Fare sḭ ma 28
28
1Ndu ge sone syat na pe so zḛ tek a gale ne be ge yan na pe to,
dimma ne sonne bool go, ndu ge dosol kwa tene kwa.
2Swaga ge naa ne ɗage ho̰l suwal diŋ, ga̰l ma zuli se,
amma ndu ge ɗalla ne kwarra e suwal kat halas kaal.
3Ndu ge a̰se ge ne ke na kaam yál
a dimma ne mam ge ne swar gḛ, gululi kaŋzam ma uziya go.
4Naa ge ne saŋge eya bama go̰r ma uware ndu ge sone,
naa ge ne koy eya ma ke ho̰l ne na.
5Naa ge sone ma wan fare ge jwap pe to,
naa ge ne ɓyare Bage ɗiŋnedin pe ma wan fare ma pe pet.
6Golgo ndu kat a̰se, ka mborra ɗeŋger zi,
ge ndu kat gan, ka mborra viya̰ ge waal gwagwaraŋ ma go.
7Vya ge ne koy eya ma a ndu ge zwama ne,
ndu ge ne an ne naa ge vagal ma hon na bá saaso.
8Ndu ge ne hat tene gan ne gobso honna
kote na kaŋ ɓolla ma hon ndu ge ne kwa naa a̰se.
9Ndu ge ne dol na pala uzi ne eya ma ta,
ko na kaɗeya puy, a ndil nama kaŋ senna.
10Ndu ge ne e naa ge dosol ma ya̰meya, na sḛ mbo det na faɗe zi,
amma naa ge ɗeŋger ma ɓol joo swaga katɗa ge kwaɗa.
11Ndu ge gan ndil tene zwama,
ndu ge a̰se ge ɗalla da ne pool ben na pe zum.
12Swaga ge naa ge dosol ma ne ame ga̰l, laar saal ya go gḛ,
amma swaga ge naa ge sone ma ne ame ga̰l, naa woy ta.
13Ndu ge ne woy na sone ma zam zḛ to,
ndu ge ne ben nama zum, ya̰ nama uzi, mbo ɓol poreya.
14Wak busu ya ndu ge ne sya sone kerra vo pal,
amma ndu ge ne togre na dulwak det sone zi.
15Muluk ge ndu ge sone ne a̰se ma pal
a dimma ne sonne pyanna, ko ne yoŋyoŋ ganeya go.
16Ga̰l ge bernde é naa njot yál gḛ,
Ndu ge ne sen kaŋ ɓolla ge ne na viya̰ go to, mbo ke kaal suwar pal.
17Ndu ge ne dṵṵl ge siya ge na ne hṵ na ne na pal,
syat na pe so mbo ban tene uzi,
ndu a̰me tele na to.
18Ndu ge ne mbo mborra ge dosol mbo má tene,
amma ndu ge ne mbo mborra ge gagaraŋ, mbo det viya̰ a̰me go.
19Ndu ge ne gar na gaaso mbo huri ne kaŋzam,
ndu ge ne ɓyare ke kaŋ ge ne mbya kerra to gwan tene a̰se#12:11..
20Ndu ge ɗeŋger ɓol wak busu,
Bage ne har tene ɓol kaŋ, woɗege mḛreya to to.
21Be ke kwaɗa ndu ka ke vareya to,
Ago ndu ge pateya da ne pool hat tene seŋgre ne kaŋzam ge wak ɗu pe.
22Ndu ge laar mam yan kaŋ ɓolla pe,
kwa go na zwal ya woɗegeya na pal to.
23Ndu ge ne mḛre na kon ne go̰r go ɓol laar wanna,
waɗe ndu ge ne lase na kon ne na wak baŋ.
24Ndu ge ne sel na bá ma ne na ná, ka janna go: A be sonne ne to.
A ne ndu ge ne vḛne kaŋ kondore.
25Ndu ge laar mam tol gool,
Ndu ge ne é na saareya Bage ɗiŋnedin pal mbo ka zam zḛ.
26Ndu ge ne e na jobreya ma na sḛ pal, a ndu ge dale ne,
ndu ge ne ke mborra zwama zi, mbo má tene.
27Ndu ge ne hon ndu ge a̰se mbo woɗege ne a̰me to,
ndu ge ne kwa na to, mbo ɓol wak vḛneya ma gḛ.
28Swaga ge naa ge sone ma ne ame gan, naa woy ta,
swaga ge a ne su, naa ge dosol ma zuli bindik.
Currently Selected:
Fare sḭ ma 28: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
