Fare sḭ ma 23
23
1Kadɗa mo zam kaŋ da ne ndu ga̰l,
ke haŋgal ne ndu ge ne mo ndwara se pe.
2Kadɗa mo wak zam lwagar,
ndá tene.
3Ke ene ne na kaŋzam ge kwaɗa ma pe to,
a kaŋzam ge mbuɗiya ne baŋ.
4Lwage tene ɓyare kaŋ ɓolla pe to,
dwá na pal sḛ to pet.
5Swaga ge mo ndwara gale ne ɓyare kan na ta no ɗe,
ban swaga!
Ago mbal ganwak,
ɗage mbo pḭr zi ya dimma ne gegelo go.
6Za ndu ge sumri kaŋ to,
Ke ene ne na kaŋzam ge kwaɗa pe to.
7Dwat tene,
Swaga ge ne jan mo go: Zá, njó, no puy ɗe,
na dulwak ne mo pal to.
8Kaŋ ge mo ne za na, mo mbo kut na uzi,
wak tuli ge mo ne ka̰ uzi baŋ.
9Jya̰ ndu ge daal fare to,
ago, mbo sen fare janna ge mo ne ge kwaɗa ma.
10Zwagre warbe ge zaŋgal to,
wá vya kya̰le gaaso zi to#Dwa 19:14..
11Ago bage ɗaŋge nama pe a ndu ge pool ne,
a na mbo ɗaŋge nama pe mo pal ne.
12Ho̰ tene ame yuwaleya,
so mo togor ame fare janna ge ne kwarra ma.
13Ya̰ bool be mḛreya to to,
iyal na ne calaŋ hunna to.
14Mo iyal na ya ne calaŋ,
mo ma̰ na da siya zi.
Yuwaleya ge bá ne
15Mbi vya, kadɗa mo e mo haŋgal ɓyare zwama pe,
mbi mbo kat ne laar saal gḛ.
16Mbi sḛ mbo ka ke tuli,
swaga ge mo ne mbo kadɗa ka jan fare ge dosol ma.
17Ke yil ne naa ge sone ma pe to.
Dam ge daage zi, á tene sya Bage ɗiŋnedin vo.
18Go no, mo ndwara ne zḛ mbo kat kwaɗa,
jobreya ge mo ne mbo ban baŋ to.
19Mo mbi vya, za̰ mbi, mo mbo kat zwama,
mo mbo her viya̰ ge dosol.
20Ka swaga dagre ne naa ge ne fere jiya̰l ma to,
ko ne naa ge ne zam duur vagal ma to.
21Ago ndu ge ne fere jiya̰l ma ne ndu ge vagal a hat a̰se,
uwal ge nama ne zi, a mbo gá kan ba̰r ge kasagal ma.
22Za̰ mo bá ge ne tó mo,
sḛ mo ná, ndwara go na hatɗa sabar to.
23Hate kat ndu ge fareba, ndu ge zwama, ndu ge pala gwanna se, ne ndu ge ɗalla,
vḛne hál mbe ma uzi to.
24Ndu ge dosol bá da ne laar saal gḛ ge be to,
ndu ge ne tol vya ge zwama da ne tuli ge be to.
25Ho̰ mo bá ma ne mo ná laar saal,
ke naa ge ne tó mo ma sḛ tuli.
26Mbi vya, ho̰ mbi mo dulwak,
bole mbi kaŋ kerra ma.
27Gwale kaya a tuul ga̰l ne
gwale ge ɗogle a tuul ge wak gorse ne.
28Dimma ne naa ge fiiri viya̰ ma go, na sḛ huli swaga me,
zuli naa sonmo ge voɗom ma naa buwal zi.
Dir ge ndu ge fereya ne
29Woo, da ne wuɗi ma pe ɗaa?
Yii, da ne wuɗi ma pe ɗaa?
Gool da ne wuɗi ma pe ɗaa?
Yo̰re ta da ne wuɗi ma pe ɗaa?
Jwaŋ ɓolla ge be pe wanna to, da ne wuɗi ma pe ɗaa?
Ndwara dwalla fefet da ne wuɗi ma pe ɗaa?
30Da ne naa ge ne kat ne jiya̰l njotɗa ma pe,
ne naa ge nama laar ne wa̰ jiya̰l kirgiya ma pe,
31Dó mo ndwara ndil oyo̰r-jiya̰l ge ne cili kaal ɗaɗa̰y puwa̰l pul go to,
sor ka̰l se ya mbuɗi kukuf.
32Pe aya ge na ne, cot naa dimma ne bom go,
so naa duur zi dimma ne bondor-ma-ná pore go.
33Mo ndwara gá ndil kaŋ ge yak ma,
mo gá jan fare ge seŋgre ma.
34Mo ndil tene dimma ne mo ne sor ya mam pul go go,
ko dimma ne ndu ne fí ya fak ga̰l ge sḭḭl ne pot na go go.
35A iya mbi, mbi be za̰ yál to!
A duci mbi, mbi be wan pe to!
Swaga ge mbi ne kore digi, mbi gwan ɓyare ɓyare iya.
Currently Selected:
Fare sḭ ma 23: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
