Fare sḭ ma 22
22
1Pateya waɗe kaŋ ɓolla waɗe,
dulwak kwa a̰se waɗe fool kaal ma ne dinar waɗe.
2Ndu ge gan ma ne ndu ge a̰se a det ya swaga ge ɗu go:
A Bage ɗiŋnedin dó nama ne jwak.
3Ndu ge zwama kwa yál mborra ya na pal, iyan tene uzi,
ndu ge ne kwarra jwap to par tene fare zi, gá pot fare.
4Potɗa ge ndu ge ne gwan ne na pala se, ge ne sya Bage ɗiŋnedin vo,
a kaŋ ɓolla, ne hormo, ne ndwara.
5Kore ma ne faɗe ma ya viya̰ pul ge waal gwagwaraŋ go
ndu ge ne ɓyare koy tene, na abe tene uzi ne na go.
6Ho̰ bool yuwaleya ge ne na viya̰ go tek ge gale ne jyale,
ko sabar ge na ne zi, mbo vyale na uzi to bat.
7Naa ge gan ma ya a̰se ma pal,
Ndu ge ne ame wul a mo̰r ge ndu ge ne ho̰ wul ne.
8Ndu ge ne zare sone syat ya̰l,
kaŋ ge ne e na ke fare pool mbo burmi uzi.
9Ndu ge wí mbo ɓol wak busu,
ne da pe wá naa ge a̰se ma.
10Yá̰ ndu ge kalam pe uzi ya, gool ma̰ á,
gaage ma ne sáso ma̰ á me.
11Ndu ge na laar ne wa̰ kat dulwak peɗem,
na wak ne jan fare tuli me,
gan ke na kondore.
12Bage ɗiŋnedin ndwara dó ya kwarra pal,
cigi na ndwara uzi ne naa ge ne kan bale ma fare pal.
13Uwal jan tene go: «Sonne ya zum
ma̰ hat hun mbi buwal pe go#26:13..»
14Gwale ge kaya wak da ne tuul ga̰l go,
ndu ge Bage ɗiŋnedin laar ne ɓyare na to, det na zi.
15Daal ya bool ma dulwak zi,
bol da ne pool ndage na ne nama zi uzi.
16Ndu ge ne ke ndu ge a̰se yál ndwara hat tene gan,
ko ndu ge ne hon ndu ge gan bobo ma, hat tene a̰se.
Yuwaleya ma ge ndu ge zwama ne
17Só mo togor za̰ fare janna ge ndu ge zwama ne,
hṵ mo haŋgal ame kwarra ge mbi ne ma.
18Mbo kat kwaɗa ne mo pe, kadɗa mo koy nama ya mo zi,
mo ka dwage nama janna me.
19Mbi ɓyare go mo ka̰ mo saareya ma Bage ɗiŋnedin pal,
da ne pe, mbi hon mo yuwaleya mbe ma̰ no me.
20Ndi mbi njaŋge mo yuwaleya ma ne zwama ma tapolɗu.
21Ne da pe, mo hate jan fare ge fareba,
mo gwa̰ ne fare ge fareba ya jan naa ge ne teme mo ma me.
22Maŋge ndu ge a̰se kaŋ ne na a̰se pe to,
twacwage ndu ge woɗegeya swaga sarya go to.
23Ago Bage ɗiŋnedin mbo ɗaŋge nama pe,
mbo hun naa ge ne maŋge nama kaŋ ma.
24Ke kondore ne ndu ge ne gumi pore avun to,
á̰ dagre ne ndu ge laar ol to,
25na kaage mo ha̰le ne na kaŋ kerra ma ɗo,
mo dé ge faɗe zi to.
26Dó tene mo kon ndwara zḛ mbo ame wul to,
Hé mo kon wul dṵṵl mo pal to#6:1..
27Kadɗa mo ne a̰me ge honna to,
ko mo saŋgal puy a mbo ame na ne mo tok go.
28Zwagre warbe ge dḛ zaŋgal ge mo bá ma ne e na to.
29Mo kwa ndu ge ne ke na temel ɗalla’a?
Da ne pool ke temel hon gan ma,
gá naa ge ke temel ge pala kwaya̰l go to ma buwal zi to.
Currently Selected:
Fare sḭ ma 22: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
