kiya̰r-gú ma dimma ne wa̰le go,
ndwara kacage naa ge a̰se ma ne suwal diŋ uzi,
ne naa ge woɗegeya ma ne suwal pal uzi.
Fare sḭ ge kaŋ ma isiya ne
15Po̰me da ne vya gwale ma azi, a jan go: «Ho̰ ya, ho̰ ya.»
Kaŋ ma ya go ataa, a huri to,
kaŋ ma ya go anda, a jan go: «Mbyat ya go!» To.
16A taal ge siya ma ne, gwale ge ne ba̰ gisil,
kyasap, ol, na ge ne jan go: «Mbyat ya go!» To.
17Ndu ge ne cot na bá, ge ne gwan ne na pala na ná pe se to,
ga̰a̰ ge ne maŋgaɗam wak go ma mbo ɓa nama ndwara ma,
Kya̰le ma mbo zam nama.
18Kaŋ ma ya go ataa ge nama fare ne waɗe mbi pal,
ko anda ge mbi ne wan nama pe to:
19A viya̰ pul ge gegelo ne pḭr zi,
a viya̰ pul ge bom ne njal pal,
a viya̰ pul ge fak ga̰l ne maŋgaɗam ga̰l yuwam pul go,
a viya̰ ge ndu son ne her mbo gwale pe zi.
20No a hal ge gwale kaya ne ne:
Ker fare ne ɓà, jan go, na be ke a̰me to.
dimma ne ndu ne zam kaŋ tigɗi na wak uzi go.
21Kaŋ ma ya go ataa ge ne e suwar iigiya,
ko anda ge ne waɗe naa pal:
22Mo̰r ge ne ame gan,
ndu ge daal ge ne zam kaŋzam gḛ,
23yàl katɗa ge gwale ge naa ne sen na ne
ne kale ge ne ame na ná ge yál byalam.
24Ge suwar pal, kaŋ ma ya go anda, a jyale cecḛ
amma nama zwama waɗe waɗe:
25Naŋgurum ma, nama pool to,
amma a kote kaŋzam digi ne ta pe somor.
26Mbíí ma, nama pool to me,
amma a mbo al bama tuul njal zi.
27Tere baktar, nama gan to,
amma a ɗage ta pe go.
28Kokot, na ge ndu ne wan na ne na tok baŋ,
amma mbo ɗiŋ mbo wat gan ma zok zi.
29Kaŋ ma ya go ataa, ko anda,
a mbo viya̰ dore ge be to:
30Sonne, na ge pool gḛ waɗe kavaar ma,
gwan ne go̰r kaŋ a̰me ndwara zḛ to bat.
31Koko̰re na ge ne abe tene digi mḛya na koo ma pal,
ko bemjere, ko gan, na ge ne mḛ na asagar ma ndwara zḛ.
32Kadɗa mo ke dale, mo jegre no,
kadɗa mo dwat ya, dibi mo tok mo wak go.
33Pam potɗa hon pula,
vo̰r Potɗa hal swama,
Fare ɓyareya tol gool.
Currently Selected:
Fare sḭ ma 30: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
