Fare sḭ ma 24

1Ke yil ne naa ge sone ma pe to,

mo laar na wa̰ kat swaga ne nama to.

2Nama dulwak dwat yál kerra,

nama wak sigɗi fare ge sone ma.

3Ne zwama ta, ndu da ne pool sin zok,

ne fare kwarra ta, ndu da ne pool sirsi na.

4Da ne kwarra ta ndu ba wi na zok ma ne kaŋ kwaɗa hir ge daage.

5Ndu ge zwama a pool,

kadɗa na da ne kwarra, na pool gwan kat waɗeya.

6Dó tene naa ndwara zḛ mbo ke pore be ge mo kwar tene to to,

naa ge yuwaleya ma gḛ hon halla ne.

7Dwatɗa ge zwama naa ge dale ma wan na pe to,

swaga koteya go, a hage bama wak jan fare to.

8Ndu ge ne dwat sone kerra,

a tol na bage fare sone.

9Dwatɗa ge ndu ge dale ne a sone kerra,

naa ndil naa ge cot naa ma kaŋ senna.

10Dam ge yál ma zi, kadɗa mo kan tene ya se,

mo pool gá a̰me pe to.

11Má naa ge a ne mbo ne nama mbo hunna ma,

zu nama ge a ne mbo ne nama mbo hunna hale pal ma.

12Kadɗa mo jan ya go: «Mbi be kwa to!»

Bage ne hale dulwak, kwa kaŋ ma kwa,

ndil mo ya go, kwa fare ma pet,

mbo pot ndu ge daage na kaŋ kerra pal#16:2, 21:2..

13Mbi vya, za daaram, a tuli,

daaram fegem tuli wak zi.

14Kwa go, zwama kwaɗa go no me.

Kadɗa mo da ne na, ndwara ge mo ne ge zḛ ge mbo kat kwaɗa,

jobreya ge mo ne mbo ban uzi to me.

15Ndu ge sone, huli swaga katɗa ge ndu ge dosol ne to,

pá na yàl to.

16Ndwara wowol, ndu ge dosol da ne pool ka detɗa, amma ɗage digi ɗage,

naa ge sone ma gá bulmiya sone zi.

17Ke tuli ne detɗa ge mo kon ge ho̰l ne to,

kadɗa na koo syalla, mo sḛ na ke tuli to.

18Na kaage Bage ɗiŋnedin kwa ɗo, na dé na ta sone,

na vate na pore ne na pal uzi to.

19Iigi tene ne naa ge sone ma pe to,

ke ene ne nama pe to.

20Dam ge kwap ge a be nama ne ne to,

katɗa ge nama ne a dimma ne ɗuli ge ne piri go.

21Mbi vya, sya Bage ɗiŋnedin ma ne gan vo,

ɓa̰ tene ne naa ge syal jalaw ma to.

22Ago baŋ tukcuk, a da ne pool burmi uzi,

a wuɗi kwa yál ge Bage ɗiŋnedin, ko gan ne e nama pal ne ɗaa?

Yuwaleya ge ɗogle ma ge ndu ge zwama ne

23No uwale, a yuwaleya ge naa ge zwama ma ne ne:

Be ke kwaɗa ndu kun sarya ne vareya to.

24Ndu ge ne jan ndu ge sone go: «Mo dosol!»

Ɓase ma tol kaŋ na pal, suwal vḛne na wak na pal.

25Amma naa ge ne mḛre nama, a ke kwaɗa,

wak busu ge kwaɗa mbo kan nama pal.

26Ndu ge ne gwan ne fare janna ne na viya̰ go

ŋgay laar wanna ge na ne.

27Ke mo temel ge zum ge,

nṵsi mo gaaso pul,

mo ba ɗage dol mo yàl pe gale.

28E fare mo kon pal baŋ ɗar to,

Mo ɓyare kun hale ɗaa?

29Jya̰ go to: «Ne jo̰ ke mbi go, mbi mbo ke na go no me,

mbi mbo gwan ne ndu ge daage potɗa na kaŋ kerra pal.»

Dir ge ndu ge uwal ne

30Ndi, mbi kale ndu ge uwal gaaso wak go, ge ndu ge be ndaco to gaaso oyo̰r wak go. 31mbi kwa kabubu ma ne sugur ge sone ma pyarra go baŋneya bindik, gulum ge a ne sḭ na ne njal verra zi gulla se. 32Mbi saare kaŋ ge mbi ne kwa na mbe ma pal, mbi ɓo fare ne zi ɗu: 33Fí dam ta ŋgeɗo, só̰ dam ta ŋgeɗo, kage mo tok fiya ta ŋgeɗo#6:10-11., 34a̰se mbo tan mo dimma ne ndu ge syala go, kyamal mbo det mo dimma ne ndu ge ne harge naa kaŋ ma go.

Currently Selected:

Fare sḭ ma 24: FGN2013

Highlight

Copy